د پاکستان د بهرنیو چارو وزیر وايي، په افغانستان کې د طالبانو له واکمنۍ وروسته زرګونه وسله وال بېرته پاکستان ته ستانه شوي دي. اسحق ډار کابل ته د ای ایس ای د پخواني مشر سفر ته په اشارې سره د کنایې په توګه وپوښتل: «چا له یوې پیالې چای سره پولې بیا ترهګرو ته پرانیستې؟»
اسحاق ډار، چې د پاکستان د لومړي وزیر مرستیال هم دی، د پنجشنبې په ورځ له رسنیو سره په خبرو کې وویل، چې په پاکستان کې د "ترهګرۍ ناسور ټپ" بیا تازه شوی دی. هغه خبریالانو ته وویل: "په پاکستان کې دا ناسور ټپ مخ په ښه کیدو و. ترهګر یا کمزوري شوي و او یا له پاکستانه تښتېدلي وو."
د پاکستان د لومړي وزیر مرستیال په هېواد کې د ترهګرو ډلو بیا راپورته کیدو ته په اشارې سره وویل: «اوس چا د چایو په یوې پیالې سره پولې بیا پرانیستې، مجرمین بیا له زندانونو خوشې شول او ترهګري یو ځل بیا ځواکمنه شوه.»
ښاغلی ډار درې کاله وړاندې کابل ته د پاکستان د استخباراتو د پخواني مشر جنرال فیض حمید سفر ته اشاره کوي. تر دې مخکې هغه په لندن کې یوې غونډې ته په کنایه ویلي و، چې «د یوې پیالې چای څښلو» ونه شو کړای د اسلام اباد امنیتي ستونزې حل کړي. هغه ویلي و: «پاکستان د هغې یوې پیالې چای پرې کوي.»
جنرال حمید د پاکستان له لومړي وزیر عمران خان سره نږدې اړیکې درلودې. د خلکو او مسلم ليګ ګوندونو غړي چې اوس په واک کې دي، عمران خان د ترهګرۍ د زياتوالي او د طالبانو په وړاندې د هغه د زغم له امله د تحريک طالبان پاکستان د پياوړتيا مسوول ګڼي.
د پاکستان د لومړي وزیر مرستیال او د بهرنیو چارو وزیر وویل چې "د پولو له پرانیستلو وروسته د پاکستان د تحریک طالبان له ۳۰ څخه تر ۴۰ زرو پورې غړي له افغانستان څخه پاکستان ته ستانه شوي دي."
څه دپاسه درې کاله مخکې، کله چې په افغانستان کې طالبان واک ته ورسېدل، د عمران خان په مشرۍ د پاکستان حکومت د دوی هرکلی وکړ او د ای ایس ای پخوانی مشر جنرال فیض حمید یې کابل ته ولېږه.
خو د اسلام اباد د تمې خلاف، د افغانستان واکمن طالبان د پاکستان تحریک طالبان ته شا نه کړه او د لوړ پوړو پاکستاني چارواکو په وینا، له درېیو کلونو راهیسې یې د تحریک طالبان پاکستان وسله والو ته پناه ځایونه او نورې اسانتیاوې برابرې کړي دي.
د پاکستان مخکیني لومړي وزیر عمران خان د نوي کال په مناسبت له اډياله زندان څخه بهر رسنیو سره خبرې وکړې او ویې ویل چې ۲۰۲۵ به د "حقیقي ازادۍ" کال وي. هغه ډاډ ورکړ چې "دا جعلي نظام به مات شي."
خان د پاکستان د اوسني حکومت له خوا پر شخصي ازادیو برید، له بنسټیزو قانوني حقونو سرغړونې او د دولتي ادارو تخریب وغندل.
هغه وویل چې د دې واکمنۍ له امله نه یوازې د پاکستان ټولنیز، سیاسي او قانوني نظام خراب شوی، بلکې اقتصادي بنسټونه هم له ستونزو سره مخ شوي دي.
