ټرمپ د برېکس هېوادونو ته؛ که له ډالر پرته بل اسعار وکاروئ له ۱۰۰٪ تعرفو سره به مخ شئ
د امریکا منتخب ولسمشر ډونالډ ټرمپ د برېکس غړو هېوادونو ته خبرداری ورکړ، چې که دوی د "قوی امریکايي ډالرو" پرته بل اسعار وکاروي، دوی به له ۱۰۰٪ تعرفو سره مخ شي.
د امریکا منتخب ولسمشر ډونالډ ټرمپ د برېکس غړو هېوادونو ته خبرداری ورکړ، چې که دوی د "قوی امریکايي ډالرو" پرته بل اسعار وکاروي، دوی به له ۱۰۰٪ تعرفو سره مخ شي.
هغه په سوشال تروث ټولنیزه شبکه کې لیکلي، چې هر هغه هېواد چې غواړي دا کار وکړي باید د امریکا له اقتصاد سره خدای پاماني وکړي.
هغه زیاته کړه: "هېڅ چانس نشته چې برېکس په نړۍواله سوداګرۍ کې د متحده ایالاتو ډالرو پر ځای بل څه وکاروي او هر هغه هېواد چې غواړي دا کار وکړي باید د متحده ایالاتو اقتصاد سره خدای پاماني وکړي."
د برېکس سازمان په ۲۰۰۶ میلادي کال کې د روسیې، چین، هند او برازیل له خوا جوړ شو.
په تېرو میاشتو کې، په تاتارستان کې د دې سازمان په سرمشریزه کې د روسیې د ولسمشر ولادیمیر پوتین په لاس کې د برېکس له نښان سره د یو د پیسو د نمونې عکس د رسنیو پام ځانته اړولی و.
دا لومړی ځل نه و، چې د دې پیسو انځور خپور شوی، په ۱۴۰۲ کې د دې پیسو یو انځور رسنیو ته لاره پیدا کړې وه.
د برېکس غړو لپاره د واحد اسعارو د پیلولو وړاندیز په ۲۰۱۸ کې وشو او په ۲۰۲۲ کې د اوکراین جګړې او د روسیې پروړاندې د نړۍوالو بندیزونو له زیاتیدو وروسته ، دا مسله په جدي توګه تعقیب شوه.
د روسیې او برازیل مشران د دې پلان ملاتړي دي، خو داسې ښکاري چې د دې پلان عملې کولو ته اوږده لار پاتې ده.
د چین، هند او متحده عربي اماراتو په ګډون یو شمیر هېوادونه چې د برېکس غړي دي، له امریکا او لویدیځ سره پراخې سوداګریزې اړیکې لري.
اوس ټرمپ په پرېکنده ډول د برېکس غړو ته ګواښ کړی، که دوی نوې اسعار وکاروي، پایلې به یې وویني.
