د یوې پراخې ولسي غونډې سره هممهاله طالبانو د بدخشان خاش ولسوالۍ ته امنیتي ځواکونه ولېږل
د بدخشان څخه سرچینو راپور ورکړی، چې نن شنبه (د غبرګولي په ۳۱مه) د دې ولایت د بېلابېلو کلیو خلک د طالبانو پر ضد د اعتراض لپاره په خاش ولسوالۍ کې راټول شوي وو. سیمهییزو سرچینو ویلي چې طالبانو د لاریونونو د ځپلو لپاره "ډېر شمیر" وسله وال ځواکونه خاش ولسوالۍ ته لیږلي دي.
یوې سیمهییزې سرچینې ویلي چې شاوخوا ۷۰ رینجر موټرونه چې د طالبانو په وسله والو ځواکونو سمبال و د جرم او باغ مبارک له لوري راغلي دي.
د سرچینې په وینا، د لرې پرتو کلیو خلک هم د طالبانو پر ضد په دې ولسي غونډه کې د ګډون په موخه راټول شوي دي.
د طالبانو د کوکنارو د له منځه وړلو د پروګرام پر ضد لاریونونه تېره اونۍ پیل شول.
سیمهییزو سرچینو د پنجشنبې په ورځ (د غبرګولي په ۱۹مه) افغانستان انټرنشنل ته وویل چې د خاش ولسوالۍ اوسېدونکو د طالبانو له خوا د کوکنارو د کروندو د ویجاړولو پر ضد لاریون وکړ.
بزګران وايي چې د کوکنارو د کښت لپاره د بدیل معرفي کولو پرته، سیمهییز اقتصاد به زیانمن شي او خلک به وږي شي.
د پنجشنبې په ورځ د افغانستان انټرنشنل لخوا ترلاسه شوي ویډیوګانې ښیي چې لاریون کوونکي د طالبانو ځواکونو سره په جګړه بوخت دي او د طالبانو د مخدره توکو پر ضد ادارې پورې اړوند څو ټراکټورونه سوځوي.
د خاش ولسوالۍ اوسېدونکو وویل چې د طالبانو د مخدره توکو پر وړاندې د مبارزې ادارې افسرانو په لاریون کوونکو ډزې وکړې.
په پیښه کې د احتمالي تلفاتو په اړه تر اوسه معلومات نشته.
د طالبانو د مشر هبت الله اخوندزاده د فرمان پلي کول چې په بدخشان کې د کوکنارو کښت له منځه یوسي، له پراخو ننګونو سره مخ دي.
د ارګو او درایم ولسوالیو بزګرانو هم پخوا د طالبانو د کوکنارو د له منځه وړلو پروګرام پر وړاندې لاریون کړی و.
لاریون کوونکي په بېلابېلو ولایتونو کې طالبان په دوه ګوني چلند تورنوي.
دوی په بدخشان کې د غیر سیمهییزو طالبانو له شتون او پراخ ځواک څخه هم ناخوښه دي.