سنډې ګارډین ورځپاڼې راپور ورکړی، چې طالبان پلان لري هند کې د افغانستان سفارت ته درې نور ډیپلوماتان ولېږي او ښايي د دغه سفارت چارې خپلې کړي. د طالبانو د لومړۍ سیاسي څانګې مرستیال محمد نعیم نعمان، د وزارت د تفتیش څانګې غړي معصوم عاصم او صفی الله جبارخیل به ډیر ژر ډیلي ته لاړ شي.
ورځپاڼې د یکشنبې په ورځ د "باوري سرچینو" په حواله راپور ورکړ چې "د ډیلي او طالبانو ترمنځ د ژورو اړیکو په درشل کې چې د هند د اوږدې مودې سیال پاکستان په ګډون د نورو سیمه ییزو لوبغاړو لپاره یې اندېښنې رامنځته کړی، طالبان چمتو دي چې د ډیلي سفارت ته درې نور ډېپلوماتان ولېږي."
ورځپاڼې ویلي چې په ممبۍ کې د افغانستان په کونسلګرۍ کې د طالبانو د استازي په توګه د اکرام الدین کامل ټاکل کېدو داسې ګنګوسې راپورته کړې چې درې نور ډیپلوماتان به هم ډېر ژر ډیلي ته ولېږل شي.
اوس، باخبره سرچېنو سنډې ګارډین ته وویل چې د طالبانو د بهرنیو چارو وزارت د لومړۍ سیاسي څانګې مرستیال محمد نعیم نعمان او د وزارت د تفتیش څانګې غړي معصوم عاصم او صفي الله جبارخیل به ډیر ژر ډیلي ته ولیږل شي او احتمال لري چې د افغانستان د سفارت مسؤلیت په غاړه واخلي.
د سنډې ګارډین ورځپاڼې د راپور له مخې، په ډیلي کې د افغانستان د سفارت چارې اوس د سید محمد ابراهیم خیل لخوا اداره کیږي.
تېر کال راپورونه خپار شول چې د سهیل شاهین د زوی نجیب شاهین په ګډون درې نور کسان به نوي ډیلي ته ولېږل شي.
خو، باخبره سرچینو وویل چې "د هغه نوم له لیست لرې شوی او درې نوي کسان یې پر ځای ټاکل شوي دي خو په راتلونکي کې د هغه د ټاکل کېدو امکان په بشپړه توګه رد شوی نه دی.
طالبانو او د هند د بهرنیو چارو وزارت تر اوسه په دې خبر تبصره نه ده کړې.
خو دا ګام له هغه وروسته دی چې هند د بهرنیو چارو وزارت مرستیال وزیر د روانې میاشتې په پیل کې د متحده عربي اماراتو په دوبۍ کې د طالبانو د بهرنیو چارو وزیر سره لیدلي و، چې دا د ۲۰۲۱ کال تر اګسټ میاشتې راوروسته د دواړو لوریو د اړیکو په ډېریدو کې مهم ګام ګڼل کېږي.
ښاغلي ستانکزي نن «د سلواغې ۱مه» د افغانستان او چین ترمنځه ډیپلوماتیکو اړیکو ۷۰مه کلېزې لمانځغونډه کې وویل:« هغه وخت چې افغانستان د لرغوني وخت د اسیا څلور لارې بلل کېدله؛ واخان دره د تمدنونو د نقاطع نقظه ګڼل کېده. د ورېښمو له دې لارې همدغه لومړنیو تجارتي او کلتوري اړیکو د افغانستان او چین د ډېپلوماټیکو اړیکو په تار وپیېل.»
ښاغلی ستانکزی وايي، افغانستان د چین د خلکو انقلاب په داسې وخت کې په رسمیت وپېژاند چې ډېرو کمو هېوادونو په رسمیت پېژندلی و.
دی همدراز زیاتوی افغانستان یو له لومړنیو هېوادونو و، چې په ۱۹۵۵ مېلادي کال یې چین ته سفیر ولېږه او د چین سفیر کابل ته راغلو او سفارت یې پرانیست.
د طالبانو د بهرنیو چارو وزارت دغه لوړ پوړي چارواکي غوښتنه وکړه، چې د طالبانو روانه دوهمه دوره دې د افغانستان او چین تر منځه اوږد مهاله اړیکو د تابیا دورې په نوم شي.
عباس ستانکزي په خپلو خبرو کې وویل چې اوس مهال په دې کار کوي، چې په اوږد مهال کې افغانستان او چین د یو بل سره همکاري او نږدې اړیکې ولري.
عباس ستانکزی:« په داسې حال کې چې افغانستان د دایمي امن او ثبات په لور مزل پېل کړی دی؛ چین یو له هغو همکارانو دی چې پراخه سیاسي او اقتصادي اړیکې له مونږ سره لري.»
د طالبانو د بهرنیو چارو وزارت سیاسي مرستیال وايي چې د دې ډلې بنسټګر ملا عمر په خپل وخت کې د چین استازو ته ډاډ رکړی و، چې د افغانستان خاوره به د هېڅ کوم ګاونډي هېواد پرضد نه کارېږي.
عباس ستانکزی ټینکار کوي چې دوی اوس هم په دې ژمنه ولاړ دي.
طالبان په داسې حال کې د یو متحد چین ملاتړ کوي چې د چین سینګیانګ کې د اویغور او نورو مسلمانو لږکي له دغه هېواد د دین له مخې ازادي غواړي.
د طالبانو د بیا ځلي واک ته رسېدو سره په دغه هېواد کې د القاعدې په کډون ګڼ شمېر وسلوالو ډلو د حضور په اړه د چین په ګډون د ځینو هېوادونو اندېښنې زیاتې شوې دي.