هغه زیاته کړه، « کله چې خالد خورشید ته ۳۴ کاله بند سزا ورکړل شوه، دا د دې ثبوت دی چې په پاکستان کې د قانون واکمني ختمه شوې او دلته یو نا اعلان شوی بدتره امریت حاکم دی.عمران خان زیاته کړه چې د پرویز مشرف په واکمنۍ کې هم پاکستان له داسې ښکاره ځورونې سره مخ نه و.
خان د عدلیې په اړه هم خپلې اندیښنې څرګندې کړې او ویې ویل چې حکومت د عدلیې نظام تباه کړی او د قاضي فایز عیسی پاتې شونو ته یې د قضایي پرېکړو واک ورکړی څو د پوځ تر اغېز لاندې پرېکړې وکړي.
خان د خپل ځان په اړه هم خبرې وکړې او ویې ویل چې تېر کال یې په اړه څلور غیر قانوني پرېکړې شوې وې.
عمران خان د پوځي محکمې پر پرېکړو هم نیوکه وکړه او ویې ویل، « د پوځي محکمې پرېکړو په پاکستان کې د قانون واکمني ختمه کړه ده. په هیواد کې چې د قانون واکمني نه وي، هلته هیڅوک پانګونه نه کوي».
خان ټینګار وکړ چې پاکستان کې به پرېکړې د پاکستان په دننه کې وشي، خو هغه داهم وویل چې کله د بنسټیزو بشري حقونو خبره وي، نو د نړۍ ټول ملتونه باید غږ پورته کړي. هغه زیاته کړه، « د ملګرو ملتونو په څېر ادارې د دې لپاره موجودې دي. ټوله نړۍ کې د بشري حقونو پلوي خلک د دې حقونو د سرغړونو پر ضد غږ پورته کوي».
د پاکستان پخواني لومړي وزیر د نړیوالو اړیکو په اړه له ټرمپ نه وغوښتل چې بې طرفه پاتې شي او ویې ویل: « ټرمپ باید بې طرفه پاتې شي ځکه چې بایډن د جنرال باجوه په هڅونه د عدم اعتماد رایو له لارې زموږ د حکومت په نسکورولو سره لاسوهنه کړې وه او په دې ټوله نړۍ پوهېږي».
د پاکستان پخوانی لومړی وزیر وايي، چې تحریک انصاف ګوند له حکومت سره په خبرو اترو بوخت دی. هغه دوه مهمې غوښتنې وړاندې کړې چې یوه د نومبر د۲۶مې او د مې د۹مې پیښو په اړه د قضايي کمیسیون جوړول او بل د سیاسي بنديانو خوشي کول دي.
خان حکومت ته د خپلو غوښتنو د پوره کولو لپاره د جنورۍ ۳۱ نېټه ټاکلې او وايي، چې که حکومت هوښیاري ونه کړه، نو پرېکون به ورسره وکړي.
په پای کې خان څرګنده کړه چې بني ګاله ته د هغه د انتقال وړاندیز شوی و، خو هغه دغه وړاندیز رد کړی دی.
هغه وویل، « زما دریځ روښانه دی، زما بندي شوي کارکوونکي او مشران خوشي کړئ، بیا به د ځان په اړه خبرې کوم».
د طالبانو مرستيال ویاند حمدالله فطرت د پاکستان د دفاع وزير دا ادعا رد کړه، چې طالبانو له ډیورنډ کرښې نه د پاکستاني طالبانو د لیږدولو لپاره له اسلام اباد نه د لس میلیارده پاکستاني روپیو غوښتنه کړې وه.
د پاکستان دفاع وزیر خواجه اصف له طالب چارواکو غوښتي و، چې پاکستان ته د وسله والو د نه ستنېدو ضمانت ورکړي، خو یادې ډلې مثبت ځواب ور نه کړ.
د طالبانو تر کنټرول لاندي ملي ټلویزيون د پنجشنبې په ورځ د دې ډلې د مرستيال ویاند حمدالله فطرت له قوله د پاکستان د دفاع وزير خواجه اصف خبرو ته په غبرګون کې ویلي، چې « د تاسف ځای دی، چې د پاکستان لوړپوړي چارواکي دغه ډول څرګندونې کوي.»
