د پاکستان ډان ورځپاڼې د راپور پر بنسټ، په خېبرپښتونخوا کې د لوی اختر تېرو درېیو ورځو په اوږدو کې ۵۵ کسان مړه او ۴۳۱ نور ټپیان شوي دي. د موټرو ټکر، اورلګېدنې، په اوبو کې ډوبېدل او نورې پېښې د دې کسانو د مړه کېدو لاملونه بلل کېږي.
په راپور کې چې د دوشنبې په ورځ (د جون ۹مه) خپور شوی، راغلي چې ترټولو ډېر ۱۴ کسان د خېبرپښتونخوا په مردان ښار کې او ۱۳ نور بیا په پېښور ښار کې مړه شوي دي.
هري پور، نوشېره، هنګو، کُرمه، دېره اسماعېل خان، بنو، بونیر او بټګرام یو بل پسې هغه سیمې دي، چې د لوی اختر په تېرو درېیو ورځو کې د مرګونو پېښو شاهدانې وې.
د پاکستان ډان ورځپاڼه همداراز وايي، چې په دې ورځو کې تر دوو زرو ډېرې پېښې ثبت شوي دي، چې پهکې طبي قضیې، د موټرو ټکرونه، اورلګېدنه، جرمونه او ډوبېدل شامل دي.
د راپور پر بنسټ، یوازې په پېښور ښار کې د ژغورنې ټیمونو لهخوا ۴۱۸عملیات ترسره شوي او ۴۳۱ ټپیان روغتیايي مرکزونو ته لېږدول شوي دي.
راپور زیاتوي چې د پاکستان ریسکیو ۱۱۲۲ ادارې د سیلانیانو او ځايي خلکو د خوندیتوب ډاډمنتیا لپاره په تفریحي سیمو کې روغتیایی سیار مرکزونه جوړ او د سیندونو او بندونو په اوږدو کې یې د اوبو د ژغورنې ټیمونه ځای پر ځای کړي وو.
د یادونې ده، چې دا په تېرو څو کلونو کې په خېبرپښتونخوا کې د اختر د رخصتیو پرمهال دومره درنه مرګژوبله رامنځته کېږي.
