په هلمند کې د طالبانو د امربالمعروف ریاست له خلکو او ټولنیزو فعالانو غوښتي، چې خپل فعالیتونه دې د «اسلامي شریعت او د دوی د قانون په چوکاټ» کې تر سره کړي. طالبانو دوی ته خبردرای ورکړی، چې د ټولو فعالانو ټولنیزې رسنۍ تعقیبوي او د سرغړونې په صورت کې به له سزاوو سره مخ شي.
له هلمند څخه سرچینو افغانستان انټرنشنل ـ پښتو ته د شنبې په ورځ (د غويي ۲۷مه) ویلي، طالبانو په یوې خبرتيا کې له خلکو غوښتي، چې ټولنیزې رسنۍ دې «د موثق خبر، تعلیم، مشروع کاروبار او اسانۍ لپاره وکاروي.»
طالبانو په دې خبرتيا کې همداراز خلکو ته خبرداری ورکړی، چې که چا همدغه رسنۍ د فکري انحراف او د دوی د تخریب لپاره وکارولې له سزا سره به مخ شي.
په دې خبرتیا کې لیکل شوي: «که چا فکري انحراف، توهین، تحقیر، قومي تعصب او دیني ارزښتونو خلاف وکارولې د قانون منګولو ته به وسپارل شي.»
د طالبانو د امربالمعروف وزارت یوې سرچینې ویلي، چې دوی تېره اوونۍ یو شمېر د ټيک ټاک فعالان د ناسم فعالیت په تړاو نیولي او زنداني کړي دي.
تېره اوونۍ سرچينو ویلي و، چې د طالبانو د امر بالمعروف ادارې په بغلان کې د ټيک ټاک فعال شېر علي مبارز په ټولنیزو رسنیو کې د ناسم فعالیت له امله نیولی و.
د طالبانو د مشر ملا هبت الله اخوندزاده له لوري د « امربالمعروف او نهې عن المنکر» په توشیح شوي قانون کې پر رسنيو د يو شمېر محدوديتونو ترڅنګ په واضیح توګه د موسیقۍ خپرول او نورې سرګرمۍ هم منع شوي دي.
په افغانستان کې واک ته د طالبانو له رسېدو را وروسته دغه ډلې پر ډېرو رسنیو او فعالانو بندیز لګولی او پر طالبانو نیوکه کوونکي یې هم نیولي او زنداني کړي دي.
په کندهار کې د دولتي روغتیايي بنسټونو یو شمېر ښځینه روغتیاپالانو د شنبې په ورځ (د غويي ۲۷مه) افغانستان انټرنشنل ته وویل، چې کندهار کې د طالبانو د امر بالمعروف ریاست پرې نوي بندیزونه لګولي دي.
د ترلاسه شو سندونو له مخې د «جک» موسسه چې د کندهار دولتي روغتونو کې روغتیايي خدمات وړاندې کوي، د کندهار امربالمعرف ورته امر کړی، چې د ښځینه روغتیاپالانو د محرم پیژندنه تایید او دوی ته یې معرفي کړي.
په یوه بل مکتوب کې د «جک» موسسې ادارې د خپلو ښځینه کارکوونکو د محرم بشپړ معلومات د طالبانو امر بالمعروف ریاست سره شریک کړي دي.
د ښځینه روغتیاپالانو په وینا، د دوی محرم باید په کاري وخت کې له دوي سره په کلینیک یا هم په روغتون کې موجود وي.
د معلوماتو له مخې طالبانو ټولو روغتیایي برخو کې ډاکترانو او نرسانو په کډون ټول ښځینه پرسونل باندې دا بندیز جبري کړی.
هغوی وایي، له ښځینه روغتیاپالو سره داسې چلند کېږي، چې ګواکي د امر بالمعروف ریاست غواړي ښځې مجبوره شي چې دندې پرېږدي او په کور کیني.
یوې ښځینه روغتیاپالې وویل:« په چک پواینټونو کې هم طالبان پوښتنې کوي که محرم هم وي بیا هم دوی داسې ناوړه پېِغورونه راکوي، چې کواګې مونږ د اسلام خلاف عمل کوو.»
دغه څرګندونې په داسې حال کې کېږي چې د افغانستان انټرنشنل ـ پښتو د یوه راپور له مخې، په کندهار کې د ښځو درملنه له جدي ګواښ سره مخ ده، ځکه چې دا مهال د دغه ولایت په دولتي روغتیايي بنسټونو کې یوازې یوه ښځینه متخصصه ډاکټره حضور لري. پخوا چې څو ښځینه متخصصې ډاکټرې هلته کار کاوه، خو د طالبانو له واکمنېدو وروسته یې خپلې دندې پرېښې دي.
د طالبانو د ډلې مشر ملاهبت الله په کندهار کې مېشت دی او له هغه ځایه د افغانستان چارې اداره کوي خو نیوکې دا دي، چې د نورو ولایتونو په پرتله په کندهار کې ټولنیز بندیزونه ورځ تربلې زیاتېږي او دا کار به په دولتي سیسټم کې د ښځینه روغتیاپالانو شمېر نور هم راکم کړي.