نوموړي د پاکستاني طالبانو د تحریک د انتقال اړوند له پاکستان نه د لس میلیارده روپیو اخیستلو خبرې هم رد کړې دي.
د جیو نیوز ټلویزیون مشهور ویاند حامد میر د چارشنبې په ورځ له خواجه اصف سره د خپلې مرکې یوه برخه خپره کړې.
په دې مرکه کې د پاکستان د دفاع وزیر ويلي و: « وروسته له دې چې طالبان واک ته ورسېدل، زه افغانستان ته لاړم او د طالبانو له دفاع وزیر او د هغوی له نورو مشرانو سره مې وکتل. ما دوی ته وویل چې که ترهګر متوقف نه شي، موږ به اقدام وکړو او باید وروسته شکایت ونه کړئ.»
پاکستان له دریو کلونو راهیسې لږ تر لږه دوه ځله د افغانستان اوسنۍ سرحدي سیمې بمباري کړې دي.
دغه هېواد ویلي، چې د بریدونو موخه د تحریک طالبان پاکستان غړي دي چې په دغو سیمو کې پناه ځایونه لري، خو افغان طالبان د پاکستان دا ډول کړنې د یوه بل هېواد پر حریم تېری بولی او په غبرګون کې يې د ورته بریدونو ګواښونه کړي.
د پاکستاني طالبانو تحریک په یوه اعلامیه کې ویلي چې په تېر ۲۰۲۴ کال کې یې په پاکستان کې ۱۷۵۸ بریدونه کړي چې له امله یې ۱۲۸۴ پاکستاني سرتېري وژل شوي او ۱۶۶۱ نور ټپیان دي. ټي ټي پي زیاتوي چې په دغو بریدونو کې یې د پوځي ودانیو تر څنګ ګڼ وسایط ویجاړ کړي دي.
د پاکستاني طالبانو تحریک نن چارشنبه (د جنوري لومړۍ) په یوه اعلامیه کې ویلي چې پر پاکستاني امنیتي ځواکونو د خپلو بریدونو په ترڅ کې یې د تېر ۲۰۲۴ کال په جنوري کې ۷۵، فېبروري کې ۶۵، مارچ کې ۶۶، اپریل کې ۹۶، می کې ۹۹، جون کې ۹۶، جولای کې ۱۴۶، اګسټ کې ۲۴۳، سپتمبر کې ۲۶۲، اکټوبر کې ۲۲۰، نومبر کې ۲۰۸ او ډسمبر کې ۱۸۲ بریدونه کړي دي.
اعلامیه زیاتوي چې دوی په ۲۰۲۴ کال کې په دیره اسماعیل خان، جنوبي وزیرستان، ټانک، بنو، شمالي وزیرستان، لکي مروت، پېښور، خیبر ولسوالۍ، مومند ولسوالۍ، نوښار، چارسده، ملاکنډ، باجوړ، کوز دیر، لوړ دیر، سوات، چترال، شانګله، بونیر، کوهاټ، کورمه ولسوالۍ، کرک، هنګو، اوکرزیو ولسوالۍ، مردان، صوابۍ، پښین، قلعه عبدالله، چمن، جنوبي پنجاب، دېره غازي خان، میانوالي، لاهور، ژوب، قلعه سیف الله، شیراڼيو، ګلګت بلتستان، دیامر، کراچۍ، کلات او مکران، راولپېنډۍ، بټګرام او هرنای کې بریدونه کړي دي.
د پاکستاني طالبانو تحریک وايي چې پر پاکستاني امنیتي ځواکونو یې د چریکي حملو تر څنګ ډله ییز بریدونه، ځانمرګي بریدونه، د توغندیو بریدونه او هدفي بریدونه کړي دي.
اعلامیه کاږي چې په تېر کال کې پاکستاني طالبانو پر پاکستاني امنیتي ځواکونو ۱۹ ځانمرګي بریدونه هم کړي دي.
