د طالبانو د ویاند مرستیال وايي، د تېر یوه کال په اوږدو کې په افغانستان کې د یوناما دفتر فعالیتونه ګټور نه وو او په خپلو راپورونو کې یې د افغانستان په اړه ناسم انځور وړاندې کړی دی. حمدالله فطرت وايي، یوناما په خپلو راپورونو کې د افغانستان امنیت او پرمختګونه بل ډول تعبیرول.
د طالبانو د ویاند مرستیال د دې ډلې تر واک لاندې ملي ټلویزیون ته وویل، چې د تېر یوه کال پر مهال په افغانستان کې ملګرو ملتونو د سیاسي استازولۍ (یوناما) فعالیتونه ګټور نه وو.
نوموړی وایي:«په افغانستان کې د یوناما ماموریت موثریت نه درلود، په ډیر تاسف سره چې دوی په تېر یوه کال کې په خپلو راپورونو کې د افغانستان د واقعیتونو په تحریفولو او د افغانستان د ناسم تصویر په وړاندې کولو باندې زیات تمرکز درلود او دلته ډیرو وړو پېښو ته یې ډیره هوا ورکوله او په افغانستان کې دغه شته امنیت او پرمختګونه یې په بل ډول تعبیرول».
فطرت وايي، د ملګرو ملتونو په ناستو کې د دې ډلې تر واک لاندې افغانستان په اړه د منفي نظریاتو لامل هم د یوناما ناسم راپورونه وو.
یاد طالب ویاند وايي، « دوی هڅه کوله خلکو ته یو ډول اندېښنه ایجاد کړي او بل کله کله چې د ملګرو ملتونو اړوندو ناستو کې د افغانستان په اړه منفي نظریات خپریږي، په دې کې هم د یوناما د ناسمو راپورونو او تبلیغاتو لوی رول و، د دوی اکثریت راپورونه په ناسمو او غیر درست منابعو ولاړ وو.»
طالبان په داسې حال کې په افغانستان کې د ملګرو ملتونو د سیاسي استازولۍ د فعالیتونو په اړه نیوکه کوي، چې یوناما د جنوري په وروستیو کې د یوه راپور په خپرولو سره په افغانستان کې د بشري حقونو پر وضعیت اندېښنه ښودلې وه.
یوناما په خپل راپور کې ویلي و، چې د طالبانو د فرمانونو له امله د رسنیو په منځپانګه او چارو کې لاسوهنې د رسنیو ازادۍ ته جدي زیان رسولی او د طالبانو له لوري پر زده کړو، کار او عام ژوند د سختو بندیزونو له امله د ښځو او نجونو وضعیت د ناورین حد ته رسېدلی دی.
