د رسنیو د راپورونو له مخې، د کوسټاریکا د کډوالۍ ادارې ویلي، چې دغه هېواد ته له رالېږل شویو هغو کډوالو، چې دوه اوونۍ وړاندې د متحده ایالاتو لهخوا شړل شوي و، د کډوالۍ له پنډغالي تښتېدلي دي.
د کوسټاریکا د کډوالۍ ادارۍ زیاته کړې، چې په تښتېدلیو کډوالو کې دری تنه افغانان، دوه هندیان او یو پاکستانی شامل دي.
د دغې ادارې مشر عمر باډیلا وویل، چې دغه کسان د کیټم له لنډمهالي مرکز څخه تښتېدلي دي.
هغه رسنیو ته په یو لېږل شوي غږیز کلیپ کې زیاته کړې، تښتېدلي کسان قانوني اسناد نه لري او د کډوالۍ پولیسو د دوی د پلټنې خبرتیا هم خپره کړې، چې که چېرې دغه کسان د کوسټاریکا په خاوره کې وي، چې بېرته د کیټم لنډمهالي مرکز ته راستانه شي.
د کیټم لنډمهالي مرکز یوه کارکونکي ټیکو ټایم رسنۍ ته ویلي، چې په دې مرکز کې ورته افغانو نجونو ویلي، دوی له افغانستان څخه ځکه تښتېدلي چې غواړي زده کړې وکړي.
هغې افغانې کډوالې اندېښنه شودلې وه، چې که افغانستان ته په زوره ستنه شي، "طالبان به یې ووژني."
په دې ورستیو کې د غیر قانوني کډوالو پر ضد د امریکا د ولسمشر ټرمپ پالیسۍ له امله ډیرې کډوال له امریکا څخه شړل شوي، چې یوازې ۳۰۰ اسیایي وګړي کوسټاریکا او پاناما ته استول شوي دي.
د هندوستان ټایم د راپور له مخې، په دغه هېواد کې د اور لوبې وسایلو د جوړولو په یوه کارخونه کې د چاودنې او اور لګېدنې له امله تږ تر لږه ۲۱ کارګر وژل شوي دي، خبر زیاتوي چې په دغه فابریکه کې زیات شمېر کارګران له خپلو کورنیو سره یو ځای اوسېدل.
ویل کېږي چې دغه پېښه د هند د ګجرات ایالت په دیسا سیمه کې رامنځته شوې ده.
سیمه ییزو چارواکو رسنیو ته ویلي، چاودنه د اور لوبې د وسایلو په یوه ګودام کې شوې، چې په غیر قانوني ډول یې چارې ترسره کولې.
د چارواکو په وینا، چاودنه دومره زوروره وه چې د کارګرانو د جسدونو ټوټې یې له ۲۰۰ تر ۳۰۰ متره پورې لرې غورځول شوي دي.
یو ځایي اوسېدونکي وویل، چې چاودنې وروسته یې د یوې لحظې لپاره یې فکر وکړ چې الوتکه له اسمانه راپرېوته او یا له اسمان څخه بل څه راوغورځېدلي وي.
په ټولنیزو شبکو کې خپاره شوي د دغې پېښې انځورونه او ویډیوګانې ښيي چې د دغې فابریکې ودانۍ په بشپړه توګه ویجاړه شوې ده.
دا هم لیدل کیږي چې خلک او د ژغورنې کارکونکي د خټو او خاورو لاندې جسدونه راوباسي.
اور لوبه د هند د نیمې وچې په هیوادونو کې په ځانګړې توګه پاکستان او هند کې ډیری مینه وال لري او دوی یې په ګڼو مناسبتونو لکه اختر، کریسمس، هولي، ودونو او نورو جشنونو کې کاریږي.
د ګارډین ورځپاڼې د راپور له مخې، د اسراییل د دفاع وزیر یسرایل کاتز ویلي، چې د دغه هېواد ځواکونه به د غزې نویو سیمو ته ننوځي ترڅو «دغه سیمې له ترهګرو او د دوی له زیربناوو څخه پاکې کړي» او پراخې سیمې به د اسراییل په امنیتي زونونو کې ور زیاتې کړي.
