طالبان وایي د برېښنا سکتور ته ۸،۲ میلیارده افغانۍ پانګونه جلب شوې
د طالبانو د ریاستالوزرا اقتصادي معاونیت وایي، په تېرو دوو میاشتو کې د برېښنا د تولید، توزیع او انتقال په برخه کې ۸،۲ میلیارده افغانۍ پانګونه جلب شوې. د یاد معاونیت په وینا، په دې پانګونې به ۱۳۸،۴۵ میګاواټه برېښنا تولید شي، چې تر ۱۰۰ زرو کورنۍ او لسګونه فابریکې به ترې ګټه واخلي.
د طالبانو دغه اقتصادي معاونیت د چهارشنبې په ورځ پر اېکس پاڼې لیکلي، چې یادې پروژې د هېواد په بېلابېلو ولایتونو کې پلې کېږي، چې بلخ، هرات، لغمان، کندهار، زابل او فراه یې مهم ولایتونه دي.
د یاد معاونیت په وینا، په دغو پروژو کې د لمریزې او بادي برېښنا تولید، همدارنګه د برېښنا د لېږد مزي شامل دي، چې د هېواد د انرژۍ اړتیاوو پوره کولو لپاره یو مهم ګام بلل کېږي.
دغه پروژې د طالبانو د اقتصادي معاونیت له خوا منظورې شوې دي.
دوی تمه لري، چې د عملي کېدو له امله یې د افغانستان په کچه د برېښنا د کمښت ستونزه تر یوه بریده حل شي او همداراز د صنعتي سکتور لپاره د لا زیات فعالیت زمینه برابره شي.
دا په داسې حال کې ده، چې افغانستان اوس هم د برېښنا یوه ستره برخه اړتیا له ګاونډیو هېوادونو پوره کوي.
طالب چارواکو هم ویلي، چې وارداتي برېښنا دوی ته په لوړ قیمت تمامیږي او په اوږد مهال کې دا چاره ډاډمنه او ګټوره نه ده.