د فرانسې ولسمشر اېمانویل مکرون وایي، چې د سعودي عربستاان له ولیعهد محمد بن سلمان سره یې د ټلیفوني خبرو پر مهال د روسیې او اوکراین د جګړو او د منځني ختیځ پر پرمختګونو خبرې وکړې.
مکرون په اېکس کې لیکلي: "ما له ولیعهد سره په اوکراین کې د روسیې د جګړې او د هغه رول په اړه خبرې وکړې چې سعودي عربستان کولی شي، د پروسې په مرکز کې د اروپایانو سره د یوې ټینګې او تلپاتې سولې په ټینګښت کې رول ولوبوي،."
د سعودي رسمي خبري اژانس وايي، دواړو مشرانو "د سیمه ییزو او نړۍوالو پرمختګونو په اړه خبرې وکړې او د نړۍوالو پېښو او د امنیت او ثبات د ترلاسه کولو لپاره یې د روانو هڅو په اړه نظرونه تبادله کړل."
تر دې مخکې د منځني ختیځ لپاره د سپینې ماڼۍ ځانګړي استازي سټیو ویټکوف ویلي وو، چې هغه به د یکشنبې په ورځ وروسته له هغه سعودي عربستان ته سفر وکړي، چې د ملي امنیت له سلاکار مایک والټز سره په اوکراین کې د روسیې د جګړې د پای ته رسولو په اړه خبرې وکړي.
مکرون ویلي، چې د سعودي له مشر سره یې د غزې، لبنان او سوریې پر وضعیت هم خبرې کړې دي.
د فرانسې ولسمشر وویل: "د غزې د وضعیت په اړه، زه د عرب لیګ تر څنګ د سعودي عربستان د هڅو ستاینه کوم – دا هغه کار دی چې فرانسه به یې په اروپا کې ملاتړ وکړي."
هغه زیاته کړه: "موږ په لبنان کې د اوربند د موافقې د بشپړ تطبیق، په شمول د اسراییل د بشپړ وتلو په اړه خبرې وکړې."
د نوموړي په وینا: "موږ د سوریې په اړه د پاریس کنفرانس هم تعقیب کړ، د هیلو او ژمنو یوه مهمه شېبه چې په ترڅ کې مو د انتقالي چارواکو او د سوریې د خلکو لپاره خپل ملاتړ او هیلې بیا تایید کړې."
