د پېنګ یوجیانګ په نوم یو چینایی سړی د (پيراګلایډينګ) وزرونو په وسیله په ناڅاپي ډول ډېرې قوي ورېځې ته ننوتی او شاوخوا ۲۸ زره فوټه له ځمکې نه هوا ته پورته شوی دی. دا لوړوالی د ایوریسټ غره څوکې ته ورته دی.
پېنګ وايي، هلته هوا ډېره سړه او منفي ۴۰ درجو سانتي ګراد ته رسیدلې وه چې پهکې د اکسیجن کچه ډېره کمه محسوسېده. هغه زیاته کړې چې د سخت ساړه له امله يې ګوتې کنګل شوې وې او ساه اخيستل ورته ډېر ستونزمن و.
که څه هم د هغه د الوتنې وسایل زیانمن او وزرونه یې کنګل شوی وو، خو نوموړي وکولای شول چې ځان کنټرول کړي او بېرته ځمکې ته راښکته شي. پېنګ تر یوه ساعت ډېر په اسمان کې و او ان د الوتنې په یوه برخه کې بېهوښه شوی و.
دی زیاتوي چې له نېکه مرغه ژوندی پاتې شوی او تر ښکته کېدو وروسته یې خپل ملګري موندلي دي.
د چین د ګانسو ولایت هوايي چلند ادارې ویلي چې پېنګ تر الوتنې محکې چارواکو ته خبر نه و ورکړی او په پایله کې هغه د شپږو میاشتو مودې لپاره له الوتنې نه منع شوی دی.
یادې ادارې ویلي چې پېنګ په قصدي ډول نه غوښتل له هوا دومره لوړ ځای ته پورته شي او دا یو تصادف وه. په معمول ډول، انسانان له اکسیجن پرته تر ۲۶ زره فوټو نه لوړ ژوندی نهشي پاتې کېدای.
په ۲۰۰۷ کال کې د ایوا ویسنیوسکا په نوم یوه جرمنۍښځه په اسټرالیا کې د وزرونو په وسیله په ناڅاپي ډول ۹ زره ۹۴۶ مترو لوړې فضا ته پورته شوې او د ۴۰ دقیقو لپاره په هوا کې بېهوښه شوې، خو هغه هم ژوندۍ پاتې شوې وه.
