د طالبانو د بهرنیو چاور وزارت درېیم سیاسي مرستیال عبدالحی قانت وایي، په تېرو څو لسیزو کې افغانستان د خپل جغرافیایي موقعیت له کبله د لویو لوبو د جګړې قرباني و، خو اوس دې حالت بدلون کړی او د جنګ محور نورو سیمو ته لېږدول شوی دی.
نوموړي د شنبې په ورځ د (چنګاښ ۲۸مه) پر خپله اېکسپاڼه زیاته کړې چې افغانانو د خپلو پرلهپسې قربانیو او مقاومت هغه سټراټېژۍ ناکامې کړې چې لویو قدرتونو غوښتل پراخ نفوذ ترلاسه کړي. د هغه په وینا، اوس مهال چې د جګړې اور نورو سیمو ته انتقال شوی «افغانستان باید د اقتصادي سیالیو پر محور» بدل شي.
د طالبانو یاد غړي لیکي: «مونږ د دې توانایي لرو چې افغانستان د جګړو، نا امنیو او نظامي رقابتونو په ځای د اتصال، ټرانزیټ او تجارت مرکز جوړ کړو». پر کابل واکمنه ډله چې له نړۍوالې انزوا سره مخ ده او له روسیې پرته ان خپل نږدې متحد پاکستان هم په رسمیت نه دي پېژندلي د منځنۍ اسیا له هېوادونو سره یې اړیکې خوږې کړي دي.
باورونه دا دي چې د منځنۍ اسیا هېوادونه د افغانستان له خاورې د ورپېښو ګواښونو د مهارولو او مخنېوي لپاره اړ شوي، څو له طالبانو سره تعامل ته غاړه کېږدي. همدا تېره ورځ د پاکستان، ازبکستان او طالبانو ترمنځ د افغان ټرانس پروژې د رېل پټلۍ امکان سنجۍ د مطالعاتو اړونده یو هوکړه لیک هم لاسلیک شو.
اسلام اباد او تاشکند دې هوکړه لیک ته خوښي څرګنده کړې او افغانستان یې د منځنۍ او جنوبي اسیا ترمنځ غوره نښلوونکی هېود بللی دی.