ټي ټي پي ادعا کړې چې په وژل شویو کې ۱۴۴۱ پوځیان، ۸۲۰ د پولیسو او ترهګرۍ ضد څانګې غړي، ۵۷۸ د استخباراتي ادارو غړي او ۱۰۶ د امن کمېټې غړي شامل دي.
ټي ټي پي وايي چې په دغو بریدونو کې یې پر ۱۵ پوځي ودانیو سربېره د پوځ او پولیسو موټر او ټانکونه هم ویجاړ کړي دي.
ټي ټي پي زیاتوي چې په تېر کال کې یې لسګونه میله وسله او مهمات هم له پاکستاني امنیتي ځواکونو نیولي دي.
۲۰۲۴ د پاکستان لپاره خونړی کال
ټي ټي پي دا ادعا په داسې مهال کوي، چې په ۲۰۲۴ کال کې پاکستان د خپلو وروستیو کلونو تر ټولو مرګونی کال تجربه کړ، چې امنیتي ځواکونو، ملکي وګړو او جنګیالیوته پکې درنده مرګ ژوبله اوښتې ده. د پاکستان د څېړنو او امنیتي مطالعاتو مرکز (CRSS) د کلني رپوټ له مخې، په دغه کال کې پاکستان کې له ۲,۵۰۰ څخه زیات کسان وژل شوي.
دا د ۲۰۲۳ کال په پرتله ۶۶ سلنه زیاتوالی ښیي او دغه کال د تېرې یوې لسیزې تر ټولو مرګونی کال ثبتوي.
دغو پېښو په ځانګړې توګه د خیبر پښتونخوااو بلوچستان ایالتونو پر سیمو پراخ اغیز شیندلی؛ چیرې چې ټي ټي پي او بلوڅ بېلتون پالي ډېر فعال دي.
د پاکستان د څېړنو او امنیتي مطالعاتو مرکز د رپوټ له مخې، په ۲۰۲۴ کې ټولټال ۲,۵۴۶ کسان په تاوتریخوالي کې وژل شوي چې ۱,۶۱۲ پکې ملکي وګړي او امنیتي سرتېري دي، چې دا د ټولو مرګونو ۶۳ سلنه برخه جوړوي.
په دغه کال کې د امنیتي ځواکونو په عملیاتو کې۹۳۴ تنه وسله وال جنګیالي او مجرمان وژل شوي. دغه نابرابري ښيي چې تاوتریخوالي ډېر پر ملکي وګړو او امنیتي ځواکونو اغېز کړی. د رپوټ له مخې، په۲۰۲۴ کال کې په اوسط ډول هره ورځ نږدې اوو کسانو د تشدد له امله خپل ژوند له لاسه ورکړی.
په ۲۰۲۴ کال کې د کورمې ولسوالۍ مذهبي تاوتریخوالي۱۸۲ کسان وژلي او ۲۳۴ نور یې ټپيان کړي دي. د زیاتو قربانیانو په ډله کې شیعه پښتانه دي چې ۷۹ یې وژل شوي او ۳۵ ټپیان شوي دي. له سنیانو څخه ۲۱ کسان وژل شوي او ۷۲ ټپیان دي.
د نومبر پر نهمه د کوټې د اورګاډي په یوه تمځای کې چاودنې شاوخوا ۵۹ تنه ووژل چې ګڼ پکې پوځیان وو.
په ټولیز ډول، د مذهبي تاوتریخوالي له امله د قربانیانو شمېر له ۲۰۱۵ څخه تر ۲۰۲۰ پورې ۴۶۷ کسانو ته رسېدلی و، خو په وروستیو څلورو کلونو (۲۰۲۱-۲۰۲۴) کې دغه شمېر ۴۸۷ ته لوړ شوی.
نومبر میاشت د پاکستان لپاره تر ټولو مرګونې میاشت ګڼل شوې ده. په نومبر کې ۱۲۵ بریدونه شوي، ۴۵۰ تنه وژل شوي او ۶۲۵ نور ټپیان دي، چې دا تر ټولو زیات شمېر دی.
