طالبانو تېره میاشت ۱۲۴ ټانکره بې کیفیته نفتي توکي بېرته ګرځولي
د طالبانو د مالیې وزارت وايي، په سلواغې میاشت کې یې د ټیټ کیفیته نفتي توکو څه باندې سل ټانکره بېرته مسترد کړي دي. په مستردو شویو نفتي توکو کې تېل او اوبلن ګاز شامل دي.
د طالبانو د مالیې وزارت وايي، په سلواغې میاشت کې یې د ټیټ کیفیته نفتي توکو څه باندې سل ټانکره بېرته مسترد کړي دي. په مستردو شویو نفتي توکو کې تېل او اوبلن ګاز شامل دي.
یاد وزارت د پنجشنبې په ورځ په یوه خبرپاڼه کې وویل، د نفتي موادو د کیفیت او څارنې ریاست، چې د ټاکل شویو معیارونو له مخې هېواد ته د واردېدونکو نفتي موادو کیفیت تثبیتوي، په سلواغه میاشت کې ۱۲۴ ټانکره ټیټ کیفیته وارد شوي نفتي مواد د فراه او نیمروز ولایتونو له ګمرکونو بېرته مسترد کړي دي.
طالبانو ویلي، چې ۸۸ ټانکره ډیزل د فراه له ګمرک څخه، ۳۳ ټانکره ډیزل او درې ټانکره اوبلن ګاز چې د کیفیت له پلوه یې معیار ټیټ و، د نیمروز له ګمرک څخه بېرته مسترد شوي دي.
د طالبانو مالیې وزارت په دې اړه نور جزئیات نه دي ورکړي، چې دغه ټیټ کیفیت لرونکي نفتي مواد د افغان او که د بهرنيو سوداګرو له لوري افغانستان ته وارد شوي، خو وايي، افغانستان ته د ټیټ کیفیته نفتي موادو واردولو مخنیوی کوي.
طالبانو دا نه ده روښانه کړې، چې دغه ټیټ کیفیت لرونکي نفتي مواد له کوم هېواده وارد شوي، خو له دې وړاندې د دې ډلې تر واک لاندې د سټنډرډ ملي ادارې ویلي، چې په ټیټ کیفیته تیلو بار سلګونه ټانکره یې بېرته ایران ته ګرځولي دي.
د جرمني حکومت، چې د انتخاباتو له امله یې د افغانانو د سفر بهیر ځنډولی و، يو ځل بيا د هغوی د انتقال لړۍ پيل کړې ده. د سې شنبې په سهار يوه چارتر الوتکه له اسلاماباده برلين ته ورسېده، چې ۱۵۵ افغانان پکې سپاره وو.
د بیلد د رپوټ له مخې، د ۱۵۵ مساپرو له ډلې يوازې پنځه تنه د جرمني پخواني محلي کارکوونکي وو. دغو کسانو تر ۲۰۲۱ کال پورې د جرمني له پوځ (بونډسوېهر) او د اقتصادي همکارۍ او پراختیا وزارت سره کار کاوه. دوی د خپلو کورنیو له۲۲غړو سره یو ځای سفر کړی.
په دې الوتکه کې ۸۰ ښځې او ۶۱ کوچنيان هم وو، چې له دې جملې ۴۲ یې له لسو کلونو کم عمر درلود. همدارنګه، د بشري حقونو فعالان، يوه ښځينه پوليسه، نور پخواني دولتي کارکوونکي او يو ژورناليست هم په دې الوتکه کې شامل وو.
خو برلين ته له رسېدو سره سم د دریو افغانانو پر ضد د جرمني فدرالي پوليسو دوسیې ثبت کړې. لامل یې دا و، چې دوی له «پراکسي»پاسپورټونو سره راغلي وو، چې طالبانو ورته صادر کړي او دا ډول اسناد په جرمني کې په رسمیت نه پېژندل کیږي. پراکسي پاسپورټونه ډېری د شخص له حضور او غوښتنې پرته صادریږي.
د جرمني د کډوالو د فدرالي ادارې یوه کارکوونکي وویل، چې د هر مساپر دوسیه مخکې تر مخکې ارزول شوې. هغه بیلد ورځپاڼې ته وویل، « یوازې هغه هغه مهال چې بامف دې پایلې ته ورسېږي، چې دغه کس له تعقیب سره مخ دی، نو د ویزې پروسه او د امنیتي ارزونې بهیر ترسره کېږي. که کوم شک موجود وي، نو ویزه نه ورکول کېږي».
