د پخواني افغان پوځ لوی درستيز د طالبانو له لورې د پخوانيو سرتیرو نیول د اندېښنې وړ ګڼلي
د پخواني افغان پوځ لوی درستیز هیبت الله علیزي د لوی اختر د مبارکۍ په يوه پيغام کې وايي: «د فردي ازاديو محدودول، د ښځو د حقونو جدي نقض او د پخوانيو سرتيرو نیول او ځورول د جدې اندېښنې وړ دي.» نوموړي په هیله مندۍ زياته کړې: «خو وضعیت تغيریږي.»
د افغانستان د پرځيدلي جمهوريت وروستي لوی درستیز هیبت الله علیزي د جمعه په ورځ (د غبرګولي ۱۶مه) پر خپله اېکس پاڼه ټولو افغانانو د اختر مبارکي ویلې.
نوموړي ویلي:«د تېر په څېر د خوښۍ په فرصتونو کې هم زیاتره هېوادوال، په ځانګړي توګه افغان مېرمنې او نجونې، غمجنې او دردمنې دي.»
نوموړي د طالبانو له لورې پر ټولنیز ژوند بندیزونو، د ښځو د حقونو نقض او د پخوانيو افغان سرتيرو ځورول د اندېښنې وړګڼلي.
نوموړي د اختر په د مبارکۍ په پيغام کې د پخوانيو سرتيرو د نیولو د شمېر او نورو برخو کې جزيات نه دي وړاندي کړي.
یو شمېر سیاسیونو او بنسټونو پر طالبانو پرله پسې نیوکه کړې، چې واک ته له رسېدو را وروسته دغه ډلې د خپل مشر د عمومي بښنې سره سره بیا هم پخواني افغان سرتيري وژلي، شکنجه او زنداني کړي دي.