په شمالي وزیرستان کې د پاکستان پر پوځیانو یو بل ځانمرګی برید کې ۶ پوځیان ټپیان شوي

د پښتون ژغورنې غورځنګ مشر منظور احمد پښتین د جمعې په ورځ (د چنګاښ ۶مه) پر خپله فېسبوک پاڼه لیکلي: «په سوات کې د ماشومانو، تورسرو او سړو د مرګ په خوله کې په ظاهره سترګو سرکار لیدل، خو د بچ کولو هڅې یې نه کولې.»

نوموړي ویلي، چې په لکي مروت کې د ۱۶ بې ګناه ماشومانو، ښځو او سړیو باندي د پاکستان د ډرون برید پاکستان ته معلومه وه چې پښتانه وژنې.

نوموړې زياته کړې: « پنجاب (عرف پاکستان) دومره بې وسه دی چې د دوی په قبضه کې پښتنې او بلوڅ سیمو کې امن نشي راوستلی، بلکې د غلام قامونو امن دوی ته هېڅ مهم نه دی بلکه هلته جنګ او مرګونې پېښې د هغو سیمو د لوټلو یا د سیاحت د بدنامولو سبب ګرځي.»

د پښتین په خبره، چې پاکستان اداره پښتانه د پارلماني دوو څوکيو په جنجال یو د بل پر ضد درولي او خپلې ګټې خوندي کوي.

نوموړي ټينګار کړی، چې ولسي پاڅونونه د ظلم څخه د خلاصېدو لار ده.

هغه لیکلي: «باید په لوی لاس د ملت د قاتلانو څخه د جاهلو هیلو تمو پر ځای د حقیقت منلو هڅه وکړو، او د مفاهمت او د غټانو د ذاتي ګټو لپاره د رښتیاوو سره میکس شوي دروغجنو افکارو خپرولو پر ځای، خپل ملت ته د خپلواکۍ سمه، تاریخي او حقیقي مفکوره خپره کړو.»

منظور پښتین تر دې وړاندې هم څو ځله پر ولس ږغ کړی، چې د پاکستان د ظلمونو په وړاندې ودرېږي او خپل حق تر لاسه کړي.

د پاکستان د لومړي وزير مرستیال او د بهرنیو چارو وزیر اسحاق ډار د جمعې په ورځ (د چنګاښ ۶مه) خبريالانو ته وویل، چې پاکستان تل د فلسطین د مسلې د حل لپاره د دواړو هېوادونو د حل لارې ملاتړ کړی.

نوموړي د جمعه په ورځ خبریالانو ته د پاکستان د لاسته راوړنو او وروستيو ډېپلوماټیکو هڅو په اړه معلوماتو ورکړه.

اسحاق ډار وویل، چې پاکستان او امریکا دا مهال د تعرفو یا ګمرکي مالیو په اړه په خبرو بوخت دي او هیله یې وښوده، چې دواړه لوري به داسې يوې پايلې ته ورسيږي چې د دواړو هېوادونو په ګټه وي.

اسحاق ډار زياته کړه، چې پاکستان د هند سره هيڅ وخت نه د اوربند او نه هم د خبرو د پېل غوښتنه کړې.

هغه په دې اړه زياته کړه: «پاکستان د هند سره د ټولو مهمو لانجمنو مسایلو په ځانګړې توګه د جمو او کشمیر د شخړې په اړه د باعزته او جامع خبرو اترو لپاره چمتو دی»

اسحاق ډار ویلي، چې پاکستان به په راتلونکې میاشت کې د ملګرو ملتونو د امنیت شورا مشري په غاړه واخلي او د راتلونکې میاشتې پر ۲۲مه نېټه په نیویارک کې د وزیرانو په کچه یوه غونډه پلان شوې ده.

جنرال منیر په خپل خبرو کې د سیمې پر امنیتي ګواښونو ټینګار وکړ او ویې ویل، دغه ډلو د سیمې ثبات او امنیت له جدي ګواښ سره مخ کړی دی.

هغه د پاکستان د ملکي خدمتونو په اکاډمۍ کې د ۵۲م ګډ روزنیز پروګرام په مراسمو کې ټینګار وکړ چې پاکستان «د یو ورور اسلامي هیواد په توګه له افغانستان سره سوله ییزې اړیکې غواړي»، خو تمه لري چې کابل به د دې نیابتي شبکو د فعالیتونو مخه ونیسي.

د پاکستان د پوځ مشر له هندوستان سره وروستیو ترینګلتیاو ته په اشارې سره وویل: «هند په سیمه کې د دولتي ترهګرۍ ترټولو لوی ملاتړی دی، موږ هیڅکله د دې هیواد تسلط ته سر نه دی ټیټ کړی او هیڅکله به یې ټیټ نه کړو.»

هغه د هند حکومت د لږکیو، په ځانګړې توګه د مسلمانانو سره «تبعیضي چلند» په هند کې د افراطیت د خپریدو اصلي لامل وګاڼه، او ویې ویل، چې «په دې هیواد کې ترهګري کورنۍ ریښې لري».

جنرال منیر ادعا وکړه، چې د پاکستان هغه پوځي عملیات، چې « معرکه الحق » نومېدل، د هند د وروستیو بریدونو په وړاندې یو پرېکنده ځواب و.

