د پاکستان د پوځ لوی درستیز جنرال عاصم منیر د دوشنبې په ورځ د خیبر پښتونخوا ایالت له والي او ددغه ایالت له ملتپالو او مذهبي سیاسي ګوندونو سره په څلورساعته ناسته کې ددغه ایالت پر وروستي امنیت وغږېد. منیر وویل چې په خیبر پښتونخوا کې به استخباراتي عملیات دوام وکړي.
منیر د دوشنبې په ورځ د پښتونخوا د سیاسي مشرانو غونډې ته وویل چې په خیبر پښتونخوا کې به لوی عملیات نه ترسره کېږي، خو استخباراتي عملیات به دوام وکړي.
د استخباراتي عملیاتو څرنګتیا تراوسه رسنیو ته نه ده په ډاګه شوې، خو دغو ګوندونو ته یوې نږدې سرچینې افغانستان انټرنشنل ته وویل چې پوځ په دریو سیمو بنو، لکي مروت او شمالي وزیرستان کې د «احتمالي عملیاتو» لپاره له سیاسي ګوندونو سره پر همغږۍ بوخت دی.
په دغو دریو ولسوالیو کې په دې وروستیو کې د پاکستاني طالبانو فعالیتونه او د پوځ او امنیتي ځواکونو پر پوستو بریدونه ډېر شوي دي.
د منظور پښتین او پښتون ژغورنې غورځنګ په مشرۍ جوړې شوې پښتون قومي جرګې د دوشنبې په ورځ ناوخته وویل، چې « د پاکستان پوځ په پښتون وطن یو ځل بیا پوځي عملیات پيلول غواړي. د پوځ مشر جنرال عاصم منیر نن پېښور ته لاړ او هلته یې د بېلا بېلو ګوندونو له مشرانو سره وکتل. ځینو ګوندونو او مشرانو د پوځ له مشر سره له کتلو انکار وکړ».
پښتون قومي جرګه وايي، پوځ تېر کال په پښتونخوا کې د "عزم استحکام" په نوم عملیات پیلول غوښتل، خو هغه وخت پښتنو د دغو عملیاتو پر وړاندې پاڅونونه او احتجاجونه وکړل چې له امله یې د پوځ پلان وځنډید.
د پېښور په ناسته کې د خیبر پښتونخوا سیاسي مشرتابه د پاکستان له پوځي چارواکو وغوښتل چې د پاکستان د داخلي امنیتي ستونزو د حل لپاره له طالبانو سره اړیکې ټینګې کړي.
د سې شنبې په ورځ د پاکستان ډان ورځپاڼې رپوټ ورکړ، چې د عوامي ملي ګوند، جمعیت علمای اسلام، خلکو ګوند، مسلم لیګ (ن)، جماعت اسلامي او قومي وطن ګوند استازو په غونډه کې ګډون کړی و او ټولو د طالبانو له حکومت سره د رسمي یا غیر رسمي اړیکو د ټینګېدو وړاندیز کړی دی.
په دې ناسته کې سیاسي ګوندونو د ملي عمل پلان د بشپړ پلي کېدو غوښتنه کړې او د اړتیا په صورت کې یې د پلان د بیاکتنې وړاندیز کړی دی.
دوی څرګنده کړې، چې د ګاونډیو هېوادونو ترمنځ همکاري د سیمې په سوله کې مرسته کولای شي.
خو د پوځ لوی درستیز عاصم منیر په ډاګه کړې چې د افغانستان سرپرست حکومت [طالبان] د تېرو اخطارونو پر وړاندې هېڅ اقدام نه دی کړی. د پوځ مشر وویل، «هغوی زموږ خبرې نه مني».
سیاسي مشرانو په ځواب کې ویلي، چې د طالبانو له سرپرست حکومت سره د ستونزو د حل لپاره باید نورې لارې وکارول شي.
ډان وايي، د پاکستان پوځي مشرتابه په ډاګه کړه چې په خیبر پښتونخوا کې نوي پوځي عملیات نه ترسره کېږي خو د استخباراتو پر بنسټ عملیات به ډېر شي. پوځ د امنیت او عملیاتو په تړاو د سیاسي ګوندونو نظرونه پوښتلي دي.
د پاکستان د پوځ د عامه اړیکو دفتر (ISPR) په یوه خبرپاڼه کې وویل، « سیاسي استازو د وسله والو ځواکونو او د قانون پلي کوونکو ادارو د ترهګرۍ ضد جګړې ملاتړ څرګند کړ او پر دې سلا شول چې د ترهګرو ډلو د سختدریځې فلسفې پر وړاندې له سیاسي رنګونو هاخوا یو موټی دریځ اړین دی».
نوموړي ير اېکس پاڼه د ځینو کډو د تصویر په خپرولو سره لیکلي، بې ګناه ملکي وګړي د جګړې په اور کې د سوځېدو له وېرې، خپل کورونه او ژوند پرېږدي.
هغه په دې اړه د اندېښنې په څرګندونو سره لیکلي: د «طالبانو پروژې موږ په یوې تل پاتې جګړې محکوم کړي یو.»
د شمالي وزیرستان په میرعلي ولسوالۍ کې له تېرې یوې میاشتې راهیسې یو شمېر کورنۍ د جګړو او تاوتریخوالي زیاتېدو له وېرې د خپلو مېنو پرېښودو ته اړ ایسنل شوې دي.
د سیمې خلک وايي، چې پوځ او وسله وال دواړه ورته د سیمې پرېښودو خبرداري ورکوي او کډې کولو ته یې اړباسي.
په سیمه کې خبریالان وایي، چې هره ورځ له دغې سیمې له لسو تر شلو کورنیو خپلې مېنې پرېږدي.
د میرعلي اوسېدونکي له ډېرې مودې راهیسې په دغه سیمه کې د ناسم امنیتي وضعیت له امله له دغې سیمې کډه کولو ته اړ شوي دي.
ځایي خلک بیا وایي، چې د شپې لهخوا وضعیت تر دې حده ناکراره شوی چې ان پولیس ګزمې ته نه شي را وتلای.