د افغانستان انټرنشنل ـ پښتو خبریال
د پاکستان د بلوچستان ایالت اوسېدونکي وايي، چې د ایران او اسراییل ترمنځ د جګړې له پای وروسته هم د ایران پولې ته څېرمه د بلوچستان په لرې پرتو سیمو کې وضعیت عادي حالت ته نه دی ګرځېدلی. د کاروبارونو د بندېدو له امله ځایي خلک له جدي ستونزو سره مخ دي.
د بلوچستان ایالت د پنجګور سیمي اوسیدونکي برکت مري د افغانستان انټرنشنل ـ پښتو خبریال جواد شینواري سره په مرکه کې ویلي، چې د ایران او اسراییل ترمنځ اوربند وروسته لا هم د پاکستان ـ ایران پر پوله وضعیت کې بدلون نه دی راغلی.
نوموړي ویلي، چې په ډېر کم شمېر کې د ټرازیټي موټرو پرته پر پله پلي تګ راتګ ته اجازه نه ورکول کیږي.
برکت مري وايي: «که څه هم چارواکو ولسوالۍ د موټرو د تګ راتګ لپاره پرانستې ده، خو لا هم ډېر لږ موټر تګ راتګ کوي. په پنچګور او تربت کې د خوراکي توکو بیې لوړې شوې دي.»
د پنجګور سیمي اوسیدونکي وايي، چې د ایران او اسراییل د جګړې سره سم د سیمي اوسیدونکي د سون توکو له کمښت سره مخ شوي دي.
پاکستان له ایران سره ۹۰۹ کیلومتره اوږده پوله لري او د ایران او اسراییل ترمنځ د جګړې له امله د پاکستان لوري ته د مېشتو کسانو پر اقتصاد خورا منفي اغېز اچولې.
د ایران پولې ته څېرمه د پاکستان لورې ته د مېشتو کسانو ورځنۍ کاروبار د پولې دواړو غاړو د تېلو او نورو توکو انتقال و، خو پر ایران د اسراییل له برېد وروسته پاکستان خپله پوله له ایران سره وتړله.
د بلوچستان د ګوادر اوسېدونکی صداقت بلوڅ وايي چې لا هم پر ګوادر بندر د پلي کسانو تګ راتګ بند دی، چې له امله یې خلک له سختو ستونزو سره مخ دي، اړین توکي په اسانۍ نه موندل کېږي او د خوراکي موادو بیې خورا لوړې شوې دي.
صداقت بلوڅ له افغانستان انټرنشنل ـ پشتو سره خبرو کې وویل:« سره له دې چې په پوله تګ راتګ بند دی خو په ګوادر کې وضعيت نسبتا ښه دی او ضروري توکي شته، خو نرخونه یې لوړ دي. په تفتان کې کاروباري چارې لا هم بندې دي، ځکه چې د سون توکي نشته.»
د پاکستان لوري ته د ایران پولې ته څېرمه مېشت پاکستانیان وايي، چې پر پوله د ټرانزیټ موټرو اوږده قطارونه د ایران لورې ته د تلو په تمه ولاړ دي او په دغه سوداګریزه پوله باندې لا هم وضعیت نه دی عادي شوی.
د بلوچستان اوسیدونکي دا څرګندونې په داسې حال کې کړې، چې د ایران او اسراییل ترمنځ دولس ورځنۍ جګړه څو ورځې وړاندې د دواړو هېوادونو ترمنځ په اوربند کولو سره پای ته ورسېده.
