سعودي پر فلسطین د اسراییل د یرغل د پای ته رسولو لپاره د نړۍوالې ټولنې په رول ټینګار وکړ
د سعودي عربستان وليعهد محمد بن سلمان د شنبې په ورځ د فلسطین پر وړاندې د اسراییلي یرغل د «ناوړه پایلو» د ختمولو لپاره د نړۍوالې ټولنې د مهم رول په اړه ټینګار وکړ.
د سعودي عربستان وليعهد محمد بن سلمان د شنبې په ورځ د فلسطین پر وړاندې د اسراییلي یرغل د «ناوړه پایلو» د ختمولو لپاره د نړۍوالې ټولنې د مهم رول په اړه ټینګار وکړ.
د سعودي خبري اژانس (SPA) د راپور له مخې، محمد بن سلمان په هغه مراسمو کې چې د هېوادونو د مشرانو او لوړپوړو چارواکو له خوا ترسره شول او هغوی یې د حج په مناسبت مېلمانه کړي و، وویل: «سږکال د اختر ورځ په داسې حال کې راځي، چې زموږ وروڼه په فلسطین کې د اسراییلي یرغل له دوام سره مخ دي.»
وليعهد زیاته کړه:«موږ د نړۍوالې ټولنې د رول پر اهمیت ټینګار کوو چې د دې یرغل د ناوړه پایلو د ختمولو، د بېګناه ولسونو د ساتنې، او د یوې نوې واقعیت د جوړولو لپاره کار وکړي، چې په کې فلسطین د نړۍوالو قانوني پرېکړو سره سم په امن کې ژوند وکړي.»
په همدې حال کې په غزه کې فلسطینیان د دویم کال لپاره د اختر ورځ د جګړې تر سیوري لاندې لمانځي.
وليعهد محمد بن سلمان د پنجشنبې په ورځ د مکې د ښار په شاوخوا کې د حج د پیل په ترڅ کې د اړوندو چارواکو له خوا نیول شوي اقدامات وڅارل.
د شنبې په ورځ وليعهد وویل، چې سعودي عربستان به په ټول توان د حاجیانو خدمت ته دوام ورکړي.
محمد بن سلمان وویل:«د سعودي عربستان پاچاهي د خپلو لومړیتوبونو په سر کې دا موضوع اېښې ده او ټول وسایل یې د حاجیانو د خدمت او د دوی د عبادتونو د اسانه او ارام ترسره کولو لپاره وقف کړي دي.»
