د طالبانو سوداګرۍ وزارت وایي، چې د افغانستان غالۍ د ترکیې په نړیوال نندارتون کې نندارې ته وړاندې شوې. طالبان وايي چې ددې ډلې د سوداګرۍ وزارت د استازي او ترکیه کې د طالبانو د سفارت د مسولینو په ګډون د غالیو نړیوال نندارتون پرانیستل شو.
د طالبانو د سوداګرۍ او صنایعو وزارت نن سې شنبه «د مرغومي ۱۸مه» پر خپل اېکس د ترکیې په استانبول ښار کې د غالیو نړیوال نندارتون کې نندارې ته د افغان غالیو د وړاندې کولو خبر ورکړ.
په دغه نندارتون کې د ګډون هدف په نړيوال بازار کې د افغانستان غالیو ته بازار موندل ښودل شوي دي.
د طالبانو د سوداګرۍ وزارت وايي چې د افغانستان اتو شرکتونو هم په دغه نندارتون کې خپل محصولات نندارې ته وړاندې کړي.
دوی زیاتوي چې په دغه نندارتون کې به د ۱۹ هېوادونو لاسي او ماشیني غالۍ د څلورو ورځو لپاره نندارې ته کېښودل شي.
د نړۍ په بازارونو کې افغان غالۍ په لسګونه زره ډالرو پلورل کېږي خو غالۍ اوبدونکو ته یې ایله دومره ګټه رسېږي چې خپلې کورنۍ پرې مړې وساتي.
د طالبانو په واکمنیدو سره له افغانستان څخه بهرنیو هېوادونو ته د غالیو د لېږد بهیر هم ټکنی شوی چې د غالیو اوبدونکو روزګار هم ورسره یو څه تت شوی دی.
غالۍ د افغانستان له پخوانیو صنعتونو څخه شمېرل کېږی چې شمالي ولایتونه یې د اوبدلو مهمې سیمې بلل کېږي.