د افغانانو هوايي انتقال انالینا بیربوک لاسلیکوي
د مسیحي دیموکرات اتحادیې د پارلمان د کورنیو چارو ویاند الیکساندر ټرو هم د افغانانو د منلو پر پرېکړه نیوکه کړې او وايي، په دې کې ټول مسوولیت د زرغون ګوند پرغاړه دی.
هغه د جرمني له انلاین فوکس سره په خبرو کې وویل، « د افغانانو هوايي انتقال د بهرنیو چارو وزیره انالینا بیربوک لاسلیکوي».
نوموړي وویل، « داسې ښکاري چې زرغون ګوند غواړي له فدرالي حکومت نه تر وتلو وړاندې په وروستیو شېبو کې د افغانانو تر ټولو زیات شمېر جرمني ته راولي. دا د زرغون ګوند یوه جدي تېروتنه ده».
د جرمني د زاکسن ایالت د کورنیو چارو وزیر ارمین شوستر د افغانانو د راتګ پر دوام سختې نیوکې کړې دي.
نوموړي وویل، « موږ ایالتونو وار دمخه څو ځله د دغه پروګرام د سملاسي بندولو غوښتنه کړې ده».
هغه د جرمني پر حکومت تور پورې کړ، چې له انتخاباتو مخکې یې د دې الوتنو درول یو« رسنیز حرکت» و، خو له انتخاباتو وروسته یې بېرته پيل کړل.
د جرمني د کورنیو چارو وزارت له انتخاباتو مخکې د افغانانو د انتقال دوه چارتر الوتنې لغوه کړې. که څه هم رسمي دلیل لوژستیکي ستونزې وښودل شوې، خو د ډيپلوماټیکو سرچینو له مخې، دا یو انتخاباتي تاکتیک ښکارېده ځکه د جرمني په وروستیو جنايي پېښو کې د څو افغانانو د ښکیلتیا له امله د کورنیو چارو وزیره نانسي فیزر تر سخت فشار لاندې وه.
د افغانانو پر انتقال نیوکې ناسمې دي
خو د شنه ګوند پخوانی رییس امید نوريپور د افغانانو د منلو پر پروګرام نیوکې ناوړه او ناسمې بولي.
هغه پر اتحاديې(سي ډي یو) ګوندتور پورې کړ، چې د طالبانو له واکمنېدو مخکې یې د جرمني ځواکونو د افغان محلي کارکوونکو د خونديتابه هڅه نه وه کړې. نوموړي له ویلت تلویزیون سره په خبرو کې وویل، « موږ د هغو خلکو په اړه خبرې کوو، چې له بوندیس ویهر سره یې مرسته کړې ده او د افغانستان په تر ټولو سختو شرایطو کې یې د جرمني خلکو ته خدمت کړی، نو دا خلک اوس په خطر کې دي».
د واکمن ایس پي ډي د پارلماني ډلې مرستیال ډیرک ویسه هم د افغانانو د انتقال الوتنو د بیا پیل ملاتړ کړی.
هغه ویلت ټلویزیون ته وویل، «ډېر کسان چې اوس جرمني ته راغلي، د جرمني لپاره یې کار کړی».
هغه زیاته کړه، « دې خلکو د افغانستان په کمپونو کې زموږ له ځواکونو سره همکارۍ کړې ده. موږ د هغو کسانو پر وړاندې مسئولیت لرو، چې له بوندیس ویهر سره یې یوځای کې کار کړی، د دې محلي کارکوونکو پرېښودل غلطه لار ده».
په پاکستان کې د افغانانو وضعیت خرابېږي
جرمني ته د افغانانو د لېږد بهیر اوس هره میاشت يوه الوتنه ده. وروستۍ الوتنه د جنورۍ په پای کې شوې وه، چې ۱۴۴ کسان یې انتقال کړل، خو اوس هم شاوخوا ۳۰۰۰ افغانان، چې د جرمني د استوګنې اجازه لري، په اسلاماباد کې انتظار باسي.
