ایران وايي، په تېرو درېیو ورځو کې یې ۴ زره ایرانیان له سوریې څخه را ایستي دي
د ایران د حکومت ویانده وايي، له سوریې څخه د ایرانیانو د را ایستلو لړۍ به تر هغه وخته دوام ولري، چې وروستی ایرانی له هغه هېواده نه وي راوتلای.
د ایران د حکومت ویانده وايي، له سوریې څخه د ایرانیانو د را ایستلو لړۍ به تر هغه وخته دوام ولري، چې وروستی ایرانی له هغه هېواده نه وي راوتلای.
د ایران د حکومت ویاندې فاطمې مهاجراني د سې شنبې په ورځ د (لیندۍ ۲مه) د یوې خبري ناستې پر مهال وویل، چې له سوریې څخه د ایراني وګړو د ایستلو لړۍ روانه ده.
نوموړې وویل، چې په تېرو درېیو ورځو کې تردې مهاله د ماهان هوايي شرکت له خوا په۱۰ الوتنو کې ۴ زره ایرانیان له سوریې څخه ایران ته انتقال شوي دي.
ړ نوموړې په خبره له سوریې څخه د ایراني وګړو د را ایستلو لړۍ د یو تخصصي ډلې له لوري ترسره کیږي او په سوریه کې له خطر سره مخ ایرانیانو د رایستلو لړۍ به د وروستې ایراني وګړي تر ایستلو دوام ولري.
فاطمه مهاجراني وايي، په سوريه کې به له نوي مشرتابه سره خبرې د ثبات له رامنځته کېدو وروسته کېږي، خو هغه څه چې د ايران د حکومت لپاره مهم دي د اسرائيلو پر وړاندې د دوی دريځ دی.
همدارنګه اغلې مهاجراني د “برخلیک ټاکل” د سوریې د خلکو حق وباله او د هغه هېواد خلکو ته یې د نیکمرغۍ هیله وکړه.
د ایران د حکومت ویاندې د بشرالاسد د حکومت د پرځیدو په اړه وویل، د سوریې پوځ له وسله والو مخالفینو سره د مقابلې توان نه درلود نو موږ ولیدل چې په سوریه کې حکومت سقوط وکړ.
نوموړې وايي، ایران په سوریه کې بدلونونه څاري خو ایران په سوریه کې د مذهبي او دیپلوماتیکو ځایونو د امنیت پر ساتلو ټینګار کوي.
