د ټرمپ له خوا پر سوریې د بندیزونو د لرې کولو له اعلان وروسته د دې هېواد خلکو خوښي وښوده

د اسراییل پوځ وایي، اصليح د حماس د خان یونس څانګې غړی و او د خبریال په نوم یې د یو رسنیز شرکت تر نامه لاندې فعالیت کاوه.

په اعلامیه کې دا هم ویل شوي، چې اصليح د اکټوبر په اوومه نېټه د اسراييل خاورې ته ننوتی و او د اورلګېدنو او وژنو صحنې یې فلمبرداري کړې وې او په ټولنیزو رسنیو یې خپرې کړې وې.

نوموړی تر دې وړاندې په یوه بل برید کې ټپي شوی و او په روغتون کې بستر و.

واشنګټن پوسټ ورځپاڼې د سیمه‌ییزو سرچینو په حواله لیکلي، چې دا برید د سې‌شنبې په ورځ (د اپرېل ۱۳مه) په غزه کې د اروپايي ټولنې پر یوه روغتون شوی دی.

ورته مهال، د اسراییل پوځ ادعا کړې چې تر روغتون لاندې د حماس د قوماندې یو مرکز موقعیت درلود، خو سیمه‌ییزو سرچینو بیا دا ادعا رد کړې ده.

دا پېښه داسې مهال کېږي، چې د امریکا ولسمشر ډونالډ ټرمپ منځني ختیځ ته د خپل سفر په بهیر کې د غزې جګړې د ښکېلو غاړو ترمنځ د سولې د خبرواترو د پرمختګ هڅه کوي.

دا په داسې حال کې ده، چې حماس تېره ورځ امریکایی-اسراییلی سرتېری ادان الکساندر خوشې کړ او د سور صلیب نړۍوالې کمېټې ته یې وسپاره، څو اسراییل ته یې ولېږدوي.

د یادونې ده، چې پر غزې د اسراییل د بریدونو له پیل راهیسې تراوسه له ۵۲ زرو ډېر کسان وژل شوي او زرګونه نور ټپیان دي.

د ډېلي مېل ورځپاڼې د راپور پر بنسټ، په تهران کې د طالبانو سفير فضل محمد حقاني د بورکینافاسو له سفير محمد کابورا سره د سوداګرۍ، د کانونو د استخراج او د مسلکي زده‌کړو ترڅنګ په یو شمېر نورو برخو کې د همکارۍ ژمنې کړې دي.

طالبانو ویلي، چې دواړو سفیرانو ژمنه وکړه چې ډېر ژر به د خصوصي سکټور پلاوی د افغانستان او بورکینافاسو ترمنځ د سوداګرۍ د پراختیا په موخه سفرونه وکړي.

بورکینافاسو په تېرو څو کلونو کې د سخت دريځو وسله‌والو ډلو له فعالیتونو سره مخ هېواد بلل کېږي.

د رسنیو د معلوماتو له مخې، په دغه ۲۳ مېلیونه نفوس لرونکي هېواد کې ټر ټولو داعش او القاعده په ګډون څو نورې ترهګرې ډلې فعالې دي.

په ورته وخت کې د امریکا ولسمشر ډونالډ ټرمپ د سې شنبې په ورځ پر سوریې د ټولو شته بندیزونو د لرې کېدو اعلان وکړ.

هغه وويل، چې امريکا له سوريې سره د اړيکو د عادي کولو لپاره لومړني ګامونه پورته کړي دي.

د ټرمپ په وینا، د سوریې او امریکا د بهرنیو چارو وزیران به په دې اوونۍ کې هم سره وګوري.

د یادولو ده، چې د سوریې د بهرنیو چارو وزیر اسعدالشیباني بیا په دې برخه کې د سعودي عربستان له همکارۍ مننه کړې ده.

ښاغلي شیباني د سې‌شنبې په ورځ (د اپرېل ۱۳مه) وویل، چې سعودي عربستان د امریکا د بندیزونو د لرې‌کېدو لپاره لار هواره کړې ده.

هغه وايي، چې د بنديزونو له لرې‌کېدو سره به د سوريې بيارغونه پيل شي.

د امریکا ولسمشر ډونالد ټرمپ نن په ریاض کې اعلان وکړ، چې د سعودي عربستان له وليعهد محمد بن سلمان او د ترکیې له ولسمشر سره تر خبرو وروسته، پر سوریې بندیزونه ختموي.

نوموړي ویلي، چې امریکا له سوریې سره د اړیکو عادي کولو لپاره لومړني ګامونه اخیستي دي.

ټرمپ زیاته کړې، چې د امریکا او سوریې د بهرنیو چارو وزیران به په دې اوونۍ کې وویني