دوی ډېر سخت شرایط تجربه کوي، ځکه زیاترو يې خپل ټول ملکيتونه پلورلي او پاکستان ته تښتېدلي. پاکستان هغوی ته یوازې درې میاشتنۍ ویزه ورکړې، خو جرمني ته د انتقال پروسه تر دې ډېره اوږده ده.
پاکستاني حکومت اوس د افغان کډوالو پر ضد اقدامات سخت کړي او اعلان یې کړی، چې څوک قانوني ویزه ونه لري باید د ۲۰۲۵ کال د مارچ تر ۳۱مې له دغه هېواده ووځي. خو د جرمني حکومت ښايي تر دې وخته د ټولو افغانانو انتقال ممکن نه کړي.
د ویلټ د رپوټ له مخې، تر اوسه اووه کسان، چې جرمني ته تلل، بېرته افغانستان ته شړل شوي او شپږ د جرمني په همکارۍ بېرته پاکستان ته راوستل شوي.
د امریکا د دفاع وزیر پیټ هګسټ ویلي، چې پنټاګون د بایډن ادارې لهخوا له افغانستان څخه د «ناکامه وتلو یوه بشپړه ارزونه» ترسره کوي. دغه څرګندونې د ټرمپ ادارې د کابینې تر غونډې مخکې په سپینه ماڼۍ کې وشوې.
هګسټ د چهارشنبې په ورځ د ټرمپ ادارې د کابینې له لومړۍ غونډې وړاندې د واشنګټن ایګزماینر غونډې پر مهال وویل: «موږ د افغانستان څخه په ناکامه توګه د وتلو هر اړخیزه ارزونه کوو او هوډ لرو چې بشپړه حساب ورکوونه وکړو.»
نوموړي زیاته کړه: «موږ د پخوانۍ ادارې سره بشپړ توپیر لرو او په پوره ډول ځواب ویونکي یو.»
په دې غونډه کې د امریکا ولسمشر ډونالډ ټرمپ یو شمېر موارد مطرح کړل، چې د ده په باور د بایډن ادارې لهخوا له افغانستان څخه د وتلو پر مهال د ناوړه مدیریت څرګندونه کوي. هغه یو ځل بیا یادونه وکړه، چې په افغانستان کې د میلیاردونو ډالرو پوځي تجهیزات پرېښودل شوي دی.
ټرمپ ټینګار وکړ، چې هګسټ ته به لارښوونه ونه کړي، چې څه وکړي خو که پرېکړه له ده سره وای، نو ټول هغه پوځي مشران به یې له دندو لرې کړي وای، چې د ۲۰۲۱ کال د اګست میاشتې په وتلو کې یې ونډه لرله.
ټرمپ همداراز وویل، چې متحده ایالات باید د بګرام هوايي اډې کنټرول ساتلی وای. هغه اډه چې یو مهال په افغانستان کې تر ټولو لویه امریکايي نظامي اډه وه.
د «هیل مجلې» د راپور له مخې، ټرمپ ادعا وکړه چې دا اډه د امریکا له وتلو وروسته د طالبانو لاس ته ولوېده او بیا د چین د ولسي ازادۍ پوځ کنټرول ته ورغله؛ خو چینايي چارواکو دا ادعا څو ځله رد کړې ده.
د چهارشنبې د ورځې په غونډه کې د هګسټ او ټرمپ څرګندونې د امریکا د دفاع وزارت کې ژور بدلونونه منعکس کړل.
د امریکا ولسمشر او د بهرنیو چارو وزیر تر دې دمه یو شمېر جګپوړي پوځیانو لکه جنرال چارلز کیو براون د ګډو ځواکونو لوی درستیز، ادمیرال لیزا فرانچتي د سمندري ځواکونو د عملیاتو مشره، جنرال جیمز اسلایف د هوايي ځواکونو مرستیال درستیز او د درېیو نظامي څانګو مشاورین له دندو ګوښه کړي دي.
همداراز دفاع وزارت پلان لري، چې په نږدې راتلونکي کې له ۵۰۰۰ څخه ډېر ازمایښتي کارکوونکي له دندو ګوښه کړي.
د ټرمپ له لوري په افغانستان کې د وسله والو پوخي تاسیساتو د بېرته ترلاسه کولو لپاره یو استازی هم ګومارلی شوی او په وار وار یې ګوت څنډنه کې چې له طالبانو به خپلې ټولې پاتې شوې وسلې او تجهیزات بېرته اخلي.
