ایران: د افغان کډوالو شمېر ۶.۱ مېلیون ته رسېدلی او د کډوالۍ وده درېدلې ده

د ایران رسنیو د دغه هېواد د پارلمان د ملي امنیت او بهرني سیاست کمېتې له قوله راپور ورکړی، چې دمګړۍ په ایران کې ۶.۱ مېلیون افغان کډوال مېشت دي او د افغانانو د کډوالۍ د زیاتوالي کچه ثابته پاتې شوې او زیاتوالی پکې نه دی راغلی.

د ایران د پارلمان د ملي امنیت او بهرني سیاست کمېټې ویاند ابراهیم رضايي وايي، تېره ورځ د دغه هېواد د پارلمان په غونډه کې چې د ایران د امنیتي او کډوالۍ چارو لوړپوړو چارواکو هم ګډون درلود، د ایران د مهمو مسایلو ترڅنګ د دغه هېواد په شمال ختیځ کې د خراسان رضوي ولایت د مشهد ښار د زیربناوو د فشار او پدغه ښار کې د ۱.۲ مېلیونو افغانانو په ګډون له خدماتو څخه د بې برخې د ۲.۲ مېلیونو ایرانیانو په اړه بحثونه وشول.

رضايي د ایران د کورنیو چارو وزارت د بهرنیو چارو رییس یار احمدي له قوله ویلي، چې ایران ته د افغانانو د کډوالۍ وده درول شوې ده او دمګړۍ په دغه هېواد کې ۶.۱ مېلیون افغان کډوال مېشت دي.

ښاغلی رضايي وايي، د پارلمان په دغه غونډه کې د کډوالو له امله پر ایراني وګړو د اقتصادي فشارونو، روغتیا، زدکړو او نورو مسایلو په اړه هم بحثونه وشول او د انساني قاچاقي شبکو پر وړاندې د مبارزې پر هڅو ټینګار وشو.

د ایران د پارلمان د ملي امنیت او بهرني سیاست کمېټې ویاند وايي، ایراني چارواکو له افغان کډوالو سره د متوازنې او مدبرانه پالیسۍ غوښتني ترڅنګ د ایران پر سرحدونو باندې د کنټرول د سختیدو او له طالبانو سره د کډوالو په اړه د ډيپلوماټیکو خبرو اترو د پراخېدو غوښتنه هم کړي ده. او وايي، د ناقانونه کډوالو پر وړاندې دې قاطع ګامونه پورته شي.

سره له دې چې د ایران له خوا هره ورځ نږدې سلګونه افغانان بېرته افغانستان ته ستنول کیږي، خو ایراني رسنیو ویلي، چې له ۲۰۲۱ کال راهیسي په دغه هېواد کې د ناقانونه افغان کډوالو شمېر ډیر شوی، چې له امله یې د دغه هېواد لپاره جدي ټولنیزې او اقتصادي ستونزې رامنځته کړيي دي.