کابل کې د ایمرجنسي روغتون وايي، د ۲۰۲۱ کال اګست کې پر افغانستان د طالبانو واکمنېدو پسې دغه هېواد کې د ټولو ترافيکي پېښو شمېر ۵ برابره شوی. د ايمرجنسي د شمېرو له مخې، د ۲۰۲۲ کال له مارچ د ۲۰۲۴ کال تر مارچ پورې ثبت شوې شمېرې په افغانستان کې د ترافيکي پېښو ۷۸،۵ سلنه زیاتوالی ښيي.
دغه راپور، چې د پنجشنبې په ورځ (د لېندۍ ۲۹مه) خپور شو، په کې ویل شوي، چې په دې موده کې د ترافيکې پېښو شمېر له ۲ زره ۶۶۲ څخه ۵ زره ۵۲۰ ته لوړ شوی دی.
دغه روغتون وايي، چې دجګړې د ختمېدو سره یوشمېر لارې بېرته پرانیستل شوې؛ خو ډېری لارې په جګړو کې د تخریب له کبله همداسي پاتې دي، چې بیارغونې ته اړتیا لري.
د ايمرجنسي د مالوماتو له مخي، د سړکونو د خراب حالت او تېز سرعت سره د ځمکې ښويېدو او د سړکونو د مقرراتو د نه مراعت له امله هم ډېرې پېښې کېږي.
په راپور کې راغلي، چې په افغانستان کې مسافرین نقلیه وسایل نه لري او د پراخې بې وزلۍ معنا دا ده، چې ډېر خلک د اوږد واټن سفر لپاره په یوه موټر کې تګ راتګ کوي.
دا راپور وروسته له هغه خپور شو، چې د کابل – کندهار پر لویه لاره د دوو ترافیکي پېښو له امله د طالبانو په وینا ۵۲ تنه مړه شول.
ایمرجنسي یو نړیوال بشري سازمان دی، چې د جګړې، بې وزلۍ او ځمکنیو ماینونو قربانیانو ته وړیا درملنه وړاندې کوي.
دا سازمان په ۱۹۹۴ کې تاسیس شو.
دې سازمان د خپل تاسیس راهيسي د ۹ میلیونو ناروغانو درملنه کړې ده.
زیاتره فعالیتونه یې په افغانستان، د مرکزي افریقا جمهوریت، عراق، ایټالیا، سوډان او یوګانډا کې دي.
