د طالبانو ویاند ذبیح الله مجاهد د ترکي ژبو هېوادونو سازمان ګډې اعلامیې ته په غبرګون کې ویلي، چې د ترک دولتونو سره د ښو اړیکو غوښتونکي دي او په بېلابېلو برخو کې د هغوی همکاریو ته اړتیا لري، خو د افغانستان کورنیو مسایلو ته خپله افغانان رسیدنه کوي.
طالبانو ته نږدې رسنیو د دغې ډلې د ویاند ذبیح الله مجاهد یو غږیز پیغام خپور کړی او نوموړي ویلي: «دا یوه کورنۍ اړتیا ده، د خلکو غوښتنې به په نظر کې نیول کیږي، خو نور هېوادونه باید د افغانستان په اړه خپل مکلفیتونه چې د دوی اړوند دې په پام کې ونیسي. په مختلفو برخو کې دې د افغانستان ملاتړ وکړي. په ډېپلوماټیکو او اقتصادي برخو کې دې اړیکي ښي کړي.»
مجاهد زیاتوي، له ترک دولتونو سره د ښو اړیکو غوښتونکي دي او په بېلابېلو برخو کې د هغوی همکاري اړینه ده.
نوموړی وایي: «موږ له خپل لوري هم په ډېپلوماټیکو او اقتصادي برخو کې د ښو اړیکو غوښتنه لرو. له افغانستان څخه هم دا ډاډ ورکول کېږي چې د دغه هېواد خاوره به د هېڅ بل هېواد پر ضد نه کارېږي او نه به یې اجازه ورکړل شي.»
د ترکي ژبو هېوادونو سازمان په ګډه اعلامیه کې ویلي، چې د افغانستان د ثبات لپاره له افغانانو سره د نړیوالو بشري مرستو ملاتړ کوي او د ثبات، پرمختګ او ملي پخلاینې په برخو کې له طالبانو سره کار کولو ته چمتو دي. دغه سازمان په افغانستان کې د ټولګډونه حکومت د جوړېدو غوښتنه کړې.
ترکیه، اذربایجان، قزاقستان، قرغزستان او ازبکستان د دغه سازمان دایمي غړي دي او مرکز یې په استانبول ښار کې دی.
