هند د وزیرستان د برید په اړه د پاکستان تورونه رد کړل
د هند د بهرنیو چارو وزارت د پاکستان د پوځ هغه تور رد کړی، چې د شمالي وزیرستان د ځانمرګي برید مسوولیت یې پر ډیلي ور اچولی و. دغه وزارت په یوې خبرپاڼه کې ویلي: «موږ د پاکستان د پوځ هغه خبرپاڼه لېدلې چې هڅه کوي د جون د ۲۸مې د برید مسوولیت پر هند واچوي. موږ دا ادعا په کلکه ردوو.»
دغه برید په وروستیو کې د شمالي وزیرستان په ناامنه سیمه کې یو له خونړیو بریدونو څخه و.
د پاکستان پوځ د برید مسوولیت پر هند واچوله؛ خو د دې ادعا د اثبات لپاره یې هېڅ شواهد وړاندې نه کړل.
چاودنه د شنبې په ورځ (د چنګاښ ۷مه) غرمه مهال هغه وخت وشوه، کله چې د پاکستان امنیتي ځواکونو په سیمه کې ګرځبندیز ولګاوه.
د لومړنيو راپورونو له مخې، پلټني ښيي چې په دې ځانمرګي برید کې شاوخوا ۸۰۰ کیلو ګرامه چاودېدونکي توکي کارول شوي، چې شاوخوا کورونو ته یې سخت زیان اړولی دی.
د پاکستان پوځ ویلي، چې په برید کې ۱۳پوځیان وژل شوي او ګڼ نور ټپیان شوي دي.
د حافظ ګل بهادر ډلې چې د پاکستاني طالبانو یوه څانګه ده، د ځانمرګي برید مسوولیت پر غاړه اخیستی دی.
پاکستان پر افغان طالبانو تور لګوي، چې دوی ته پناه ورکوي؛ خو کابل دا تورونه رد کړي دي.
یو پاکستاني شنونکي عبدالله خان د مارچ په میاشت کې له اسوشېټېډ پرېس سره په یوې مرکه کې ویلي، چې د حافظ ګل بهادر ډله «تر پاکستانیو طالبانو ډېره خطرناکه» ده او فعاله هڅه کوي چې خپل نفوذ پراخ کړي.
وروسته له هغه چې د پاکستان د بهرنیو چارو وزیر اسحاق ډار کابل ته سفر وکړ، پاکستاني رسنیو راپور ورکړی، چې د طالبانو مشرتابه پاکستاني پلاوي ته ډاډ ورکړی، چې د تحریک طالبان پاکستان د بریدونو مخنیوی به وکړي.