د سوداګرۍ او پانګونې خونې مشر د افغانستان او ازبکستان د خصوصي سکټورونو تر منځ د ۲۰ میلیونه ډالرو په ارزښت د ۴۵ سوداګریزو هوکړو د لاسلیک په مراسمو کې وویل، تر هغو چې افغان سوداګرو ته د ویزو په برخه کې لازمې کونسلي اسانتیاوې برابرې نه شي، نو سوداګري په رښتیني توګه نه شي پراخېدای.
د سوداګرۍ او پانګونې خونې مشر سید کریم هاشمي په همدې تړاو جوړو شویو مراسمو کې وویل: «د ترجیحي سوداګرۍ هوکړهلیکونو د افغانستان او ازبکستان ترمنځ د سوداګرۍ د ودې لپاره هیلې زیاتې کړي، خو تر هغو چې د ویزو په برخه کې لازمې کونسلي اسانتیاوې برابرې نه شي، سوداګري په رښتیني توګه نه شي پراخېدای.»
په همدې مراسمو کې چې نن (یکشنبه د زمري۱۲مه) په کابل کې جوړه شوې وه، د طالبانو د صنعت او سوداګرۍ وزارت سرپرست نورالدین عزیزي وویل، دوی غواړي چې له ازبکستان سره د سوداګرۍ کچه تر ۳ میلیارده ډالرو لوړه کړي.
له دې سره سم، په کابل کې د ازبکستان سفیر ایبک عثمانوف له کابل سره د تاشکند ژمنو او همکاریو ته په نغوتې سره وویل، د روان کال په لومړۍ نیمایي کې تاشکند ته د کابل صادرات درې برابره زیات شوي دي.
د افغانستان د سوداګرۍ او پانګونې خونې مرستیال محمد یونس مهمند هم وویل، افغانستان باید له ترکمنستان، ازبکستان، ترکیې، قزاقستان او اذربایجان سره د سوداګرۍ په برخه کې یوه سیمه ییزه ګډه خونه ولري.
په افغانستان کې د تېر نظام له رانسکورېدو وروسته ډېریو هېوادونو افغانانو او په ځانګړې توګه افغان سوداګرو ته د ویزې ورکړې بهیر په بشپړ ډول ودراوه او دغه وضعیت بیا د افغان سوداګرو پر کاروبار منفي اغېز وکړ.
سوداګر له نږدې څلورو کلونو راهیسې له طالبانو او اړوندو هېوادونو غواړي، چې د ویزې په برخه کې له دوی سره همکاري وکړي څو په خپله په نندارتونونو او همداراز سوداګریزو چارو کې ښکېل واوسي، خو داسې ښکاري چې لا تر اوسه دغې غوښتنې ته هېڅ لوري پرېکنده مثبت ځواب نه دی ویلی.
په ترلاسه شوې ویډیو کې ښکاري، چې د طالبانو د ننګرهار د خارجه چارو ګوښه شوی رییس مولوي فضل الهادي په تختخواب کې پروت دی او په یوه ویډیويي کال کې پر خپله لوڅه کړې تناسلي اله لاسونه وهي.
له دې ويډیو څخه د طالبانو ځینې مشران خبر شوي او د نوموړي د ګوښه کولو پرېکړه یې کړې ده.
د طالبانو د ننګرهار ولایت مقام د رسنیو دفتر اعلان وکړ، چې د ولایت دفتر رییس شاهد نوراني له لوري د ننګرهار د خارجه چارو نوی رییس مولوي جان محمد انقلابي مسوولینو ته ور وپېژندل شو.
په دغو مراسمو کې ګوښه شوي رییس مولوي فضل الهادي احمد هم حضور درلود.
د طالبانو د ننګرهار ولایت مقام په اعلامیه کې لیکل شوي، چې شاهد نوراني د پخواني ګوښه شوي رییس مولوي فضل الهادي احمد د کړنو ستاینه کړې ده.
خو افغانستان انټرنشنل ته د طالبانو سرچینې وايي، چې نوموړی د اداري معمول له مخې له دندې نه دی ګوښه شوی، بلکې د ویډیو له خپرېدو وروسته پرېکړه وشوه، چې نوموړی له ننګرهار څخه تبدیل او په پکتیا کې د برېښنا رییس وټاکل شي.
دوه کاله وړاندې افغانستان انټرنشنل یوه ویډیو ترلاسه کړه، چې د کابل د برېښنا شرکت رییس ملا احمد له خپل ساتونکي سره په بستره کې د څملاستلو په حالت کې ښيي.
د دې ویډیو له خپرېدو درې ورځې وروسته د زمري پر ۳۱مه طالبانو ملا احمد اخوند کندهار ته وغوښت، خو وروسته د نوموړي دا تګ «کورنۍ ستونزه» وبلل شوه.
د طالبانو نظامي محکمې تېره میاشت ملا احمد ته "له خپل ساتونکي سره د څملاستو" له قضیې برائت ورکړ.
طالبان له تېرو څو کلونو راهیسې د افغانستان په مختلفو ولایتونو کې خلک د مختلفو جرمونو په تېره د غلا، زنا او لواطت په تور په دُرو وهي، خو د دې ډلې مختلف چارواکي د کابل او کندهار په ګډون په مختلفو ولایتونو کې په ورته تورونو نیول شوي مګر تر اوسه یوه ته هم سزا نه ده ور کړل شوې.
د طالبانو منتقدان دا په دې ډله کې له شرعي احکامو نه د ځان او نورو لپاره دوه ګونی تفسیر او چلند ګڼي.