کاټز همدا راز د غزې په اوسېدونکو غږ وکړ، چې د حماس د نسکورولو لپاره اقدام وکړي او ټول یرغمل کړي.
د اسراییل د دفاع وزیر خبرداری ورکړی، چې که حماس د پاتې یرغمل شویو بندیانو له خوشې کولو ډډه وکړي، نو اسراییل به په غزه کې نورې سیمې هم ونیسي او د حماس تر بشپړ له منځه وړلو پورې به جګړه وکړي.
کاتز په یوه ویډیو کې چې د اسراییلي رسنیو لهخوا خپره شوې، وویل: «که حماس خپلې سخت دریځۍ ته دوام ورکړي، نو لوړه بیه به یې پرې کړي.»
هغه زیاته کړې، چې تر هغې به جګړې ته دوام ورکړي چې د دغې ډلې اورپکي او تروریستي سازمانونه له منځه نه وي تللي .
هغه ټینگار وکړ، چې د اسراییل اصلي موخه د ټولو یرغمل شویو بیرته ستنول دي.
دا په داسې حال کې ده چې څو ورځې وړاندې د غزې په شمال کې خلکو لاریون وکړ او د حماس سخت دریځې ډلې پر ضد یې شعارونه ورکړل.
دغو لاریونوالو له اسراییل سره د جګړې د پای ته رسولو غوښتنه کوله.
د غزې خلک، لږترلږه په عامه توګه، اسراییل د ډیرو مرګونو، ویجاړیو او قحطۍ لپاره مسوول بولي، چې جګړه یې تعقیب کړې.
خو ځینې بیا حماس هم پړه بولي، ځکه دغې ډلې د ۲۰۲۳ کال د اکټوبر په اوومه پر اسراییل برید وکړ، چې ۱۲۰۰ کسان یې ووژل او ۲۵۱ کسان یې وتښتول.
د رویټرز خبري اژانس د خبر له مخې، د اوکراین ولسمشر ولادیمیر زیلنسکي وايي، چې هېواد به یې د راتلونکې جمعې په ورځ د «امنیتي تضمین» په توګه په دغه هېواد کې د بهرنیو ځواکونو د ونډې په اړه له یو شمېر هېوادونو سره ژورې خبرې اترې وکړي.
زیلنسکي د جرمني د بهرنیو چارو له وزیر سره په یوه خبري کنفرانس کې وویل، چې د کییف له متحدینو څخه د داسې ځواک د مرستې د چمتووالي په اړه د نورو مفصلو ځوابونو په تمه دی.
د رویټرز په وینا، روسیه د یاد شوي ځواک د چمتوالي اقدام سره سخت مخالفت کوي.
د اوکراین ولسمشر وویل: «موږ به د جمعې په ورځ غونډه وکړو، دغه غونډه به زموږ د پوځي ټیمونو، ځینو هیوادونو او له یوې محدودې حلقې د هېوادونو سره وي، چې په هر شکل کې د امنیتي تضمین په توګه د یوې ډلې ځای پرځای کولو ته چمتو دي.»
ولادیمیر زیلنسکي وویل، چې په دې ځواک کې به ځمکنۍ او هوايي برخې وي، چې په سمندر کې به حضور ولري.
له بلې خوا د امریکا ولسمشر ډونالډ ټرمپ ویلي، چې غواړي په اوکراین کې هغه درې کلنه شخړه پای ته ورسوي، چې په ۲۰۲۲میلادي کال کې د روسیې له بشپړ یرغل سره پیل شوې وه.
واشنګټن تیره اوونۍ د دواړو هیوادونو ترمنځ د یو بل د انرژۍ په زیربنا باندې د بریدونو د پای ته رسولو لپاره منځګړیتوب وکړ.
ورته مهال متحده ایالات د بشپړ اوربند او د سولې د یوې تلپاتې هوکړې هیله لري.
رویټرز خبري اژانس لیکي، سره له دې چې ټرمپ د جګړې د ژر پای ته رسولو ژمنې کوي خو دا تړون ښکاري چې لا نور وخت ته اړتیا لري.
د کییف اروپایی متحدینو لیوالتیا ښودلې چې په یو داسې ځواک کې د سرتیرو برخه واخلي، چې د اوربند له مخې د اوکراین امنیت تضمین کړي او د اوږدې مودې لپاره د دغه هیواد پوځ پیاوړی کړي.
