د افغانستان پخواني ولسمشر حامد کرزي د کمکي اختر په مناسب هېوادوالو ته د مبارکۍ ترڅنګ ویلي، چې ټولنې له زده کړو پرته پرمختګ نه شي کولی او د نجونو پر وړاندې د زده کړو د مرکزونه بند پاتې کېدل د پرمختګ پر وړاندې ستر خنډ دی.
سعودي عربستان اعلان وکړ، چې په دغه هېواد کې د شوال میاشت لیدل شوې او سبا یکشنبه د کمکي اختر لومړۍ ورځ ده.
هم مهاله د طالبانو حکومت هم د میاشت د لیدلو خبر ورکړ او سبا یې د کمکي اختر لومړۍ ورځ اعلان کړه.
حامد کرزي په خپله فېسبوک پاڼه کې ټولو هېوادوالو ته د کمکي اختر مبارکي ورکړې او ویلي یې دي، چې د يو ملت په توګه باید په پوره اتحاد، اتفاق، ورورگلوۍ او وطنپالنه د خپل هېواد د ابادۍ او پرمختگ لپاره هڅه وکړو.
نوموړي همدا راز ویلي: «روښانه ده چې هېڅ ټولنه بې له علم او زدهکړې ترقۍ او سوکالۍ ته نه رسېږي؛ له همدې امله په تاکيد سره بيا تکراروم، چې د نجونو پر مخ د تعليمي مراکزو بند پاتې کېدل او د ښځو د کار ممانعت د هېواد د ترقۍ لپاره ستر خنډ دی. که غواړو خپلواکه، باعزته، اباد او مترقي و اوسو ضروري ده چې تعليم ته بېړنۍ، اساسي او جدي پاملرنه وکړو او لازمه زمينه ورته برابره کړو څو ددې لرغونې خاورې بچيان (نجونې او هلکان) د خپل علم په وسيله گران هېواد د پردیو له احتياجه خلاص کړي او پر خپلو پښو یې ولاړ له سيالانو سره سيال کړي.»
کرزي د اختر د مبارکۍ ترڅنګ د هېواد له سوداګرو او پانګوالو غوښتي، چې له اړمنو سره د تسليت او مرستې تر څنګ په هېواد کې د پانګونې او کار پيدا کولو مسئلې ته جدي پاملرنه وکړي، ترڅو د خلکو د کار او ژوند اړتياوې تر ډېره حده پوره شي.
دغه پخواني ولسمشر د ملي خبرو اترو په اړه هېله څرګنده کړې او ویلي یې دي: «هیله مند یم چې د کوچني اختر په رارسېدو سره د خدای د رحمت دروازې پر موږ ټولو پرانېستل شي، ترڅو د ملي خبرو اترو له لارې د ټولو افغانانو خیر، سوکالي او سولې او ثبات ته ورسېږي.»
د طالبانو سترې محمکې سبا یک شنبه په هېواد کې د کمکي اختر لومړۍ ورځ اعلان کړه، خو په ټول هېواد کې فقر منګولې لګولي، کاري فرصتونه کم شوي او د بې روزګارۍ له امله هېوادوالو کډوالۍ ته مخه کړې ده اږ هره ورځ زرګونه هېوادوال په مرګونو لارو افغانستان پرېږدي او نورو هېوادنو ته د مزدورۍ لپاره ځي.
افغانان به د کابل په ګډون په ټولو ولایتونو کې د اختر لمونځ په ادا کولو سره اختر پيل کړي.
ګڼو مشرانو بیا د اختر په تړاو سملاسي د مبارکۍ پیغامونه هم خپاره کړي دي.
سږکال اختر په داسې حال کې لمانځل کېږي، چې له تېرو نږدې څلورو کلونو راهیسې زرګونه افغانان کډوال شوي او په ځینو ګاونډیو هېوادونو کې د ژوند سختې شپې او ورځې تېروي.
ناوړه اقتصادي وضعیت، د طالبانو ترمنځ اختلافونه، امنیتي اندېښنې او په بې سارې توګه د کډوالۍ دوام هغه ستونزې او اندېښنې دي، چې افغانان ورسره لاس او ګرېوان دي.
