د طالبانو د هغو معلوماتي اسنادو له مخې چې د هېکرانو یوې انټرنېټي شبکې افشا کړي، ملا هبتالله د دغې ډلې حکومتي ادارو ته امر کړی چې د ده له اجازې پرته هېڅوک د زدهکړو لپاره بهر باید ونه لېږل شي.
د طالبانو مشر چې تر اوسه په عام محضر کې نه دی ښکاره شوی، دغه فرمان د روان کال د «وري په ۱۶مه نېټه صادر کړی» او د هغه لاسلیک هم په دې سند کې لیدل کېږي.
د دغه مکتوب له مخې چې د طالبانو د امر بالمعروف وزارت ته لېږل شوی ملا هبت الله له ادارو غوښتي:« که ستاسو له لوري څوک د زدهکړو، د ظرفیت لوړولو، سیمینار یا نورو زدهکړو لپاره بهر ته استول کېږي؛ نو د هغوی بشپړ معلومات موږ ته د چارو ادارې له لارې راولېږئ او زموږ تر منښتې وروسته به اقدامات ترسره شي.»
تر دې مخکې هم هبتالله اخندزاده حکم ورکړی و، چې پرته له ده د طالبانو هېڅ مقام بهر ته سفر نه شي کولی او له بهرنیو چارواکو سره هم ناستې ولاړې نشي کولای.
د طالبانو دغه افراطي مشر د خپلو پخوانیو فرمانونو له مخې، په هېواد کې پر نجونو د ښوونځیو او پوهنځیو دروازې هم بندې کړې دي.
هغه په کور دننه او بهر د خپلو افراطي فرمانونو له کبله له توندو نیوکو سره مخ دی؛ خو سره له دې یې هم د نجونو او ښځو پر وړاندې په بېلابېلو برخو کې خپلو بندیزونو ته دوام ورکړی دی. پر زدهکړو د بندیزونو او محدودیتونو له کبله نړۍواله ټولنه له طالبانو سره تعامل ته چمتو نه ده.
د طالبانو د بهرنیو چارو مرستیال وزیر عباس ستانکزي پر هبت الله مخامخ د دغو بندیزونو له کبله نیوکې وکړې او د نجونو د زدهکړو پر ضد یې د خپل مشر ټولې پرېکړې وننګوولې.
عباس ستانکزي ته د همدغو څرګندونو له کبله په هېواد کې شپې سختې شوې او د ملا حمدالله له لوري د هغه د نیول کېدو امر سره سملاسي نوموړي له کابله پښې سپکې کړې او متحده عربي اماراتو ته تللی دی.
عباس ستانکزي له طالبانو غوښتي، چې ملا هبت الله ته دې د خدای او پېغمبرۍ درجې نه ورکوي او نه دې هم په پټو سترګو د هغه سختدریځي فرمانونونه مني.
