د ۱۹ کلنو اسیا جام کرېکټ سیالیو په نېمه پایلوبه کې بنګله دېش د پاکستان او هند د سریلانکا لوبډلې ته په ماتې ورکولو سره د دغه جام پایلوبې ته ووتل. د دې جام پایلوبه د یکشنبې په ورځ د هند او بنګله دېش د ۱۹ کلنو کرېکټ لوبډلو ترمنځ ترسره کیږي.
د ۱۹ کلنو اسیا جام کرېکټ سیالیو په نیمه پایلوبه کې نن جمعه بنګله دېش له پاکستان سره او هند له سریلانکا سره لوبه وکړه.
د نېمه پایلوبې په لومړۍ لوبه کې د بنګله دېش د ۱۹ کلنو کرېکټ ملي لوبډلې د پاکستان له لوبډلې د لوبې پچه وګټله او لومړۍ یې د توپ اچونې پرېکړه وکړه.
د پاکستان د ۱۹ کلنو کرېکټ ملي لوبډلې په ۳۷ اورونو کې د ټولو لوبغاړو په سوځیدو سره ۱۱۶ منډې جوړې کړې او سیالۍ لوبډلې ته یې په پنځوس اورونو کې د ۱۱۷ منډو هدف ورکړ.
د لوبې په دوهمه پاڼۍ کې د بنګله دېش د ۱۹ کلنو کرېکټ ملي لوبډلې په ۲۲،۱ اورونو کې د درې لوبغاړو په سوځیدو سره د تمیم د ۶۱ ناسوځیدلو منډو په مټ ۱۲۰ منډې جوړې کړي او د یاد جام پایلوبې ته ووتله.
همدارنګه د نیمه پایلوبې په دوهمه لوبه کې د هند د ۱۹ کلنو ملي لوبډله د سریلانکا د ۱۹ کلنو ملي لوبډلې په وړاندې د سیالۍ ډګر ښکته شوه.
د دغې لوبې پچه د سریلانکا د ۱۹ کلنو ملي لوبډلې وګټله او د هند په وړاندې یې د توپ وهنې پرېکړه وکړل.
د سریلانکا د ۱۹ کلنو کرېکټ ملي لوبډلې په ۴۶،۲ اورونو کې د خپلو ټولو لوبغاړو په سوځیدو سره ۱۷۳ منډې جوړې کړې او سیالې لوبډلې ته یې په پنځوس اورونو کې د ۱۷۴ منډو هدف ورکړ.
خو د هند د ۱۹ کلنو ملي لوبډلې د ویبهاو سوریاونشي د ۶۷ او ایوش مهاتېر د ۳۴ منډو په مټ په ۲۱،۴ اورونو کې د سریلانکا د ۱۹ کلنو لوبډلې له لورې ورکړل شوی هدف پوره کړ او د جام پایلوبې ته ووت.
د ۱۹ کلنو اسیا جام کرېکټ سیالیو پایلوبه د یک شنبې په ورځ د هند او بنګله دېش د ۱۹ کلنو ملي لوبډلو ترمنځ د عربي متحده اماراتو په دوبۍ نړیوال کرېکټ لوبغالې کې ترسره کیږي.