په همدې حال کې د بریتانیا د لومړي وزیر کیېر سټارمر ویاند د دوشنبې په ورځ وویل، چې د بریتانیا، فرانسې او اوکراین پوځي مشران به په راتلونکو ورځو کې سره وګوري، چې د دغه هیواد د امنیت د ټینګولو په هڅو تمرکز وکړي.
د فرنټلاین مجلې د راپور له مخې، ټاکل شوې چې د چهارشنبې په ورځ به د هند مرکزي حکومت چې مشري یې ملتپاله بهارتیا جنتا ګوند کوي، د «وقف» په نوم قانون د دغه هېواد پارلمان ته د بحث لپاره وړاندې کړي.
وقف په هند کې د مسلمانو ټولنو اړوند ملکیتونو او شتمنیو ته ویل کېږي چې د هیڅ کوم فرد ملکیت نه دی او د «وقف قانون» سره سم د مسلمانانو لخوا اداره کیږي.
دا ملکیتونه او شتمنۍ د دوی د مالکانو لهخوا په خیریه او عامه ګټو کې د دایمي کارونې لپاره ورکړل شوي دي.
د نریندرا مودي حکومت د وقف په قانون کې دغه نوی تعدیل، چې لومړی ځل تیر کال معرفي شو، د قانون په نوم د ملکیتونو ثبت، مدیریت او د اوقافو مدیریتي ادارو جوړښت کې د بدلونونو په لټه کې دی.
په هند کې د وقف شویو ملکیتونو ارزښت، چې مساحت یې له ۴۰۵۰۰۰ هکټاره ځمکې څخه زیات دی، له ۱۴ میلیارده ډالرو ډیر اټکل شوی دی.
په دغو ملکیتونو او شتمنیو کې جوماتونه، ښوونځي او تعلیمي ادارې، روغتیایي مرکزونه، کرنیزې ځمکې او یو شمېر سوداګریز تاسیسات شامل دي.
ټاکل شوې، چې د هند د پارلمان غړي د چهارشنبې په ورځ د اتو ساعتونو لپاره د «د وقف قانون د تعدیل» په اړه بحث وکړي او که کومه هوکړه وشي، کیدای شي په پای کې رایې واچول شي.
په دغه قانون کې یو وړاندیز شوی بدلون، چې په پراخه کچه له نیوکو سره مخ شوی، د وقف په رهبرې بورډونو کې د غیر مسلمانانو غړیتوب دی.
د اوسني قانون له مخې، یوازې مسلمانان د وقف بورډ غړي کیدلی شي.
په نوي قانون کې دا وړاندیز هم شوی چې د وقف ځانګړې محکمې واک کم کړي او د اوسني قانون برعکس، دولتي عالي محکمه کولای شي د وقف محکمې پریکړې ننګوي.
په اوسني قانون کې «وقف محکمه» د اوقافو اړوند قضیو په اړه وروستۍ پریکړه کوي.
د هند حکومت استدلال کوي، چې د وقف په قانون کې نوی تعدیل د فساد سره مبارزه، حساب ورکونې او د وقف مدیریتي بنسټونو موثریت تضمینوي.
ډیری هندي مسلمانانو او ځینو سیاسي ګوندونو د مودي حکومت لخوا په وقف قانون کې وړاندیز شوی تعدیل «غیرقانوني» او د اسلامي ټولنې د ګټو خلاف بللی دی.
منتقدین وايي، چې دا تعدیل د وقف په ملکیتونو باندې د حکومت د بې ساري کنټرول لامل کیږي او مسلمانان د دوی له مذهبي ازادیو محروموي.
دوی دغه راز پر حکومت تور پورې کوي، چې د وقف املاکو د غصبولو هڅه کوي.
د هند د واکمن ګوند د پارلماني چارو وزیر کیرن ریجیجو، اپوزیسیون د «بې ګناه مسلمانانو په ګمراه کولو» تورن کړ او ادعا وکړه چې حکومت پلان لري چې د «دوی هدیرې او جوماتونه ونیسي.»
