سیمهییزو سرچینو افغانستان انټرنشنل ته ویلي، چې طالبانو د بدخشان په خاش ولسوالۍ کې د وروستیو لاریونونو په تړاو ۳۷ کسان نیولي دي. سرچینو ویلي، چې د خاش ولسوالۍ بازار تړلی دی او طالبان له خلکو سره ناوړه چلند کوي.
په خاش ولسوالۍ کې د طالبانو د ډزو له امله په وروستیو لاریونونو کې لږ تر لږه ۷ کسان وژل شوي او ۲۷ نور ټپیان شوي دي.
د بدخشان په خاش ولسوالۍ کې لاریونونه او نښتې وروسته له هغه پیل شوې، چې طالبانو غوښتل د کوکنارو کروندې ویجاړې کړي. د طالبانو دغه اقدام د ځایي اوسېدونکو له پراخ مخالفت سره مخ شو او د نښتو لامل شو.
د بدخشان په یوه سیمهییز روغتون کې سرچینې وايي، چې د طالبانو لهخوا د دوشنبې په ورځ د یوې ښځې په ګډون شپږ کسان او د سې شنبې په ورځ یو کس ووژل شو.
سرچینو د پنجشنبې په ورځ (د چنګاښ ۱۲مه) افغانستان انټرنشنل ته ویلي، په تېرو دوو ورځو کې ۳۷ کسان نیول شوي چې ډېری یې د کلیو مشران او هغه خلک دي چې د طالبانو پر ضد لاریونونو کې یې برخه اخیستې وه.
د افغانستان انټرنشنل لهخوا د ترلاسه شویو معلوماتو له مخې؛ بندیان د چورلکې پر مټ د بدخشان مرکز فیض اباد ته لېږدول شوي دي.
طالبانو لاتر اوسه په رسمي ډول په دې اړه څه نه دي ویلي.
