اروپايي اتحادیې د ایران د حکومت د مخالفینو د وژنې هڅو په تور، پر اتو کسانو او یوې شبکې بندیزونه ولګول. د اتحادیې په وینا، «زندشتي شبکه» چې له ایراني استخباراتو سره تړاو لري، له هېواده بهر د ایران ددولت مخالفان په نښه کوي.
د شبکې مشر نجي ابراهیم شریفي زندشتي او د قدس ځواک د ۸۴۰مې واحد مشر محمد انصاري هم په دې بندیزونو کې شامل دي. اروپايي اتحادیې دا کار د بشري حقونو د جدي سرغړونو په غبرګون کې کړی دی.
د پاکستان د پوځ د عامه اړیکو دفتر وايي چې د اندونیزیا دفاع وزیر جنرال جافري سجام سوالدین د سې شنبې په ورځ په راولپنډۍ کې د پوځ په مرکزي قوماندانۍ کې د پاکستان د پوځ له لوی درستیز فیلډ مارشال عاصم منیر سره وکتل او د پوځي اړیکو د پیاوړتیا په اړه یې خبرې وکړې.
د پاکستان د پوځ د عامه اړیکو له دفتره په خپره شوې خبرپاڼه کې لیکل شوي، چې دواړو خواوو د سیمه ییز امنیت، دفاعي همکارۍ او د دوه اړخیزو پوځي همکاریو د زیاتولو لپاره د لارو چارو په اړه نظرونه تبادله کړل.
په دې غونډه کې د دواړو هېوادونو ترمنځ په سیمه کې د سولې او ثبات د ډاډمنولو لپاره په متقابلې همکارۍ ټینګار شوی.
د پاکستان پوځ وايي، د پاکستان لوي درستیز عاصم منیر په سیمه کې د سولې او ثبات د ساتلو لپاره د متقابلې همکارۍ پر اهمیت خبرې وکړې.
د پاکستان د پوځ د عامه اړیکو دفتر د اندونیزیا د دفاع وزیر په حواله لیکلي، چې نوموړي په ترهګرۍ ضد جګړه کې د پاکستان د پوځ د رول ستاینه کړې ده.
د روسیې بهرنیو چارو وزیر سرګي لاوروف ویلي، مسکو غواړي پوه شي چې د امریکا د ولسمشر ډونالډ ټرمپ د هغو څرګندونو تر شا څه انګېزه ده، چې ویلي یې دي روسیه باید د ۵۰ ورځو په موده کې له اوکراین سره د سولې تړون ته غاړه کېږدي.
لاوروف دا څرګندونې د سېشنبې په ورځ د چین په تیانجین ښار کې د شانګهای د همکاریو سازمان د بهرنیو چارو وزیرانو د ۲۵مې ناستې پر مهال وکړې او زیاته یې کړه چې شک نه لري، روسیه به د هر ډول نویو بندیزونو مقابله وکړي.
بلخوا د روسیې د بهرنیو چارو مرستیال وزیر سرګي ریابکوف هم د سېشنبې په ورځ وویل، مسکو لا هم د اوکراین د شخړې د حل لپاره ډیپلوماسي غوره لاره ګڼي او خبرو ته لار خلاصه ده.
ریابکوف د روسیې دولتي خبري اژانس «تاس» سره په یوه تازه مرکه کې، د ټرمپ د وروستیو څرګندونو په غبرګون کې وویل: «روسیه هېڅ ډول ګواښونه یا شرطونه نهمني. موږ دا روښانه کوو چې هر ډول فشار، په ځانګړي ډول شرط، زموږ لپاره د منلو وړ نهدی.»
ریابکوف ټینګار وکړ چې باید سیاسي او ډیپلوماټیکې هڅې لا زیاتې شي او یو ځل بیا یې د ولسمشر ولادیمیر پوتین دا دریځ تکرار کړ چې روسیه خبرو ته چمتو ده او د شخړې سولهییز حل غواړي.
خو نوموړي خبرداری ورکړ، چې که د خبرو هڅو ته مثبت ځواب ور نهکړای شي، نو مسکو به خپلې نظامي موخې د ځانګړو پوځي عملیاتو له لارې تعقیب کړي. هغه زیاته کړه: «زموږ دا دریځ نهبدلېدونکی دی. موږ غواړو چې واشنګټن او ناټو دا مساله جدي ونیسي.»
ټرمپ د دوشنبې په ورځ اعلان وکړ، چې واشنګټن به له کیېف سره د وسلو مرستې ته دوام ورکړي، خو دا به د اروپايي تمویل تر شرط لاندې وي او دا به د ناټو په همغږۍ ترسره کېږي.
نوموړي همداراز ګواښ وکړ، چې که د ۵۰ ورځو دننه د اوکراین جګړه پای ته ونهرسیږي، نو پر روسیه او د هغې پر تجارتي شریکانو به سل سلنه وارداتي تعرفې ولګوي.