هندي رسنیو د ریجیجو له قوله ویلي، «ځینې وايي، چې دا تعدیل غیرقانوني دی او د وقف مقررات او د هغې احکام د خپلواکۍ څخه مخکې موجود و، نو دا څنګه غیرقانوني کیدلی شي؟»
د اسوشیېټیډ پریس د خبر له مخې، ډیموکراټ سناتور کوري بوکر د امریکا د ولسمشر ډونالډ ټرمپ د سیاستونو په وړاندې د دغه هیواد په سنا مجلس کې ۲۵ ساعته وینا وکړه او د ټرمپ سیاستونه یې د ډیموکراسۍ په وړاندې ګواښونکي وبلل او ویې غندل.
هغه خپله وینا په دې خبره پیل کړه چې «دا زمونږ په هېواد کې د نورو وختونو په څېر عادي وختونه نه دي» او زیاته یې کړه، «موږ باید د امریکا په سنا مجلس کې د عادي وختونو په شان چلند ونه کړو، د امریکا خلکو او امریکایي ډیموکراسۍ ته ګواښونه جدي او بیړني دي، مونږ ټول باید زیاته هڅه وکړو ترڅو یې پر وړاندې ودرېږو.»
بوکر د دوشنبې په ماښام سنا مجلس ته ننوت او ویې ویل، چې تر هغې به هلته پاتې شي چې ترڅو فزیکي توان ولري.
هغه له ۲۵ ساعتونو او ۵ دقیقو وروسته، د ټرمپ د سیاستونو پر ضد خپله وینا پای ته ورسوله او په لړزېدلو قدمونو له سنا مجلس څخه ووت.
هغه د امریکا د سنا مجلس په تاریخ کې د تر ټولو اوږدې او دوامدارې وینا نوی ریکارډ جوړ کړ.
بوکر د خپلې وینا پر مهال د ټرمپ د حکومت د اقداماتو په اړه سختې نیوکې وکړې او د ټولنیزو خدماتو په کمښت او د حکومت د څارنې د نورو اقداماتو په اړه یې اندیښنې څرګندې کړې.
نوموړي د وینا پر مهال یوازې اوبه څښلې او خبریالانو ته یې ویلي، چې د دغې اوږدې وینا د چمتووالي لپاره یې څو ورځې روژه نیولې وه.
د امریکا په سنا مجلس کې د اوږدې ونیا دغه اقدام ته چې فیلیباسټر ویل کېږي، په وروستیو کلونو کې څو ځلې په اوږدمهاله توګه ترسره شوې، خو ریکارډ یې له سناتور استروم ترمونډ سره دی، چې د ۱۹۵۷ د مدني حقونو له قانون سره د مخالفت لپاره ۲۴ ساعته او ۱۸ دقیقې خبرې کړي.
د امریکا په سنا کې د ډیموکراټانو مشر چک شومر وویل، «د بوکر قوت، مقاومت، او وضاحت حیرانونکي دی، او همدا اوس د امریکا ټول خلک د ده خبرې اوري.»
بوکر په خپلو ویناوو کې بېلابېل موضوعات یاد کړي، چې په کې د روسیې او اوکراین جګړه، په بهرنیو هېوادونو کې د امریکا نړۍوالې پراختیایي او مرستندویه مرستې، د بودجې د کمښت په اړه اندېښنې او د ټولنیزو خدمتونو د دفترونو کمول شامل وو.
د سنا غبرګون
ډېموکراتانو د بوکر وینا وستایله او دا یې د ټرمپ د خطرناک سیاست پر وړاندې یو مهم اقدام وباله.
جمهوريپال سناتورانو بیا دا وینا «سیاسي نمایش» وباله او ویې ویل، چې دا یوازې د وخت ضایع کول دي.
د ټرمپ غبرګون
ټرمپ د ښاغلي بوکر وینا «درواغجنه او غولونکې وبلله او ویې ویل چې ډېموکراتان د بایډن د ناکامۍ پټولو هڅې کوي.»
د ټرمپ د ټیم غبرګون
د ټرمپ ټاکنیزې ډلې وویل، چې ډېموکراتان د «بې بنسټه تورونو» له لارې غواړي چې ولسمشر ټرمپ بدنام کړي.