د یوه سند له مخې، چې افغانستان انټرنشنل ته رسېدلی، طالبانو د کندهار په عینو مېنه کې د ۳۵۰ بستریز روغتون روغتیايي او نور پرسونل ته خبرداری ورکړی، چې له دې وروسته خپلې ږیرې ونه خرېیي. د یاد روغتون ځینو کارکوونکو وویل چې طالبانو له دندو د شړلو ګواښ ورته کړی.
د کندهار په عینو مېنه کې د ۳۵۰ بستریز روغتون د روغتیايي برخې ځینو کارکوونکو نن یکشنبه د چنکاښ ۸مه افغانستان انټرنشنل ته وویل چې د کندهار امربالمعروف ریاست د روغتون په انګړ کې د ږېرې پرېښودو په اړه اعلان ځړولی دی.
طالبانو په دغه مکتوب او اعلان کې د عبدالله بن عمر یو روایت رانقل کړی، چې «له مشرکانو سره مخالفت وکړئ، ږیرې پرېږدئ (یا یې اوږدې کړئ) او شونډۍ (بریتونه ) پرې کړئ».
د کندهار امربالمعروف ریاست په دغه مکتوب کې لیکلي، «ټولو ته خبر ورکول کېږي چې خپل ځانونه د شریعت او سنت مطابق برابر کړئ ځکه چې ږېره کمول او خرېیل دواړه ګناه ده».
یاد ریاست خبرداری ورکړی چې د امر نه منلو په صورت کې به قانوني چلند کېږي اوبیا څوک د شکایت حق نه لري.
د مکتوب په پای کې لیکل شوي، چې د کندهار عینو مېنې د ۳۵۰ بستریز روغتون ادارې له ټولو صحي او غیر صحي کارکوونکو سره د کندهار ولایت د امربالمعروف او نهی عن المنکر ریاست د ږېرې پریښودو اړوند پېغام په مکتوبي شکل شریک شو.
په همدې حال کې د عینو مېنې ښارګوټي کې د ۳۵۰ بستریز روغتون ځینو ډاکترانو وویل چې د دوی د نومونو لېست اخیستل شوی او ضمانتونه ورڅخه اخیستل شوي، چې ږېرې به پرېږدي.
د یاد روغتون یو ډاکتر وايي، «طالبانو چلند له موږ سره غیر انساني دی، دوی د یو ډاکتر خیال هم نه ساتي، دوی داسې فکر کوي چې څوک ږېره نه پرېږدي هغه د اسلام له دایرې وځي.»
د روغتون ځینې نور کارکوونکي وايي چې د طالبانو امربالمعروف کسان د مېرمنو پر وارډونو ګرځي او ښځینه پرسونل ته وايي چې «تاسې باید د سړیو وارډونو ته لاړې نه شئ او د کار په وخت کې به حجاب کوئ».
