د پښتونخوا په کورمه کې ځايي پولیسو رسنیو ته ویلي، چې کورمې ته د بار وړونکو لاريو او امنيتي ځواکونو پر کاروان د بريد له کبله د پوليسو په ګډون ۷ کسه وژل شوي او تر ۲۰ زيات ټپيان دي. پوليسو ويلي، چې سيمې ته هوايي ځواک هم رسېدلی او په دې نښته کې دوه وسله وال هم وژل شوي دي.
د پاکستان جیونیوز د راپور له مخې، وسله والو پر هغو بار وړونکو لاريو او امنیتي ځواکونو پر کاروان بريد کړی، چې پاړه چنار ته روان وو.
په راپور کې راغلي، چې په بريد کې ۵ امنيتي سرتيري، یو لارۍ چلوونکی او یو هم ملکي کس او په مقابلو ډزو کې دوه وسله وال وژل شوي دي.
د جیونیوز د خبر له مخې، په دغه بريد کې د پنځو امنیتي سرتېرو او پنځو لارۍ چلوونکو په ګډون تر ۲۰ زيات کسان ټپیان شوي دي.
پوليسو رسنيو ته ويلي، چې تر بريد وروسته یو شمېر کسانو بار وړونکې لارۍ لوټ کړې، چې په زياته اندازه مالي زيان یې هم اړولی.
په تېره مياشت کې هم د پښتونخوا په کورمه کې ځايي پولیسو رسنیو ته ویلي و، چې له ټل دغې سیمې ته د خوراکي، درملو او نورو توکو پر لیږدوونکي کاروان د برید په پایله کې یو سرتیری او شپږ وسله وال وژل شوي وو.
پر دې لار زيات مهال ورته پيښې رامنځ ته کېږي، چې د ځاني زيان تر څنګ مالي زيان هم پيښوي.
