د افغانستان د اطلاعاتو او فرهنګ پخواني وزير عبدالکریم خرم ویلي، چې افغانان دې له سوريې زدکړه وکړي او کورنۍ نارضایتۍ دې ناحله نه پرېږدي. نوموړي ويلي، چې د هېوادونو واکمنان دې لومړۍ له خپل ملت سره سوله وکړي.
د افغانستان د اطلاعاتو او فرهنګ پخواني وزير عبدالکريم خرم د شنبې په ورځ (د لېندۍ ۱۷ مه) پر خپله اېکس پاڼه د سوريې کورنۍ جګړې ته په اشارې لیکلي: « معلومه نه ده، چې د سوريې حکومت به پاته شي او که سقوط وکړي.»
د خرم په خبره، چې په سوریه کې اوسنۍ وضعت د افغانانو لپاره یو لوی درس دی او په هيڅ صورت باید داخلي ناراضايتي ناحله پاته نه شي.
نوموړي زياته کړې، چې په ۲۰۰۱ کال کې د بن کنفرانس کې د هغه وخت د حکومت مخالفان یا طالبان له پامه غورځول شوي و.
خرم د هغو هېوادونو لپاره، چې په انزوا کې پاته دي او داخلي ستونزې يې نه دي حل کړې دا ډول موضوعات د خطر یو زنګ بللی.
هغه لیکلي: « دا د هغو هېوادونو لپاره، چې په انزوا کې دي او د نژدې او ليرو هېوادو متضادي ګټي لري د مداخلې لپاره بهانې جوړي او خطرناک دي.»
نوموړی وايي، چې د بشارالاسد د راپرځېدو په صورت کې معلومه نه ده، چې سوريه په کوم حالت کې پاته شي؛ ځکه د همدې رژيم په وړاندي تر ۶۰ زياتې کوچنۍ او لویې مخالفې ډلې د بیلابیلو تمايلاتو له مخې سره یو شوې دي.
د سوریې په حلب ښار کې د سوریې د پوځ او د حزب تحریر الشام ډلې وسله والو ترمنځ نښتې روانې دي، چې د روسیې او سوریې هوايي ځواکونو د بشارالاسد د مخالفو وسله والو د شړلو لپاره هوايي بریدونه هم پیل کړي دي.
مخالفو وسلهوالو په حلب کې د ولسمشر بشارالاسد کور نیولی دی.
د بشارالاسد مخالفین د پرمختګ په حال کې دي.
تحریر الشام د پنجشنبې په مازدیګر د حما ښار کنټرول هم ترلاسه کړی.
د سوریې د بشري حقونو د څار ډلې ویلي، چې د پنجشنبې په ماښام د سوریې د پوځ څه باندې ۲۰۰پوځي موټرې د حما له سویلي څنډو څخه حمص ته په شا شوي دي.
سرچينو ویلي، چې تحرير الشام د حما پر مرکزي زندان کنټرول خپل کړی او سیاسي بندیان یې خوشي کړي دي.
د طالبانو تر واک لاندې د افغانستان برېښنا شرکت ځینو کارکوونکو نن « د لیندۍ۱۶مه» وویل چې تېره پنجشنبه د طالبانو استخباراتو برېښنا شرکت کلابند کړی و.
عیني شاهدان وايي استخباراتو د شرکت د کارکوونکو په ځانګړي ډول د بشري سرچینو ادارې له ټولو کارمنانو موبایلونه ور سره یووړل.
د طالبانو استخباراتو د برېښنا شرکت کارکوونکو ته ویلي چې موبیلونه او اداري لېپټاپونه به په مکمل ډول وڅېړل شي ترڅو هغه کسان پیدا کړي چې د دې ادارې د فساد اسناد یې رسنیو ته لېږلي دي.
د افغانستان د برښنا شرکت یو کارمن« نن شنبې هم د طالبانو اسخباراتو برېښنا شرکت کلابند کړی او د ټولو شعبو او دفترونو کمپیوټرونو کې دفتري او یاهم شخصي اېمیلونه ګوري ترڅو معلومه کړی چې له دې ادارې څوک سندونه بهر ته باسي»
ځیني کارکوونکي وايي چې دوی په موبایلونو کې شخصی انځورونه او ویډیوګانې هم لري چې دا د دوی پر شخصي حریم تېری دی.
دوی زیاتوی استخبارات د طالبانو د برېښنا شرکت رییس عبدالباري عمر په شخصی غوښتنه دا څېړنه پیل کړې ده، ځکه څو ورځې وړاندې هغه لېستونه په ټولنیزو رسنیو کې خپاره شول چې د طالبانو د برېښنا رییس عبدالباري عمر ۴۰ نژدې خپلوان ګمارلي دي.
د طالبانو تر واک لاندې د افغانستان برېښنا شرکت کې روان فساد
افغانستان انټرنشنل د هغو لېستونو کاپي هم ترلاسه کړې ده، چې د افغانستان د برېښنا شرکت لپاره د طالبانو رییس عبدالباري عمر د دې ادارې په بېلابیلو پوسټونو کې شاوخوا ۴۰ نژدې خپلوان ګمارلي دي.
په دې لېستونو کې لېدل کېږي چې له ۳ بست نیولې تر ۹ بست پورې یې کسان ګمارلي دي چې یوازې ټول د لوګر د مرکز پل علم اوسېدونکي دي او پخپله دا رییس هم د همدې سیمې دی.
د طالبانو سرچینې افغانستان انټرنشنل ته وویل، د دې لېستونو خپرېدو سره د اوسني رییس عبدالباري عمر په اړه په کابل کې د طالبانو تر منځه بحثونه جوړ شوي دي.
د سرچینې په وینا« په ټولنیزو رسنیو کې د برېښنا شرکت کې د ګمارنو د لېستونو د خپرېدو له امله عبدالباري عمر له استحباراتو غوښتنه کړې ده چې د دې اداري د کاروونکو ټول موبایلونه او اداري کمپیوټرونه وکتل شي ترڅو معلومه شي چې څوک دغه سندونه له دې ادارې بهر کوي»
افغانستان انټرنشنل پښتو د طالبانو تر واک لاندې د افغانستان برېښنا شرکت اړوند بېلابېل د فساد سندونه خپاره کړي دي.
یو له دغو راپونو د برېښنا شرکت له خوا د بډو بدل کې د برېښنا د ۸۲ نويو لګول شویو ټرانسفرمرونو لېست هم دی.
په دغه راپور کې راغلي و چې کابل کې د برېښنا پر کمښت سربېره بیا هم طالبانو دغه ټرانسفرمرونه فابریکو او سوداګریزو وداینو ته لګولي.
د افغانستان انټرنشنل د بل راپور له مخې چې د اسنادو له مخې جوړ شوی و، د طالبانو تر واک لاندې د افغانستان برېښنا شرکت عمومي رییس عبدالباري عمر، د ملا هبت الله اخوندزاده د فرمان خلاف کمارنې کړې دي.