د رویټرز د راپور له مخې، د جاپان دفاع وزارت ویلي چې د چین دوې الوتکه وړونکې بیړۍ «لیاونینګ» او «شاندونګ»د لومړي ځل لپاره په یوه وخت کې د ارام سمندر په بېلابېلو برخو کې لیدل شوې دي.
د جاپان د دفاع وزیر جن ناکاتاني ویلي، دغه عملیات ښيي چې چین غواړي خپلې پوځي وړتیاوې له خپلو پولو نه ورهاخوا پراخې کړي. نوموړي ټینګار کړی چې جاپان به د چین د سمندري ځواکونو حرکات له نږدې وڅاري او خپلې هوايي دفاعي وړتیاوې به نورې هم پراخې کړي.
بل لور ته د چین د سمندري ځواک ویاندې ویلي چې دا عملیات «معمولي روزنیز تمرینونه» دي او کوم هېواد یې هدف نه دی.
د چین د بهرنیو چارو وزارت هم ټینګار کړی چې د دوی فعالیتونه د نړیوالو قوانینو مطابق دي.
د جاپاني چارواکو په وینا، له می میاشتې راهیسې چین د ختیزې اسیا په اوبو کې د خپلو سمندري او ساحلي ځواکونو حضور زیات کړی، چې دغه کار د سیمې هېوادونه اندېښمن کړي دي.
