د طالبانو د ټولګټو چارو وزارت وايي، چې له ایرانه د خواف ـ هرات د اوسپنې پټلۍ له لارې په درې اورګاډو کې درې زره او ۳۶۴ میټریک ټنه سوداګریز توکي هرات ته رسېدلي دي. د دغه وزارت ویاند وايي، چې په دغو اورګاډو کې ساختماني توکي افغانستان ته وارد شوي.
د طالبانو د ټولګټو چارو وزارت نن پنجشنبه د (مرغومي ۲۷مه) د یوې خبرپاڼې په خپرولو سره ویلي، چې له ایران څخه د خواف ـ هرات د اوسپنې پټلۍ له لارې په درې اورګاډو کې درې زره او ۳۶۴ میټریک ټنه سوداګریز توکي هرات ته رسېدلي دي.
دغه وزارت وايي، دغه توکي د افغانستان د هرات ولایت د روزنک تمځای ته رسیدلي دي.
د وزارت په خبرپاڼه کې راغلي، چې دغه سوداګریز توکي له ایرانه د خواف ـ هرات اوسپنيزې کرښې له لارې په ۵۳ واگوني درې جلا، جلا قطارونو کې افغانستان ته راورسيدل.
وزارت وايي، له دې جملې په ټولیزه توګه ۳۸ واګونونه په دوه قطارونو کې، چې ټولټال (۲۴۰۴) مټريک ټنه وزن لري، تیره شپه او يو ۱۵ واگوني قطار، چې ټولټال ۹۶۰ مټريک ټنه وزن لري د روانې مرغومي مياشتې په ۲۵مه نېټه د هرات ولایت روزنک تمځای ته رسېدلي دي.
طالبان وايي، چې په دې وروستیو کې ځکه د خواف ـ هرات اوسپنيزې کرښې له لارې له ايران سره د سوداګريزو توکو د انتقالاتو کچه لوړيږي، چې د يادې لارې د څلورمې قطعې د لومړۍ برخې رغنيزې چارې ۸۰ سلنه بشپړې شوې او په نږدې راتلونکې کې به دغه چارې بشپړې شي.
