طالبان په هرات کې د تازه مېوو صادراتو لپاره اداري بهیر اسانه کوي
په هرات کې د طالبانو والي مولانا اسلام جار ویلي، چې د تازه مېوو د صادراتو په برخه کې یو شمېر جدي اسانتیاوې رامنځته کوي؛ څو اداري چارې چټکې شي او د هر ډول ځنډ و خنډ مخه یې ونیول شي.
په هرات کې د طالبانو والي مولانا اسلام جار ویلي، چې د تازه مېوو د صادراتو په برخه کې یو شمېر جدي اسانتیاوې رامنځته کوي؛ څو اداري چارې چټکې شي او د هر ډول ځنډ و خنډ مخه یې ونیول شي.
د چهارشنبې په ورځ د (چنګاښ ۴مه) نېټه د طالبانو د هرات ولایت مقام رسنیز دفتر په خبرپاڼه کې راغلي، چې په همدې تړاو د طالبانو ولایتي ادارو ترمنځ ګډه غونډه شوې.
په یاده ناسته کې د یادې ډلې والي ټینګار کړی، د تازه مېوو پروسه باید داسې تنظیم شي چې تازه مېوې پرته له هر ډول خنډ او ځنډه نړۍوالو بازارونو ته ورسېږي.
مولانا اسلام جار خپلو ادارو ته لارښوونه کړې، چې له سوداګرو سره همغږي زیاته کړي او ډاډ ورکړي چې صادرات په منظم او مؤثر ډول ترسره شي.
دا هڅې داسې مهال کېږي، چې د هېواد په یو شمېر ولایتونو کې سوداګر شکایت کوي چې تازه مېوې له سختو ګمرکي بهیرونو سره مخ دي او له امله یې ډېر کله د دوی بار شوي مالونه خوسا کېږي.
د تورخم له لارې پاکستان ته د لېږل کېدونکو تازه مېوو په تړاو هم سوداګرو په وار، وار شکایتونه کړي او ویلي یې دي، چې د پېچلي ګمرکي بهیر له امله د طالبانو تر څنګ د پاکستاني چارواکو سخت مدیریتي چلند صادراتي توکي له خوسا کېدو سره مخ کوي.
همدا راز د تورخم لارې تړل کېدل هم څو، څو ځله د تازه مېوو سوداګرو ته درانه مالي زیانونه اړولي دي.