د طالبانو د بهرنیو چارو وزیر له بهر څخه د نشهيي توکو قاچاق د افغانستان لپاره یو جدي ګواښ وباله او له نړيوالې ټولنې یې وغوښتل چې د یادې ستونزې د حل لپاره عملي ګامونه واخلي. متقي له نشه يي توکو سره د مبارزې پر نه سیاسي کېدو ټینګار کړی.
نوموړي دا څرګندونې د ملګرو ملتونو د مخدره توکو او جرمونو د دفتر (UNODC)عملیاتي رییس بو ماتیاسن سره لیدنه کې کړې.
د طالبانو د بهرنیو چارو وزارت وايي، چې د (UNODC) دفتر عملیاتي رییس افغانستان ته خپل سفر مهم بللی او «د نشه یي توکو پر وړاندې یې د طالبانو اقدامات ستایلي.»
متقي د نشه يي توکو پر وړاندې مبارزه تاریخي یاده کړې او پر نړیوالو یې غږ کړی، چې افغان کروند ګرو ته د بدیل معیشت، د عایداتو قانوني سرچینې برابرولو او د مالدارۍ، کرنې او کوچنیو تولیدي فعالیتونو د رامنځته کولو په برخه کې همکاري ترسره کړي.
د طالبانو د یاد وزارت له قوله، دواړو خواوو پرېکړه کړې، چې له نشه يي توکو سره مبارزه سیاسي نه شي.
فایننشل ټایمز ورځپاڼې د سې شنبې په ورځ راپور ورکړی، چې د امریکا ولسمشر ډونالډ ټرمپ په پټه اوکراین هڅولی چې د روسیې په سیمو کې بریدونه زیات کړي. نوموړي له ولسمشر ولادیمیر زېلینسکي پوښتنه کړې چې که امریکا اوږدواټنه وسلې ورکړي، ایا اوکراین مسکو ویشتلای شي؟.
ورځپاڼې د دوو هغو کسانو له قوله چې د خبرو له جزئیاتو خبر دي، لیکلي، چې ټرمپ له پوتین سره تر خبرو وړاندې د جولای پر څلورمه له زېلېنسکي سره ټیلیفوني خبرې کړې وې.
فایننشل ټایمز لیکلي، چې ټرمپ د دغې اړیکې پر مهال له زېلېنسکي سره دا موضوع هم شریکه کړې، چې ښایي امریکا ورته د « ATACMS» نومي اوږد واټن ویشتونکي توغندي ورکړي.
بل خوا ټرمپ پوتین ته هم ۵۰ ورځې وخت ورکړی چې د اوکراین جګړه پای ته ورسوي.
د روسیې ولسمشرۍ یا کرملېن ماڼۍ وايي، د امریکا د ولسمشر ډونالډ ټرمپ وروستۍ څرګندونې چې د روسي صادراتو پر پېرېدونکو د بندیز ګواښ هم پکې شامل دی، جدي دي او باید په پوره دقت وڅېړل شي.
ډونالډ ټرمپ په اوکراین کې د روانې جګړې په تړاو له ولادیمیر پوتین څخه خپله ناهیلي څرګنده کړې او پرون یې اوکراین ته د نورو وسلو د ورکړې اعلان وکړ او همداراز یې خبرداری ورکړی چې که روسیه له اوکراین سره د سولې هوکړې ته غاړه کښېنږدي، نو د روسي صادراتو پېرېدونکي به هم له بندیزونو سره مخ شي.
د روسیې او ولسمشر پوتين په تړاو د ولسمشر ټرمپ د وروستیو څرګندونو په تړاو د کرملېن ماڼۍ ویاند دیمتري پیسکوف ویلي، "د امریکا د ولسمشر څرګندونې ډېرې جدي دي. ځینې یې مستقیماً د ولسمشر پوتین په اړه دي. موږ ته خامخا وخت په کار دی چې دا خبرې په دقت سره تحلیل کړو. که چېرې ولسمشر پوتین لازمه وبولي، نو خامخا به غبرګون وښیو."
نوموړي کېیف ته د نورو وسلو لېږد ته په اشارې سره وویل، "په واشنګټن، ناټو هېوادونو او په ځانګړې توګه بروکسل کې چې کومې پرېکړې کېږي، د اوکراین د سولې نه، بلکې د جګړې د دوام نښې ګڼل کېږي."
د روسیې د ولسمشرۍ ماڼۍ ویاند یو ځل بیا په ټينګار سره وویل، روسیه لا هم له اوکراین سره مخامخ خبرو لپاره چمتو ده او د کېیف له لوري د خبرو بیا پیل ته په تمه ده.
د امریکا ولسمشر ډونالډ ټرمپ پرون ګواښ وکړ چې که له روسیې سره د اوکراین د جګړې د ختمېدو لپاره په ۵۰ ورځو کې کومه موافقه ونه شي، نو پر مسکو به ۱۰۰ سلنه ګمرکي تعرفې ولګوي.