د طالبانو د مخابراتو او معلوماتي ټکنالوجۍ وزیر نجیب الله حیات حقاني په تاشکند کې له خپل ازبک سیال شیرزود شرمتوف سره لیدلي او د ټکنالوجۍ په بېلابېلو برخو یې ورسره خبرې کړې دي.
د دغه وزارت په خبرپاڼه کې راغلي، چې دواړه خواوو د ټیکنالوجۍ په برخو کې پر سیسټم جوړونې، ډیجیټل حکومتولۍ، د تجربو په شریکولو، په دې برخه کې پر پانګونې، سایبري امنیت او د افغان کادرونو د ظرفیت لوړونې په تړاو خبرې کړې دي.
په خبرپاڼه کې د ازبکستان د مخابراتو او ټکنالوجۍ وزیر شیرزود شرمتوف په حوالې راغلي، چې اوسمهال افغانستان او ازبکستان کولای شي د ټکنالوجۍ د ودې او پراختیا په برخو کې همکار پاتې شي او ازبکستانی لوری په دې برخه کې ورسره خپلې تجربې شریکې کړي.
ورته مهال د طالبانو د مخابراتو او معلوماتي ټکنالوجۍ وزیر نجیب الله حیات حقاني ویلي، چې اوسمهال د ټکنالوجۍ په برخه کې د پانګونې او پرمختګ په موخه اسانتیاوې د پخوا پرتله ډېرې شوې دي.
هغه ویلي، چې په افغانستان کې د ناقانونه پوسټي خدمتونو مخنیوی شوی.
نوموړي زیاته کړې، اوسمهال افغانستان د دې جوګه دی چې د خپلو اداراتو سیسټمونه په خپله جوړ او تطبیق کړي.
د هغه په وینا، افغانستان د نوري فایبر په برخه کې د نښلېدو بشپړ ظرفیت لري چې اوسمهال افغانستان په ۷ بېلابېلو سیمو کې د سیمې او ګاونډیو هېوادونو سره د همدې کېبل له لارې وصل شوی او نږدې راتلونکې کې به د واخان له لارې چین سره هم وصل شي.
د خبرپاڼې په وروستۍ برخه کې د ښاغلي شیرزود شرمتوف په حواله لیکل شوي، چې د ازبکستان ولسمشر ښاغلي شوکت میرزایوف له لوري ورته افغانستان سره په اړونده برخو کې د بشپړې او هر اړخیزې همکارۍ سپارښتنه شوې ده.
واک ته د طالبانو له رسېدو وروسته که څه هم ګڼ د سیمې هېوادونه له طالبانو سره ښه راشه درشه لري؛ خو بیاهم دغه ډله د هیڅ کوم هېواد لهخوا په رسمیت نه ده پېژندل شوې.
