د خوست ځایي اوسېدونکي افغانستان انټرنشنل-پښتو ته خبر ورکوي، چې په دغه ولایت کې د غلام خان بندر لاره د مساپرو پر مخ وتړل شوه. د دوی په وینا؛ نوموړې لاره د پاکستاني اړخ لهخوا افغانانو لپاره د ویزو جبريکېدو په موخه تړل شوې.
ورسره جوخت، په غلام خان بندر کې باوري سرچینو افغانستان انټرنشنل-پښتو ته ویلي، چې پاکستان غواړي پر دغې لاره د تګ راتګ لپاره ویزه او پاسپورټ لازم او جبري کړي.
د سرچینو په وینا؛ تر دې مخکې پر همدې لار ناروغانو د ټوکن په واسطه تګ راتګ کاوه.
سرچینو زیاته کړې، لا تراوسه روښانه نهده چې پر دغې لارې به سوداګریزو موټرو ته هم اجازه ورکړل شي او که نه.
د ویلو ده، چې څو اوونۍ وړاندې هم دغه لار د پاکستان لهخوا د څو ورځو لپاره د هر ډول تګ راتګ پر مخ تړل شوې وه.
د روانې چنګاښ میاشتې په لومړۍ اوونۍ هم په خوست ولایت کې د طالبانو ځایي چارواکو ویلي و، چې د غلام خان بندر لاره د پاکستان لهخوا تر بلې خبرتیا پورې تړل شوې ده.
خو د طالبانو د سرحدي پولیسو ویاند عابدالله فاروقي هغه مهال ویلي و، چې د غلام خان بندر لاره به د ( چنګاښ له ۲۵مې) څخه تر راتلونکو ۱۵ ورځو د بار وړونکو موټرو لپاره خلاصه وي.