هم مهاله د افغانستان د ځانګړو ځواکونو یوه پخواني قوماندان جنرال سمېع سادات امریکا ته ډاډ ورکړی چې له طالبانو څخه د وسلو او پوځي تجهیزاتو په بېرته اخیستلو کې ورسره هر ډول مرستې ته چمتو دی.
د طالبانو د ریاست الوزرا اقتصادي مرستیال ملا عبدالغني برادر د اهل تشیع «عالي کمیسیون» له لوري په یوې جوړه شوې غونډه کې ویلي، چې سیاسي ګوندونو په افغانستان کې د بې اتفاقۍ تخمونه شیندلي دي. هغه وايي، ناسالمو سیاسي ګوندونو یووالي ته زیان رسولی.
سره له دې چې طالبانو په افغانستان کې سیاسي ګوندونه لغوه کړي او سخت بندیزونه یې پرې لګولي، خو ملا برادر د دغو مخالفتونو په دوام پر سیاسي ګوندونو توندې نیوکې وکړې.
ملا برادر د شیعه مذهبو یادې غونډې ته چې د طالبانو په ملاتړ جوړه شوې په ټینګار سره دا خبره وکړه، چې افغانان په ناسالمه توګه د سیاسي ګوندونو له لوري وېشل شوي او په ملي مسایلو کې کې سره په یو غږ نه دي.
طالبانو په ښکاره توګه په کابل کې پر جمعیت اسلامي، حزب اسلامي او بېلابېلو ګوندونو تر څنګ پر پخواني ولسمشر حامد کرزي هم د سیاسي فعالیتونو سخت بندیزونه لګولي دي. د کرزي او ګلبدین حکمتیار په ګډون بېلابېل سیاستوال اجازه نه لري، چې لویې غونډې وکړي او یا هم د طالبانو ځینې لویې پرېکړې په سیاسي توګه وننګوي.
ملا برادر وايي، افغانستان د ټولو قومونو، ژبو او مذهبونو ګډ کور دی ؛خو پخوانیو حکومتونو له دغې تنوع څخه ناسمه ګټه اخیستې ده.
طالبان بیا د خپلو څرګندونو برعکس د هېواد په بېلابېلو ولایتونو کې شیعه ګان، سلفیان او اسماعیلیان د خپل مذهب د پیروی له کبله ځورولي دي.
د افغانستان انټرنشنل په تازه موندنو کې جوته شوې چې طالبانو په کونړ کې د سلفیانو دیني مدرسې تړلي او د امامانو په ګډون یې د دوی په عامو پیروانو سخت مذهبي بندیزونه لګولي دي.
د راپورونو له مخې طالبانو بیا یو شمېر اسماعیلیان دې ته اړ کړي، چې خپل مذهب بدل کړي او د حنفي مذهب پیروي وکړي.
ملا برادر په دغه ناسته کې شیعه مذهبو ته ویلي، چې طالبان پر قومي، مذهبي او ژبنیو توپیرونو باور نه لري.
ویل کېږي طالبان په دې وروستیو کې د خپلمنځي شخړو او په نړۍ واله کچه د منزوي کیدو له امله پر بېلابېلو مذهبي ډلو او قومونو باندې فشارونه راوړي، څو د دوی په ملاتړ غونډې جوړې کړي.
تر دې دمخه هم بېلابېلو مذهبي ډلو او قومونو د طالبانو د ملاتړ په نامه دا ډول غونډې کړي، چې د راپورونو له مخې لګښتونه یې د طالبانو له لوري ورکړل شوي دي.
تر دې مخکې په څو څو وارې په کابل کې مېشتو شیعه دیني عالمانو نیوکې کړې وې، چې د طالبانو له لوري یې مذهبي ازادۍ محدودې شوې او ان د عاشورا ورځې د نمانځلو لپاره یې پرې سخت بندیزونه لګولي دي.
د راپورونو له مخې په ښوونځیو او دیني مدرسو کې د طالبانو له لوري پر شیعه مذهبو د خپلو دینيکتابونو د لوستو بندیزونه هم لګیدلي دي.
یو شمېر طالب پلوي دیني عالم په کابل او ولایتونو کې په ښکاره توګه د شیعه ګانو تر څنګ د سلفیانو او بېلابېلو مذهبونو پر ضد ویناوې او تبلیغات کوي.