د هغه په ​​وینا، دا عملیات د کشمیر د سرحدي کرښې څخه د پاکستان تر ساحل پورې غځیدلي وو او دا یې وښودله چې د پاکستان وسله وال ځواکونه د عصري ګواښونو پر وړاندې د مبارزې لپاره بشپړ چمتوالی لري.

هغه زیاته کړه: «په دې مبارزه کې، د خدای ملاتړ زموږ سره و، ځکه چې موږ د حق په خوا کې ولاړ وو.»

د یادولو وړ ده، چې طالبانو لا تراوسه د پاکستان د پوځ د مشر جنرال عاصم منیر د دې څرګندونو په تړاو کوم رسمي غبرګون نه دی ښکاره کړې، خو له دې وړاندې طالب ډلې تل د پاکستاني چارواکو د دا ډول ادعاوو په اړه ویلي دوی اجازه نه ورکوي چې د افغانستان خاوره د ګاونډیو پر وړاندې د ترهګریزو چارو لپاره وکارول شي.

د بلوچستان ایالت د پنجګور سیمي اوسیدونکي برکت مري د افغانستان انټرنشنل ـ پښتو خبریال جواد شینواري سره په مرکه کې ویلي، چې د ایران او اسراییل ترمنځ اوربند وروسته لا هم د پاکستان ـ ایران پر پوله وضعیت کې بدلون نه دی راغلی.

نوموړي ویلي، چې په ډېر کم شمېر کې د ټرازیټي موټرو پرته پر پله پلي تګ راتګ ته اجازه نه ورکول کیږي.

برکت مري وايي: «که څه هم چارواکو ولسوالۍ د موټرو د تګ راتګ لپاره پرانستې ده، خو لا هم ډېر لږ موټر تګ راتګ کوي. په پنچګور او تربت کې د خوراکي توکو بیې لوړې شوې دي.»

د پنجګور سیمي اوسیدونکي وايي، چې د ایران او اسراییل د جګړې سره سم د سیمي اوسیدونکي د سون توکو له کمښت سره مخ شوي دي.

پاکستان له ایران سره ۹۰۹ کیلومتره اوږده پوله لري او د ایران او اسراییل ترمنځ د جګړې له امله د پاکستان لوري ته د مېشتو کسانو پر اقتصاد خورا منفي اغېز اچولې.

د ایران پولې ته څېرمه د پاکستان لورې ته د مېشتو کسانو ورځنۍ کاروبار د پولې دواړو غاړو د تېلو او نورو توکو انتقال و، خو پر ایران د اسراییل له برېد وروسته پاکستان خپله پوله له ایران سره وتړله.

د بلوچستان د ګوادر اوسېدونکی صداقت بلوڅ وايي چې لا هم پر ګوادر بندر د پلي کسانو تګ راتګ بند دی، چې له امله یې خلک له سختو ستونزو سره مخ دي، اړین توکي په اسانۍ نه موندل کېږي او د خوراکي موادو بیې خورا لوړې شوې دي.

صداقت بلوڅ له افغانستان انټرنشنل ـ پشتو سره خبرو کې وویل:« سره له دې چې په پوله تګ راتګ بند دی خو په ګوادر کې وضعيت نسبتا ښه دی او ضروري توکي شته، خو نرخونه یې لوړ دي. په تفتان کې کاروباري چارې لا هم بندې دي، ځکه چې د سون توکي نشته.»

د پاکستان لوري ته د ایران پولې ته څېرمه مېشت پاکستانیان وايي، چې پر پوله د ټرانزیټ موټرو اوږده قطارونه د ایران لورې ته د تلو په تمه ولاړ دي او په دغه سوداګریزه پوله باندې لا هم وضعیت نه دی عادي شوی.

د بلوچستان اوسیدونکي دا څرګندونې په داسې حال کې کړې، چې د ایران او اسراییل ترمنځ دولس ورځنۍ جګړه څو ورځې وړاندې د دواړو هېوادونو ترمنځ په اوربند کولو سره پای ته ورسېده.

فیصل کریم کنډي د پنجشنبې په ورځ پر اېکسپاڼه لیکلي، چې د سوات غمیزه د پښتونخوا ولایتي حکومت د بیغورۍ پایله ده.

نوموړي ویلي:« د سوات سیند د مینګورې بای پاس سیمي په پېښه کې ۱۸ کسانو خپل ژوند له لاسه ورکړی او ګڼو نورو تر ډېر وخت پورې د مرستې په تمه وو، خو هېڅ بیړنۍ مرسته ورته ونه رسیده.»

نوموړي ویلي، چې د تحریک انصاف ګوند د تېرو ۱۱ کلونو راهیسې پر پښتونخوا حاکم دی، خو د خلکو د ژغورنې لپاره یې هېڅ چمتوالی نه دی نیولي.

فیصل ګنډي ویلي:« حکومت خلکو ته شا کړې او دا غمیزه د هماغه چوپتیا او بې غورۍ بیه ده. دا یوازې بې کفایتي نه، بلکي یوه شرمناکه ناکامي ده.»

دا په داسې حال کې ده، چې د پښتونخوا د بېړنیو پېښو پر وړاندې د چمتوالي ادارۍ ویلي، چې په سوات کې له تېرې ورځې راهیسې د پرلپسې اورښتونو له کبله سېلابونه راوتي او ژغورونکې ډلې هم لاس په کار شوې دي.

تردې مهاله په یادو سېلابونو کې د نږدې شل کسانو د ډوبېدو خبر ورکول شوی دی.