خیبر پښتونخوا او بلوچستان ایالتونه د ټولو مرګونو ۹۴ سلنه او د تاوتریخوالي د ټولو پېښو ۸۹سلنه برخه جوړوي. د خیبر پښتونخوا هغه سیمې چې پر ډیورنډ کرښه پرتې دي لکه کورمه، شمالي وزیرستان او خیبر ولسوالۍ تر ټولو ډېرې زیانمنې سیمې ثبت شوې دي.
په دغه کال کې د بلوچستان د مرګونو شمېر له تېرو دریو کلونو (۲۰۲۱-۲۰۲۳) ټولو مرګونو سره برابر ګڼل شوی.
دغه رپوټ زیاتوي چې په ۲۰۲۴ کال کې د پاکستان امنیتي ځواکونو د ضرب عضب له عملیاتو وروسته تر ټولو زیات بریدونه او مرګونه تجربه کړي دي. د یاد رپوټ له مخې، د پاکستان پر امنیتي ځواکونو سږکال ټولټال ۴۴۴ بریدونه شوي او ۶۸۵ تنه ترې وژل شوي، چې دا له۲۰۱۵ کال شمېرو ډېر دي.
دغه را ز رپوټ وايي، چې له ۲۰۲۱ کال وروسته تاوتریخوالی هرکال ۳۸ سلنه ډېر شوی دی.
د خیبر پښتونخوا ایالت د کورمې ولسوالۍ شيعه او سني قبیلو د سولې تړون لاسلیک کړ چې دواړو اړخونو پرې لاسلیکونه کړي. په دغه تړون کې دواړو خواوو ژمنه کړې، چې وسلې به ټولوي او د سولې مخربو کسانو ته په ځای نه ور کوي.
د خیبر پښتونخوا ایالت په کورمه ولسوالۍ کې د اوږدمهاله فرقه يي شخړو د حل لپاره هڅې د یوه تړون له لارې پایلې ته ورسېدې. دا تړون، چې د ۲۰۰۸ کال د مری تړون بیا تازه کول دي، د دې بېثباته سیمې تاوتریخوالي او کډوالۍ ته د پای ټکي اېښودو ژمنه کوي.
د دغه نوي تړون اعلان له هغو څو اونیزو مشورو او خبرو اترو وروسته کیږي، چې د کوهاټ او د پېښور ایالتي حکومت په ملاتړ ترسره کېدې.
د کورمې ولسوالي، چې ډیورنډ کرښې ته څېرمه پرته ده، له اوږدې مودې راهیسې د فرقهيي تاوتریخوالي او د ځمکې پر سر شخړو ښکار ده. سره له دې چې پخوا ګڼ شمېر تړونونه د دغو ستونزو د حل لپاره ترسره شوي، د دې تړونونو په پلیتابه کې بې پامي او د بنسټپالو ډلو کړنې ددې لامل شوې، چې شخړې بېرته تازه شي. اوس نوی تړون په دې تمرکز کوي چې دغه شخړې د داسې پرمختللو لارو چارو په مرسته حل کړي چې د قبايلي سيمو له اداري او قانوني نظام سره برابرې وي.
په تېرو څو ورځو کې د اهل تشیع او اهل سنت دواړو قومونو استازي، حکومتي چارواکي او د کورمې د سولې جرګې غړي په پاړاچنار کې سره راټول شول. دې جرګې، چې تر سختو امنیتي تدابیرو لاندې یې ناستې وکړې، د سړکونو امنیت، ځمکنیو شخړو، بېځایه شویو خلکو د بیا مېشتېدو او د وسلو د کنټرول په شمول د کلیدي مسایلو په اړه پرېکړې وکړې.
حکومتي چارواکو د ټولو اړخونو ترمنځ د همکارۍ پر اړتیا ټینګار کړی، چې دا تړون بریالی کړي.
