په اسلاماباد کې یو شمېر سرچینو افغانستان انټرنشنل-پښتو ته ویلي چې پاکستاني پولیس نن (شنبه، چنګاښ ۲۸مه) د «بي۱۷ ښارګوټي» په ګډون یو شمېر نورو سیمو ته د افغانانو نیولو پسې ورغلي دي. سرچینې وایي، په دغه ښارګوټي کې پولیسو یو شمېر افغان کورنۍ هم نیولي او له ځان سره یې بيولي دي.
په دې نیول شویو افغانانو کې ډېری یې د لوېدیځو هېوادونو د کډوالۍ پروګرام لرونکي شامل دي. همداراز په یاد ښارګوټي کې د امریکا پخواني افغان متحدین چې د پناه غوښتنې قضیې لري هم ژوند کوي.
د پولیسو له لوري په تازه نیول شویو کسانو کې ماشومان او ناروغه مېرمنې هم شاملې دي. هممهاله اسلاماباد افغانانو ته د ویزو د تمدید یا نوي کېدو بهیر هم په ټپه درولی او د ډېری افغانانو د ویزو موده هم پای ته رسېدلې ده.
په اسلام اباد کې د یو لوېدیځ هېواد په تمه ناست افغان محمد سعید (مستعار نوم) وایي، اولادونه او مېرمن یې له سختې وېرې سره مخ دي او که افغانستان ته ډیپورټ شي، نو ښايي د طالبانو له لوري له سختو ګواښونو سره مخ شي.
هغه زیاته کړه: «افغانستان ته شړل بېخي مونږ ته مرګ دی، د ډانګ او پړانګ ترمنځ ګېر یو. پاکستان له یوې خوا راباندې ویزې بندې کړې او له بلې خوا مو پولیس د کورونو دروازې را ټکوي».
تازه د پاکسان د کورنیو چارو وزیر محسن نقوي هم له خبریالانو سره په یوې شخصي ناسته کې خبرداری ورکړی چې د افغان کډوالو داېستل کېدو تازه او ګړندۍ څپې به ډېر ژر پیل کړي. د نوموړي په خبره، نور اسلام اباد د افغان کډوالو د اوسېدو لپاره د هېڅ ډول مودې غځولو تابیا نه لري.
پاکستان د اپرېل میاشتې له لومړۍ نېټې نه د افغان کډوالو د اېستل کېدو بهیر پیل کړی، خو له تېرې یوې میاشتې راهیسې کرار شوی او اټکل کېږي چې دا لړۍ به ډېر ژر بېرته چټکه شي. په ورته وخت کې ایران هم په تېره میاشت کې له خپل هېواده د افغانانو د اېستل کېدو بهیر پیل کړی چې تر دې دمه شاوخوا ۶ سوه زره افغانان یوازې په یوه میاشت کې په جبري ډول افغانستان ته ستانه کړای شوي دي.
د افغانستان پخواني ولسمشر محمد اشرف غني به خپل تازه پېغام کې خبرداری ورکړی و چې ایران او پاکستان نور د کډوالو د ساتلو څخه کومه ګټه نه وړي چې له همدې کبله به تر ۶مېلیونه پورې افغانان په جبري توګه خپل هېواد ته ستانه کړای شي.
د بشري حقونو یو شمېر نړۍوالو سازمانونو اندېښنه ښودلې چې لا وار دمخه افغانستان د طالبانو په واکمنۍ کې له بشري ناورین، لوږې او فقر سره مخ دی چې د دغو تازه دمو ورستنېدونکو سره به دغه بحران لا پسې پراخ شي.
