د طالبانو کورنيو چارو وزارت وايي، د کابل په بګرامي ولسوالۍ کې یې د دقیقو مالوماتو له مخې په عملیاتو کې ۴۰ ټنه کيمياوي خام مواد نیولي، چې د نشه يي توکو په پروسیس کې کارېدل. طالبانو د همدې موادو سره د یو کس د نیولو خبر هم ور کړی دی.
د طالبانو کورنیو چارو وزارت د نشه يي توکو سره د مبارې او کشف مشر عبدالله محمد د شنبې په ورځ ويلي، چې دغه کيمياوي مواد له یوه هېواد راوړل شوي او دلته د نشه يي توکو د پروسیس په برخه کې کارېدل.
نوموړي دا ونه ویل، چې دغه مواد له کوم هېواد راوړل شوي، خو په تېر کې ورته مواد بیا بیا له پاکستان افغانستان ته لېږدول شوي.
عبدالله محمد وايي، چې د دغه موادو پر استعمال بنديز دی.
د طالبانو دغه وزارت دا هم ويلي، چې چاته د نشه يي توکو د کر، قاچاق، توليد او استعمال اجازه نه ورکوي او په ټول هېواد کې يې په وړاندې مبارزه جريان لري.
کیمیايي خام مواد د صنعتي نشه يي توکو جوړولو لپاره په دودیزو نشه يي توکو کې کارېږي.
که څه هم طالبانو د نشه يي توکو پر کر، تولید او تجارت بندیز لګولی، خو ور سره له افغانستان سیمې په تېره ایران ته د صنعتي نشه يي موادو په تېره شیشې صادرات ډېر شوي دی.
د طالبانو د دفاع وزارت د پاکستاني ځواکونو پر پوستو برید د “شریرو عناصرو”او د هغوی د ملاتړو پر پټنځیو برید بللی. پاکستاني رسنیو هم د امنیتي سرچینو په حواله ویلي، چې “د خوارجو په ملاتړ یې د افغان طالبانو” د برید مخه نیولې. دا اول ځل دی چې دواړه لوري په دغه برید پسې ورته خبرې کوي.
طالبانو تېره شپه پر ډیورنډ کرښه د پاکستان پر یو شمېر پوستو بریدونه وکړل.
د طالبانو د دفاع وزارت په دې اړه خبرپاڼه کې ویلي، چې “شریرو عناصرو” او د هغوی د ملاتړو پر پټنځیو یې برید کړی دی.»
طالب پلوه رسنیو هم په اړوند خبرونو کې خپله لهجه بدله کړې ده.
د طالبانو استخباراتو اړوند رسنۍ المرصاد پر پاکستاني امنیتي پوستو باندې د طالبانو د برید اړوند لیکلي دي: «تېره شپه د خوست د علیشرو ولسوالۍ له لوري په ډبګي سیمه کې د فرضي کرښې پورې خواته د فتنه ګرو او د دوی د ملاتړو په پټنځیو او مرکزونو انتقامي بریدونه او چاودنې شوې دي.»
دغې رسنۍ ویلي، د خوست د علیشرو او ډنډ پټان ولسوالیو له شپږو سیمو د فتنه ګرو پر پوستو طالبانو تېره شپه تر سهاره بریدونه کړي دي.
د پاکستان ځینې رسنیو هم پر ډیورنډ کرښه د طالبانو او پاکستاني ځواکونو بریدونو ته ورته پوښښ ور کړی دی.
جیو نیوز د امنیتي سرچینو له قوله لیکلي، چې تېره شپه پر ډیورنډ کرښه د پاکستاني پوځیانو پر امنییتي پوستو افغان طالبانو د “خوارجو” په ملاتړ بریدونه کړي دي.
دا لومړۍ ځل دی، چې پاکستان د طالبانو بریدونه د خوارجو بریدونه بولي او طالب پلوه رسنۍ بیا پاکستاني ځواکونو پوستو ته د فتنه ګرو لفظ کارولی دی.