د تړون بنسټیزې پرېکړې
د مري دغه نوی شوی تړون د پخوانیو تړونونو اساسي اصول، لکه د قومي دودونو، ځمکو ثبت او پخوانیو پرېکړو خوندیتوب، تصدیقوي. دا عناصر د کورمې د ټولنیز جوړښت د ساتنې لپاره اړین ګڼل کېږي، ځکه قومي دودونه لا هم په دې سیمه کې مهم رول لوبوي.
دغه راز، په تړون کې نوي تدابیر شامل دي چې دغه دودونه د فاټا له ادغام وروسته له قانوني چوکاټ سره سم عیار کړي.
د سړکونو امنیت او د بې ځایه شویو میشتول
د تړون یو اصلي هدف دا دی چې د حکومتي سړکونو خوندي او بېخنډه کارونې ډاډ ورکړل شي. دغه لارې به، چې زیاتره د شخړو او بندیزونو ځای ګرځېدلې دي، د دواړو خواوو له لوري له هر ډول سرغړونو خوندي وي.
د سولې کلیوالي کمیټې به د دغو سړکونو امنیت څاري او د ناوړه پېښو په صورت کې به په قبایلي او دولتي قوانینو عمل کېږي. سربېره پر دې، که هر څوک د تشدد د ترسره کولو لپاره خلکو ته پناه ورکړي، هغوی به د دود او قانون له مخې مجرم ګڼل کېږي.
په دغه تړون کې د هغو خلکو د بیا مېشتېدو ژمنه شوې چې د کلونو شخړو له امله بېځایه شوي دي. د دې پروسې څارنه به د کورمې مرستیال کمشنر تر مشرتابه لاندې یوه ځانګړې کمیټه کوي، چې په دې کې به د دواړو فرقهيي ډلو استازي شامل وي. د کمیټې دنده به دا وي چې د بیا مېشتېدنې پر وړاندې ټولې ستونزې او اندېښنې حل کړي.
په کورمه کې به د ځمکو پر سر شخړې، چې تل د تاوتریخوالي یو لوی عامل دی، د ځمکو د ثبت، قانوني پرېکړو او قومي دودونو پر بنسټ حل شي. د ځمکو د عوایدو کمېسیون به ژر تر ژره په دې اړه خپل کار پیل کړي او د اړتيا په صورت کې به د سولې کمیټې او د ولسوالۍ اداره د هغوی ملاتړ وکړي.
د ګیډو، پیو، علیزیو، بالش خېل، ډندر، بوشهر، غوزګړي، نسیکوټ، سبج علیزي، شور سیمو د ځمکو شخړې به د ځمکو د ټاکلي کمیسیون له لارې اواریږي. پر هغو سیمو چې د قانون ۱۴۴ مه ماده پلي شوې، دواړې خواوې به پرې عمل کوي.
د وسلو پر کارولو بندیز
په تړون کې د وسلو پر ازادانه ګرځولو او کارولو بشپړ بندیز لګول شوی، ځکه وسلو د دې سیمې تاوتریخوالی سخت کړی دی. دواړه اړخونه موافق شوي چې د وسلو د کنټرول لپاره به په ۱۵ ورځو کې دننه یو جامع پلان وړاندې کړي. که په ټاکلي وخت کې کوم اړخ ناکام شو، نو د حکومت اپیکس کمیټه به خپله پرېکړه پلې کوي.
په تړون کې د ټولنیزو اصلاحاتو لپاره هم تدابیر نیول شوي دي.
د دولتي مامورینو د خوندي تګ راتګ لپاره د سیمې قومي مشران ژمن شوي، چې د هغوی ساتنه به د مېلمه په توګه کوي. دغه راز، د فرقه يي کرکې د ختمولو لپاره پر هغو ډلو بندیز لګول شوی چې د تاوتریخوالي لپاره هڅوونکي نظریات خپروي.
په دې ډلو کې د زینبیون او سني سختدریځه ډلو په څېر پاروونکو ډلو پر فعالیتونو بندیز هم شاملیږي.
ټولنیزې رسنۍ به هم څارل کېږي او د تشدد هڅوونکي کسان به د قانون له مخې مجازات کیږي.
