اسحاق ډار: پاکستان تل د فلسطین د مسلې د حل لپاره د دواړو هېوادونو د حل لارې ملاتړ کوي

د پاکستان د بهرنیو چارو وزیر اسحاق ډار یو ځل بیا د پاکستان پر دريځ ټينګار وکړ، چې اسرایيل به تر هغې په رسمیت ونه پېژني تر څو چې د فلسطين د مسلې د حل لپاره دواړه هېوادونه حل لارې ته ونه رسيږي. نوموړي ویلي، چې فلسطین باید یو خپلواک، د بقا وړ او پر ځان بسیا دولت اوسي.

د پاکستان د لومړي وزير مرستیال او د بهرنیو چارو وزیر اسحاق ډار د جمعې په ورځ (د چنګاښ ۶مه) خبريالانو ته وویل، چې پاکستان تل د فلسطین د مسلې د حل لپاره د دواړو هېوادونو د حل لارې ملاتړ کړی.

نوموړي د جمعه په ورځ خبریالانو ته د پاکستان د لاسته راوړنو او وروستيو ډېپلوماټیکو هڅو په اړه معلوماتو ورکړه.

اسحاق ډار وویل، چې پاکستان او امریکا دا مهال د تعرفو یا ګمرکي مالیو په اړه په خبرو بوخت دي او هیله یې وښوده، چې دواړه لوري به داسې يوې پايلې ته ورسيږي چې د دواړو هېوادونو په ګټه وي.

اسحاق ډار زياته کړه، چې پاکستان د هند سره هيڅ وخت نه د اوربند او نه هم د خبرو د پېل غوښتنه کړې.

هغه په دې اړه زياته کړه: «پاکستان د هند سره د ټولو مهمو لانجمنو مسایلو په ځانګړې توګه د جمو او کشمیر د شخړې په اړه د باعزته او جامع خبرو اترو لپاره چمتو دی»

اسحاق ډار ویلي، چې پاکستان به په راتلونکې میاشت کې د ملګرو ملتونو د امنیت شورا مشري په غاړه واخلي او د راتلونکې میاشتې پر ۲۲مه نېټه په نیویارک کې د وزیرانو په کچه یوه غونډه پلان شوې ده.