کارپوهان په دې باور دي چې طالبان غواړي د حنفي مذهب سیوری په جبري توګه د هېواد ټولو ولایتونو ته وغځوي او د نورو مذهبونو پیروان هم په زور مجبوري کړي، څو د دوی له مذهبه پیروي وکړي.
په دې وروستیو کې د طالبانو ترمنځ د داخلي اخلافاتو مسایل هم اوج ته رسیدلي، چې په کې د حقاني شکبې او کندهار مېشتي ملا هبتالله د ډلې ترمنځ ناندرۍ اوریدل شوي دي.
د دغو اختلافاتو په یوې پېښه کې د طالبانو د بهرنیو چارو مرستیال وزیر عباس ستانکزی د خپل مشر د فرمانونو پر ضد د څرګندونو له امله اړ شوی چې له هېواده پښې سپکې کړي.
د طالبانو ټولګټو وزارت خبر ورکړی، چې د دغه وزارت د اوسپنې پټلۍ څانګې مرستیال ترکمنستان ته په سفر کې له یاد هېواد سره د ۷ میلیونه ډالرو په ارزښت یو تړون لاسلیک کړی دی.
د طالبانو ټولګټو چارو وزارت په خبرپاڼه کې لیکلي، چې د طالبانو د یاد وزارت مرستیال مولوي محمد اسحاق صاحبزاده د ریل پټلۍ پراختیا په برخه کې له ترکمنستان سره د هرات – تورغونډۍ سټېشن د پراخولو او د اقینې-اندخوی د پاتې لس کیلومېټره پټلۍ د بشپړولو په برخه کې تړون لاسلیک کړی دی.
په خبرپاڼه کې راغلي، چې له ترکمنستان سره د اندخوی- شبرغان ترمنځ د ۵۵ کیلومېټره په اوږدوالي د ریل پټلۍ سروې او ډېزاین تړون هم د طالبانو په دغه سفر کې شوی دی.
د طالبانو د ټولګټور چارو وزارت ویاند محمد اشرف حق شناس ویلي، چې په نږدې راتلونکي کې به پر دغو پروژو کار پیل شي؛ خو کومه ځانګړې نېټه یې نه ده ښودلې.
د طالبانو بېلابېلو پلاویو تر دې دمخه ایران، ازبکستان او ترکیې هېوادونو ته هم د ریل پټلۍ د پراختیا په برخه کې سفرونه کړي خو ویل کېږي، چې کومه مثبته پایله یې نه ده ورکړې. طالبانو په دې وروستیو کې په هرات، کندهار او نیمرزو ولایتونو کې هم د ۲۰۰سوه میلونه افغانیو په ارزښت د ریل پټلۍ د ډیزاین او سروې بېلابېل قرادادونه لاسلیک کړي دي.
له دې سره سره په بلخ کې د حیرتان بندر کې یو شمېر سوداګر نیوکه کوي چې د ریل پټلۍ له لارې له منځنۍ اسیا هېوادونو او روسیې څخه د دوی رالېږدونکو توکي له ځنډ او خنډ سره مخ کېږي او طالبان ترې لوړه مالیه هم اخلي.
همدا راز نیوکې دي چې په یاد بندر کې د طالبانو ګمرک او اړونده ادارې د ریل پټلۍ له لارې راوړونکو توکو څخه په بېلابېلو بهانو بډو اخیستو ته لارې برابروي.
پر طالبان ځینې نیوکې دي، چې دوی یوازې په تبلیغاتي توګه د رغنیز پروژ د پیل کیدو اوازې خپروي؛ خو په عمل کې بیا هاغسې نه دي لکه چې یې وایي.
نن پنجشنبه (د کب ۹مه) د سرتېري له ملي ورځې سره برابره ده. واک ته د طالبانو له رسېدو وړاندې به دغه ورځ د افغانستان په بېلابېلو برخو کې د شانداره غونډو پر جوړېدو سره نمانځل کېده او خلکو به هم سرتېري د ګلونو په ګېډیو نازول.
د طالبانو له واکمنېدو سره په افغانستان کې د پخوانیو سرتېرو ژوند له ګواښونو سره مخ شوی، چې له امله یې پخواني سرتېري اړ شول چې له افغانستانه ګاونډیو هېوادونو ته کډه شي.