له تړون وروسته هیڅ اړخ د بل اړخ خلاف وسلې نه شي کارولای او که دا کار وکړي، د سرغړوونکي په توګه به ورسره عمل کیږي او ټولې وسلې به ترې اخستل کیږي او ټاکلې جریمه به ور کوي.
تړون دغه راز وايي، چې د مورچلو له ړنګولو وروسته چې کوم اړخ پر بل اړخ برید کوي، حکومت به یې ترهګر ګڼي او د هغوی خلاف به ګام اخلي.
دغه راز ویل شوي، چې د تړون د عملي کېدو لپاره به د ولسوالۍ اداره او د سولې کمیټې له قانون نافذوونکو ادارو سره په ګډه کار کوي او هر ډول سرغړونه به د قومي دودونو او قانوني اقداماتو له لارې حل کیږي.
د سیمې قومي مشران او د کورمې امن جرګه متعهد شوي، چې د تاوتریخوالي د بیا پېښېدو مخه ونیسي او د سولې ټینګښت ته دوام ورکړي.
دغه تړون په داسې حال کې لاسلیک کیږي، چې کورمه ولسوالۍ په تېرو څو میاشتو کې د خونړیو پېښو او مرګونو شاهده وه.
د افغانستان لپاره د پاکستان ځانګړی استازی محمدصادق خان وايي، چې د پاکستان بهرنیو چارو وزارت د خپلو سفيرانو په کلنۍ غونډه کې د دغه هېواد د بهرنۍ پاليسۍ د لومړيتوبونو په اړه بحث کړی. نوموړي ويلي، چې دغه مجلس د پاکستان د بهرنيو چارو د وزير محمداسحاق ډار په مشرۍ تر سره شو.
د پاکستان د بهرنیو چارو وزارت په یوه خبرپاڼه کې ویلي، چې سفیرانو په دې ناسته کې د سیمه ییزو او نړیوالو پرمختګونو په اړه خپلې ارزونې او نظریات شریک کړل او د ۲۰۲۵ کال او راتلونکو کلونو لپاره یې د پاکستان د بهرني سیاست د لومړیتوبونو په اړه خپل نظرونه وړاندې کړل.
په دې ناسته کې د پاکستان د بهرنیو چارو وزارت ویاندې امنه بلوچ، د بهرنیو چارو وزارت رییسانو او مامورانو ګډون کړی و.
د خبرپاڼې له مخې، اسحاق ډار په خپله پرانېستونکې وینا کې د یوه خوځند بهرني سیاست د لیدلوري په اړه خبرې وکړې چې په دواړو دوه اړخیزو او څو اړخیزو اړخونو کې فعال وي. هغه د پاکستان د نړیوالو اړیکو د پیاوړتیا په برخه کې سفیرانو ته وړاندیز کړی، چې د پاکستان نړیواله څېره لا پراخه کړي او له نړیوالو شریکانو سره یې اړیکې پیاوړې کړي.
خبرپاڼه وايي، دا غونډه د پاکستان د سفیرانو د کلنۍ غونډې یوه برخه ده چې هدف یې د بهرني سیاست د مختلفو اړخونو بیاکتنه او د اغیزناک پلیتابه په اړه مشورې کول دي.
د افغانستان لپاره د پاکستان ځانګړي استازي محمدصادق خان هم پر خپله اېکس پاڼه ليکلي، چې د پاکستان د سفيرانو د مهمو څو اړخيزو او دوه اړخيزو هدفونو اړوند ناسته کې يې ګډون کړی.
دا کابل ته له سفر وروسته څوومه ناسته ده چې محمد صادق پکې ګډون کوي.
نوموړي لیکلي، چې په دې ناسته کې په ۲۰۲۵ کال کې د سيمه ييزو او نړيوالو پرمختګونو، پاليسیو د لومړيتوبونو او د خپلو چارو د ارزونې اړوند بحثونه وشول.
صادق خان ويلي، چې په دې ناسته کې د بهرنۍ تګلارې د مختلفو اړخونو پر همغږۍ او تطبیق هم ټينګار وشو.