د نیشن په نوم یوې پاکستاني رسنۍ بیا راپور ورکړی دی؛ چې د دغه هېواد امنیتي ځواکونو د پاکستان او افغانستان پر پوله “د خوارج وترهګرو د خراسان ډلې”برید په بریالیتوب سره ناکام کړ.
دغې رسنۍ راپور ورکړی، چې د دسمبر د ۲۷-۲۸مې په شپه د ۲۰څخه تر ۲۵ پورې “خوارج ترهګرو” هڅه وکړه چې د افغان طالبانو د سرحدي پوستو په کارولو سره له کورمې او شمالي وزیرستان پاکستان ته ننوځي، خو پاکستاني ځواکونو په چټکۍ سره ځواب ورکړ او دا هڅه یې شنډه کړه.
د راپور له مخې، د ډیسمبر د ۲۸مې “خوارجو او افغان طالبانو” په ګډه د درنو وسلو په کارولو سره په پاکستاني پوستو بې دلیله برید پیل کړ.
پاکستاني رسنیو په خپلو راپورونو کې ویلي، چې د افغانستان لوري ته درانه زیانونه اوښتي دي، چې له ۱۵څخه زیات “خوارج او افغان طالبان” پکې وژل شوي او څو نور ټپیان شوي دي.
دوی دا هم ویلي، چې افغان طالبانو خپلې شپږ سرحدي پوستي هم خوشې کړې دي.
د افغان طالبانو دا بریدونه د پاکستان هوايي ځواکونو د څلور ورځې وړاندې د پکتیکا په برمل او سپېره ولسوالۍ کې هوايي بریدونو پسې دي.
طالبانو هغه مهال ویلي و، چې د پاکستان یاد بریدونه به بې ځوابه پاتې نه شي.
د طالبانو د دفاع وزارت ویاند عنایت الله خوارزمي وايي، د دوی حکومت هم پښتونخوا د پاکستان د خاورې برخه نه ګڼي. تر دې مخکې هم د افغانستان ټولو حکومتونو پښتونخوا د پاکستان خاوره نه ده منلې.
د طالبانو دفاع وزارت د شنبې په ورځ وویل، چې د ډیورنډ فرضي کرښې هاخوا یې بریدونه کړي دي.
د طالبانو دفاع وزارت ویاند عنایت الله خوارزمي د رویټرز خبري اژانس د دې پوښتنې په ځواب کې چې ایا دغه څرګندونې یې پاکستان ته اشاره ده، نو ویې ویل، "موږ دا د پاکستان خاوره نه ګڼو، نو موږ دا نه شو تاییدولی چې دا د پاکستان په خاوره کې بریدونه دي، خو دا برید "د فرضي کرښې بل اړخ ته شوی دی."
د شنبې په ورځ طالبانو له خوست او پکتیکا ولایتونو په بریدونو کې د پښتونخوا په شمالي وزیرستان او کورمه کې د پاکستان د امنیتي ځواکونو پوستې په نښه کړې.
فرانس خبري اژانس د پاکستان د یوه لوړ پوړي سرحدي چارواکي په حواله خبر ورکړی، چې په دې برید کې یو پاکستانی سرتېری وژل شوی او اوه نور ټپیان شوي دي.
د طالبانو د دفاع وزارت د شنبې په ورځ اعلان وکړ، چې په پکتیکا ولایت کې یې د پاکستاني ځواکونو له هوايي برید څلور ورځې وروسته ځوابي بریدونه پیل کړي دي.
د طالبانو دفاع وزارت په خبرپاڼه کې په مشخص ډول د پاکستان نوم نه دی اخیستل شوی، خو ویلي یې دي چې دا بریدونه "د ډیورنډ له فرضي کرښې هاخوا" شوي دي.
د ډیورنډ فرضي کرښه هغه اصطلاح ده، چې طالب چارواکي یې معمولا د افغانستان او پاکستان تر منځ پولې ته اشاره کوي.
