د امریکا د بهرنیو چارو وزارت یوه لوړپوړي چارواکي مککوی پیټ، د ملګرو ملتونو د امنیت شورا یوې بیړنۍ غونډې ته ویلي، چې اسراییل له ایران د نن ورځې برید څخه مخکې واشنګټن ته ویلي و، چې دغه بریدونه یې د ځانساتنې لپاره ضروري دي.
پیټ زیاته کړه: «هر خپلواک هېواد د ځان د دفاع حق لري، او اسراییل هم له دې قاعدې مستثنا نه دی.»
هغه د امریکا د بهرنیو چارو وزیر، مارکو روبیو، هغه خبرداری هم تکرار کړ چې پکې ویلي و واشنګټن په دې برید کې لاس نه لري، خو که ایران د امریکا پر منافع یا پر پرسونل برید وکړي، پایلې به یې دروند قیمت ولري.
پیټ زیاته کړه: «ولسمشر ټرمپ د امریکايي ولس لهخوا له دې لپاره منتخب شوی چې سوله تامین کړي او له هغو تېرو لویو تېروتنو مخنیوی وکړي چې امریکا یې اوږدمهالو جګړو ته راکاږله.»
نوموړي ټینګار وکړ چې امریکا به لا هم هڅه کوي له ایران سره یوه داسې ډېپلوماټیکه حللاره ومومي، چې د تهران د اتومي وسلو د ترلاسه کولو مخه ونیسي او د منځني ختیځ ثبات ته ګواښ پېښ نه کړي.
هغه وویل: «د ایران مشرتابه ته دا وخت یو ښه فرصت دی چې د خبرو مېز ته کښېني.»