تر دې وړاندې د ملي سرتېرو د ملاتړ بنسټ لهخوا افغانستان انټرنشنل سره په شریکو شویو شمېرو کې راغلي و، چې یوازې ایران ته شاوخوا ۱۵۰۰۰ سرتېري له خپلو کورنیو سره کډه شوي دي.
ډېری دغه کډوال د امنیتي ګواښونو اه امله له ویزو پرته په ناقانونه لار ګاونډیو هېوادونو ته ورغلي دي.
د راپورونو له مخې، د طالبانو په واکمنۍ کې د وژل شویو سرتېرو کورنۍ او ماشومان په بد وضعیت کې ژوند کوي او تر ډېره د بشري مرستو په وېش کې هم له دوی سره سلیقوي چلند کېږي.
له بل پلوه بیا په افغانستان کې پاتې سرتېري هم له وزګارتیا سرټکوي.
سرتېري وایي، چې طالبان دوی ته په خپل حکومت کې دندې نه ورکوي او که پوه شي چې دوی پخواني پوځیان دي؛ نو له دوی سره بد چلند کوي.
په افغانستان کې د تېر حکومت پوځیان او کارکوونکي د طالبانو له وېرې تر ډېره د هېواد دننه په پټه ګرځي.
تر دې وړاندې په ننګرهار ولایت کې د طالبانو تر واک لاندې له زندانه افغانستان انټرنشنل - پښتو ته یو شمېر د جمهوري نظام زنداني سرتېرو ویلي و، چې په دغه زندان کې شاوخوا ۲۳۱ د پخواني جمهوري نظام سرتېري او استخباراتي کارکوونکي زندانیان دي؛ خو تر اوسه د طالبانو محکمې ته نه دي وړاندې شوي.
ښایي د طالبانو په نورو زندانونو کې د ورته شمېرو په څېر د پخواني جمهوري نظام سرتېري زنداني وي؛ خو د طالبانو د سختو بندیزونو له امله د دغو بندیانو د شمېرو او وضعیت په اړه معلوماتو ته لاسرسی ستونزمن دی.
د جګړو پرمهال د وژل شویو سرتېرو شمېرې
د افغانستان انټرنشنل د څېړنیز راپور د معلوماتو پر بنسټ؛ د ۲۰۰۱ کال له اکټوبر میاشتې د ۲۰۲۱ کال د اګسټ تر ۱۵مې نېټې پورې په افغانستان کې د جمهوري دولت ۸۶۰۳۵ سرتېري، استخباراتي کارکوونکي او ملاتړي وسلهوال وژل شوي، ۱۱۱۴۸۷ ټپیان شوي او ۱۰۸۵۴ کسان معلول شوي دي.
د افغان سرتېرو د ملاتړ بنسټ بیا افغانستان انټرنشنل ته ویلي و، چې د جمهورت پر مهال د ۲۰۲۱ کال جون میاشتې پورې د ۷۵۵۴۴ وژل شویو او د ۱۴۵۷۸ معلوله سرتېرو شمېرې له دوی سره ثبت شوې دي.
د طالبانو په واکمنۍ کې د وژل شویو سرتېرو شمېرې
که څه هم د جمهوریت له پرځېدو وروسته د طالبانو په واکمنۍ کې د پخوانیو وژل شویو سرتېرو په اړه کره شمېرې په لاس کې نشته؛ خو رسنۍ د سرچینو له مخې وخت نا وخت د پخوانیو سرتېرو د ربړونې او وژنې خبرونه خپروي.
خو د تېر جمهوري حکومت د وسلهوال پوځ ویاند اجمل عمر شینواري تر دې وړاندې ویلي و، چې د طالبانو په درې کلنه واکمنۍ کې د تېر حکومت تر ۳۴۰۰ ډېر امنیتي او دفاعي ځواکونه په شرمناک او مرموز ډول وژل شوي او له اتو زرو ډېر بندیان او ربړول شوي دي.
د ۱۴۰۱ کال په اګسټ میاشت کې یوناما هم د ۸۰۰ پخوانیو سرتېرو د ورکېدو او وژل کېدو راپور خپور کړی و؛ خو د طالبانو ویاند ذبیح الله مجاهد هغه مهال دغه راپور رد کړی و.