له پاکستان سره په تازه ترینګلتیا پسې طالبانو د سیاسي کمېسون ویلي، چې «افغانستان د یوه خپلواک هېواد په توګه د خپلو خلکو او خاورې د ساتلو مسوولیت او د دفاع مشروع حق لري.» طالبانو په سیمه کې د داسې اقداماتو د مخنیوي غوښتنه کړې، چې «کړکېچ زیاتوي او ثبات له منځه وړي.»
د طالبانو د ریاست الوزرا سیاسی مرستیال عبدالکبیر په مشرۍ نن د یکشنبې په ورځ «د مرغومي ۷مه» د سیاسي کمېسیون ناسته وکړه.
د طالبانو مرستیال ویاند حمدالله فطرت په خپل اېکس کې د خبرپاڼې په خپرولو سره لیکلي، چې په دې ناسته کې له ګاونډیو هېوادونو سره د اړیکو او ستونزو، له یوشمېر هېوادونو سره د تعامل د پراختیا او د افغانستان او سیمې پر وروستیو تحولاتو بحث شوی دی.
په خبرپاڼه کې راغلي چې په دې ناسته کې د اجنډا له مخې په ورسپارل شویو موضوعاتو لازم تصامیم ونیول شول.
طالبانو په خپله خبرپانه کې دا نه ده په ډاکه کړې، چې په کومو مشخصو موضوعاتو تصامیم نیول شوي دي او نه یې هم د پاکستان وروستي هوايي برید ته په مشخصه توګه اشاره کړې ده.
د طالبانو د سیاسي کمېسون ناسته په داسې حال کې ده، چې پاکستان د سې شنبې په شپه د پکتیکا په برمل ولسوالۍ کې د وزیرستاني کډوال په نښه کړل او ۴۶ تنه ملکي کسان یې ووژل.
پاکستان بیا ادعا کوي چې په دغو بریدونو کې یې «مشکوک ترهګر» وژلي دي.
د پاکستان د بریدونو په مقابل کې نن طالب ځواکونو په پکتیا او خوست کې له ډیورنډ کرښې سره په کورمه او وزیرستان کې د پاکستاني ځواکونو پوستې په نښه کړې.
د ملګرو ملتونو امنیت شورا د جمعې په ورځ اعلان وکړ، چې د دې شورا غړو شاوخوا شل ورځې وړاندې په خپله غونډه کې د یوناما له دفتره خپل ملاتړ بیا څرګند کړ. په اعلامیه کې راغلي، چې د امنیت شورا غړي د ښځو پر وړاندې د طالبانو د کړنو د منفي اغیزو په اړه ژوره اندیښنه لري.
د ملګرو امنیت شورا د شنبې په ورځ (د مرغومې ۸مه) د افغانستان په اړه د امنیت شورا د شاوخوا ۲۰ ورځې وړاندې غونډې د پايلو اړوند یوه اعلامیه خپره کړې.
په دې اعلامیه کې د افغانستان د ملي حاکمیت، خپلواکۍ، ځمکنۍ بشپړتیا او ملي یووالي ته په ژمنتیا ټینګار شوی دی.
د امنیت شورا غړو د بشري مرستو په لاره کې د پرتو خنډونو د لیې کولو او د مالي او بانکي سیستم د بیا احیا لپاره د سملاسي اقداماتو غوښتنه کړې ده.
د دې شورا غړو له طالبانو وغوښتل، چې د ښځو او نجونو د حقونو په برخه کې محدودیتونه لغوه کړي.
د اعلاميې له مخې، زدکړو ته د ښځو او نجونو لاسرسی او د افغانستان په پرمختګ کې د هغوی بشپړه ونډه د نړیوالې ټولنې او افغانستان ترمنځ د باور د رامنځته کولو لپاره مهمه موضوع ده.
د ملګرو ملتونو د امنیت شورا د اعلامیې متن په ملګرو ملتونو کې د جاپان د استازي لخوا د جمعې په ورځ (د مرغومې ۷مه) نېټه په خپل اېکس پاڼه خپور کړ.
