د افغان ښځو د عدالت او پوهاوي غورځنګ د یوې اعلامیې په خپرولو سره ویلي، چې د زلمي خلیلزاد مېرمن دې د طالبانو «د جنایتونو د توجیه، تبلیغ او سپیناوي» په تور د نړیوالو قضايي بنسټونوو له خوا تر قانوني تعقیب لاندې ونیول شي.
د دغه غورځنګ په خپره شوې اعلامیه کې راغلي، چې د طالبانو تر واک لاندې افغانستان کې ښځې د معاصر تاریخ له تر ټولو ظالمانه او دردناکو شرایطو سره مخ دي، خو د زلمي خلیلزاد مېرمنې د ښځو په وړاندې د طالبانو د سختو پالیسیو د سپینولو هڅه کړې ده.
یاد غورځنګ ویلي، چې د شرل بنارډ څرکندونې د بشریت په وړاندې د جنایتونو سره ښکاره شراکت دی.«شرل بنارډ هڅه کړې، چې له نړیوالو سټیجونو او خپل ډېپلوماټیک حیثیت څخه ګټه واخلي، څو د یوه ترهګر رژیم عادي سازي وکړي. داسې رژیم چې ښځې یې له ټولنیز ژوند اېستلي، شکنجه کړي، په زور یې واده کړي او سختې یې ځپلې دي. د شرل بنارډ څرګندونې غیري ارادې نه دي، بلکي د بشریت پر ضد د جنایتونو سره ښکاره شراکت دی.»
د افغان ښځو د عدالت او پوهاوي غورځنګ له نړیوالو قضايي بنسټونو څخه غوښتنه کړې، چې د زلمي خلیلزاد مېرمن دې د ورستیو څرګندونو په تور تر قضايي څار لاندې ونیول شي.
دا په داسې حال کې ده، چې د زلمي خلیلزاد مېرمن شرل بنارډ په یوې مقاله کې د طالبانو تر کنټرول لاندې افغانستان ته د ستنېدو په تړاو د افغان کډوالو او د هغوی د ملاتړکوونکو بنسټونو اندېښنې «بې بنسټه» بللي او وايي، چې افغانستان ته دې له ستنېدو نه ویریږي.
نوموړې په خپله مقاله کې پر افغان ښځو او نجونو د زده کړو بندیز «د نه منلو وړ او له دیني اساسه خالي» بللی، خو د ښځو د ځپلو په اړه د رسنیو راپورونه یې رد کړي دي.