له دغو ټولو ناخوالو سره - سره بیا هم د اختر لمانځل افغانانو ته تر نورو ټولو مراسمو خورا مهم وي او په پراخه توګه یې لمانځي.
د اختر لپاره چمتووالی
کوچني اختر ته د چمتووالي په موخه لسګونه ښځې د «رها» په نوم سینګارتون ته تللې دي.
دغه سینګارتون د کابل په ګډون په اسلام اباد او کاناډا کې د ارایش، د ویښتانو د قیچي کولو، وروځو ټولولو او د پوستي خدمتونو ترڅنګ ډېری د نوکانو د جوړولو په برخو کې فعالیتونه کوي.
معمولا په اخترونو کې د سینګارتونونو ترڅنګ په خیاطانو هم بېروبار وي.
د «عایده بوتیک» مسوولې عایده شاداب چې دغه انځور افغانستان انټرنشنل - پښتو ته لېږلی، وایي چې په وروستیو کلونو کې د افغاني جامو مینه وال زیات شوي، چې له دې سره یې کار و بار هم ډېر ښه شوی.
په هېواد کې یو پخوانی دود دا دی، چې کوژدنو نجونو ته د هلک کورنۍ اختری وروړي.
دا انځور له کابل څخه هغې کورنۍ له افغانستان انټرنشنل - پښتو سره شریک کړی دی، چې د دوی لور ته په دې اختر کې اختری راوړل شوی دی.
دا په شهرنو کې د وچې مېوې یو پلورونځی دی.
هټۍوال وایي، چې ډېری هغه خلک د شهرنو له هټیو وچه مېوه پیري چې اقتصادي وضعیت یې ښه وي، ځکه په دې سیمه کې د وچو مېوو بیې زیاتې وي.
له دې سره، په دې شپو او ورځو کې د هېواد د بېلابېلو برخو په بازارونو کې د خلکو ګڼه ګوڼه هم زیاته وه.
د یو شمېر افغانانو چې اقتصادي وضعیت ډېر ښه نه دی، هغوی بیا د سړک په سر له کراچیو څخه وچه مېوه پیري.
دا چې د اختر په درېیو ورځو کې تر نیمایي زیاتې هټۍ بندې وي، نو ډېری خلک هڅه کوي چې د نورو خریداریو ترڅنګ تازه مېوې او ترکاري هم وپيري.
دا انځور له کابل څخه یوې افغانې لیکوالې چې د روژې تر وروستۍ ورځې پورې یې هره ورځ د قرانکریم ختمونه کړي و، لېږلی دی.
هغه وایي، چې د روژې په وروستۍ ورځ یې پر لسګونو بېوزلو خلکو روژه ماتي کې تیار خواړه وېشلي دي.
سرچیني وايي، چې د کندهار ښار په ګڼه ګوڼه ځایونو کې طالبان له ځانګړي یونیفورم پرته د عامو کسانو په څیر په مخفي ډول څارنه کوي.
طالبانو د شبنې په ورځ ناوخته د هغو ۹ جوماتونو نومونه او ادرسونه اعلان کړل چې سبا به د اختر لمونځ پکې وشي.
ځايي سرچیني وايي، چې طالبانو له اعلان وړاندې هم د ښار د بېلابېلو برخو تر څنګ د هغو جوماتونو په شاوخوا کې کلک امنیتي تدابیر نیولي و، چې ښايي د اختر لمونځ په کې ترسره شي.
ځايي سرچیني وايي، د لوی عیدګاه پر شاوخوا ډیر طالبان ځای پر ځای شوي دي او د جومات شاوخوا کې نقلیه وسایلو پر ګرځیدو باندي بندیز لګول شوی.
دغه سرچیني وايي، چې د لوی عیدګاه جومات ته نږدې ځینې سړکونه د عامو خلکو د تګ راتګ پرمخ هم بند شوي دي.
د طالبانو مشر ملا هبت الله اخندزاده په نورو اخترونو کې د اختر لمونځ لپاره د کندهار ښار لوي عیدګاه جومات ته تلی او خلکو ته یې وینا هم کولې.