طالبان وايي په کندز کې یې ۵۰۳ جریبه غصب شوې دولتي ځمکه را ګرځولې

د طالبانو د عدلیې وزارت وايي، د غصب شویو ځمکو قضیو ته د رسېده ګۍ ځانګړې محکمې د کندز ولایت د امام صاحب ولسوالۍ په حلقه کول سیمه کې له څیړنو وروسته پریکړه وکړه چې دغلته څه باندې ۵۰۳ جریبه ځمکه دولتي ده او باید د دولت ملکیت وګرځول شي.

یاد وزارت نن چهارشنبه « د چنګاښ۱۱مه» په یوه خبرپاڼه کې ویلي، چې « د امارتي زون د ځانګړې محکمې دغه پریکړه د ځمکو د غصب د مخنیوي قانون د ۱۷مې مادې له مخې کړې ده».

د خبرپاڼې د معلوماتو له مخې، محکمې د اسنادو، املاکي دفترونو او اړوندو ادارو له څېړلو وروسته دا پریکړه وکړه چې یاده ځمکه باید د غصب مخنیوي کمیسیون ته وسپارل شي، څو له هغوی سره د ځمکو په بانک کې ثبت او په قانوني ډول ترې استفاده وشي.

په خبره پاڼه کې ویل شوي چې د طالبانو د پالیسۍ له مخې ، د غصب شویو دولتي ځمکو د بیرته راګرځولو لړۍ په ټولو ولایتونو کې په چټکې روانه ده او د همدې هدف لپاره په څلورو زونونو کې ځانګړې محکمې او په هر ولایت کې تخنیکي پلاوي هم ټاکل شوي دي.