د بایډن اداره له طالبانو سره په خبرو بوخته ده،چې په افغانستان کې نیول شوي امریکایان د ګوانتانامو زندان د یوه لوړپوړي بندي په بدل کې، چې د اسامه بن لادن نږدې ملګری بلل کېږي، خوشي کړي. د بایډن ادارې او طالبانو ترمنځ ددې تبادلې خبرې د تېر کال له جولای میاشتې راهیسې روانې دي.
وال سټریټ ژورنال او فاکس نیوز وايي، متحده ایالتونو د نومبر پر۱۴مه طالبانو ته وړاندیز کړی، چې محمد رحیم الافغاني، چې د امریکا حکومت یې د القاعده لوړپوړی غړی ګڼي، خوشی کړي. په بدل کې به د طالبانو واکمنان جورج ګلیزمان، ریان کوربټ او محمود حبیبي خوشي کوي.
محمودحبیبي طالبانو د القاعدې د مشر ایمن الظواهري د وژنې په پېښه کې د ښکیلتیا له امله زنداني کړی.
جو بایډن د نړۍ په مختلفو سیمو کې د نیول شویو امریکایانو د خوشې کولو لپاره هڅې کړې پیل کړې او په تېرو څلورو کلونو کې یې له ۷۰زیات امریکایان خپلو کورونو ته ستانه کړي دي.
د راپورونو له مخې، طالبانو د نومبر د تبادلې وړاندیز ته ځواب ورکړی او غوښتنه یې کړې چې رحیم او د هغه ترڅنګ دوه نور کسان هم خوشې شي چې جورج ګلیزمان او ریان کوربټ ازاد شي.
د وال سټریټ ژورنال د رپوټ له مخې، د امریکا کانګرس د بهرنیو چارو کمېټې غړي د ډسمبر پر۱۷مه د ملي امنیت سلاکار جیک سولیوان سره په یوه محرمه ناسته کې خبر شول چې بایډن لا هم د دې وړاندیز په اړه غور کوي.
د دې غونډې یوه برخهوال وویل چې د غونډې پر مهال د کمېټې مشر، ریپ. مایکل مککال د طالبانو د دې وړاندیز په اړه اندېښنه وښوده او ویې ویل چې دا د امریکا لپاره مناسبه معامله نه ده.
د امریکا د ملي امنیت شورا ویاند شون ساوېت ویلي: « د بایډن-هرېس اداره په بهر کې د امریکایانو د خوندیتوب او امنیت لپاره تر خپلې وسې کار کوي او موږ شپه ورځ کار کوو چې جورج، ریان او محمود خوندي خپلو کورونو ته ستانه کړو.».