د دغې اعلامیې له خپرېدو وروسته په ملګرو ملتونو کې د افغانستان استازي نصیر احمد فایق د جاپان او امنیت شورا د ښځو د حقونو، بشردوستانه اړتیاوو ته د پاملرنې او د هر اړخیزو سیاسي خبرو اترو د ترسره کېدو له امله مننه وکړه.
ښاغلي فایق وویل: «د محدودو سیاستونو لغوه کول او د سیاسي لارې نقشه جوړول د یو باثباته، ټول شموله او سوکاله افغانستان د جوړولو لپاره حیاتي ګامونه دي.»
د امنیت شورا غړو د یوې داسې سیاسي لارې نقشې پر جوړولو ټینګار وکړ، چې وکولای شي افغانستان د ټولو کورنیو او بهرنیو اړخونو په ګډون په نړیواله ټولنه کې په یوه باثباته او مدغم هېواد بدل کړي.
د امنیت شورا په دغه اعلامیه کې د نشه يي توکو قاچاق په افغانستان کې د ترهګرو ډلو د تمویل یوه سرچینه ګڼل کیږي او د کوکنارو د کښت د کمولو لپاره د بدیل مرستو د ملاتړ پر اړتیا ټینګار شوی دی.
د طالبانو دفاع وزارت وايي، له پاکستاني ځواکونو سره یې نښته کړې، خو مقابل کې جيونيوز د پاکستان د امنيتي ادارو له قوله ویلي، «خوارجو له افغان طالبانو سره په ګډه» د دوی پر پوستو بريدونه کړي. دې سرچینو ویلي دې پېښه کې یې ۳ سرتېري ټپیان شوي او مقابل لوري ته یې درنه مرګ ژوبله اړولې.
د پاکستان حکومت او ادارې ټي ټي پي او د دغه هېواد ضد وسلوالو ته خوارج وايي.
پاکستان لوري ویلي، چې په ځوابي بريدونو کې افغان لوري خپلې ۶ پوستې خوشې کړې او مرګ ژوبله هم ور اوښتې ده.
پاکستاني ځواکونو ويلي، چې په دې پېښه کې د دوی درې امنیتي سرتيري هم ټپيان شوي دي.
خو فرانس خبري اژانس ته پاکستاني سرچینو منلې چې یو سرتېری یې وژل شوی او ۷ ټپیان دي.
له جیو نیوز سره خبرو کې د پاکستان امنیتي ادارو د نښتې ځای هم شمالي وزيرستان او کورمه ښودلي او زیاته شوې له ۲۰ تر ۲۵ خوارجو او د پاکستان پر پوستو د بريدونو هڅه کوله، چې د پاکستان امنيتي ځواکونو يې مخه نيولې.
د طالبانو دفاع وزارت هم نن شنبه ومنله چې خوست او پکتیا کې یې پر ډیورنډ کرښه له پاکستاني پوله ساتو سره جګړه کړې.
دغه دواړه ولایتونه له شمالي وزیرستان او کورمې سره څنګ په څنګ پراته دي.
دغه وزارت د اوښتو زیانونو په اړه شمېرې نه دي خپرې کړې.
په سیمه کې افغانستان انټرنشنل پښتو ته باوري سرچینو ویلي، چې د پکتیا په ډڼډي پټان ولسوالۍ کې اوم سرحدي کنډک ته څېرمه د پاکستان له لوري په توغول شوي هاوان ګولۍ سره درې ولسي کسان وژل شوي.
سرچینه زیاتوي چې دغه ګولۍ د کوچیانو په خیمه لګېدلې او دغه درې تنه یې وژلي.
په خبر کې راغلي، چې پاکستان په وار وار له افغان طالبانو غوښتې، چې خپله خاوره دي د خوارجو په ګټه نه استعمالوي.
پاکستان لوری ادعا کوي، چې خوارج او ترهګر له افغان خاوري څخه په پاکستان کې ترهګريز بريدونه تر سره کوي؛ خو افغان طالبانو د پاکستان دغه خبري رد کړي.