د واشنګټن اندېښنه؛ پاکستان داسې توغندی جوړوي چې امریکا ته رسېدلی شي
د امریکا د استخباراتي معلوماتو له مخې، چې د «فارن افېرز» مجلې له خوا خپاره شوي، پاکستان دا مهال د یو داسې لویو وچو بالسټیک توغندي پر جوړولو بوخت دی چې د اتومي سرګلولو د لېږد وړتیا لري او د متحده ایالاتو خاوره هم په نښه کولی شي.
یاد پرمختګ، چې د هند د «سیندور» په نوم عملیاتو وروسته لا زیات ګړندی شوی، د واشنګټن جدي اندېښنې راپارولي دي.
د می میاشتې په جریان کې د هند له لوري پر پاکستاني زیربناوو پوځي برید وشو، چې داسې ښکاري، د پاکستان د توغنديز پروګرام پراخېدو ته یې لاره هواره کړه.
د لویو وچو بالسټیک توغندي هغه وسلې دي چې له ۵۵۰۰ کیلومترو څخه زیات واټن وهلی شي، او ډېری وخت د اتومي سرګلولو لپاره طرحه شوي وي. ځینې یې د MIRV (یعني څو هدفه خپلواکه بېرتهراګرځېدونکي وسایط) ټکنالوژي هم لري، چې کولی شي هممهاله پر څو جلا اهدافو برید وکړي.