د جرمني نوی صدراعظم فریدریښ مېرڅ له ټاکل کېدو وروسته پر لومړۍ ورځ فرانسې ته لاړ او غواړي له پاریس نه پولنډ ته لاړ شي. میرڅ پر خپل اېکس ولیکل، « زما لومړنی سفر د صدراعظم په توګه زموږ دوو ستر ګاونډیانو ته دی: فرانسې او پولنډ ته».
هغه ټینګار کړی، چې جرمنی یو ځل بیا د نړیوالو مسوولیتونو منلو ته چمتو دی، خو دا کار به په متوازن او همکارانه بڼه ترسره کړي.
میرڅ د پاریس پر لور په الوتکه کې خبریالانو ته وویل: « زما هدف دا نه دی چې کوم مشخص تصمیمونه ونیسو، بلکې غواړم دننه او بهر ته یو سیاسي پیغام واستوم چې دا یو نوی پیل دی». میرڅ وویل چې دواړه هېوادونه «د ده لپاره ډېر ارزښت لري».
د فرانسې ولسمشر ایمانویل ماکرون د میرڅ تود هرکلی کړی او دواړو مشرانو په ایلیزه ماڼۍ کې سره کتلي.
له میرڅ سره د بهرنیو چارو وزیر ویډفول هم ملګری دی.
میرڅ به له فرانسې وروسته پولنډ ته لاړ شي، چې له لومړی وزیر دونالد توسک سره د اوکراین جګړې او غیرقانوني مهاجرت پر موضوعاتو خبرې وکړي.
میرڅ مخکې ویلي و چې غواړي د جرمني پر پولو کنټرول سخت کړي او ناقانونه کډوال بېرته واړوي.
له بلې خوا، روسیه د میرڅ ټاکل کېدو سره اړیکو ته هیله منه نه ښکاري. د روسیې د بهرنیو چارو وزارت ویاندې ماریا زاخارووا وویل، د جرمني سیاستوالو له خوا د روس ضد څرګندونو ته په کتو، د اړیکو د ښه کېدو تمه نه شي کېدای.
په ورته وخت کې، د چین ولسمشر شي جینپینګ صدراعظم میرڅ ته د ټاکل کېدو مبارکي ورکړه او ویلي یې دي چې چین او جرمنی باید خپلو اقتصادي همکاریو ته لا وده ورکړي او نړیوال اقتصاد یو ځای پیاوړی کړي.
