د افغانستان د پخواني جمهوري دولت د چارو ادارې مشر فضل محمود فضلي وايي، چې د ناټو غړي هېوادونه د جګړې د دفاع لپاره هر کال زر میلیارده ډالره اضافې بودجه ځانګړې کړې او له بلې خوا بیا ځینو بنسټونو ته بودجه ورکوي چې دوی سوله غوښتونکي وښيي.
نوموړي اندېښنه ښودلې: «زموږ د ټولنې ځينې نوی لیبراله افراد هم همدې سپينولو دام ته لوېدلي دي.»
د افغانستان د پخواني جمهوري دولت د چارو ادارې مشر فضل محمود فضلي د پنجشنبه په ورځ (د چنګاښ ۵مه) پر خپله اېکس پاڼه ليکلي: ««پرون د ناټو په کلنۍ سرمشریزه کې غړي هېوادونه پر دې سلا شول چې د جګړې او دفاع لپاره به له اوسنۍ بودجې پرته هر کال زر میلیارده ډالره اضافه بودجه ځانګړې کړي. هممهاله، بریتانیا د هغو جنګي جټ الوتکو فرمایش ورکړ چې د اټومي بمونو د انتقال او کارولو ظرفیت لري.»
د نوموړي په خبره، چې لوی ځواکونه، په ځانګړي ډول لویدیځ، د پراخو جګړو لپاره چمتووالی نیسي.
نوموړي اندېښنه ښودلې، چې دا ډول پانګونې د انسان وژنې، د غریبو او ضعیفو هېوادونو د ورانولو لپاره دي.
فضلي زياته کړې، چې همدا ځواکمن هېوادونه د ځان سپينولو په خاطر ځينو ټولنو او بنسټونو ته پيسې ورکوي.
هغه لیکلي: «له دې هر څه سره موازي، دوی خپلو مدني ټولنو، رسنیو، د بشري حقونو او ازادیو بنسټونو او فکري موسسو ته بودجه ورکوي او دنده ورته سپاري چې د دغو هېوادونو تصویر خپلو خلکو او نړیوالو ته بشري، انساندوسته او سوله غوښتونکی وښيي.»
فضلي هیله ښودلې، چې رښتني هيوادوال دې له دې فکري اسارت څخه را ووځي.
