په خیبر پښتونخوا کې سرچېنې وایي، چې د دغه ایالت د کرک ولسوالۍ په امان کوټ سیمه کې د وسلهوالو په برید کې څلور پاکستاني پوځیان وژل شوي دي. دغه پېښه هغه مهال شوې، چې د اېف سي ځواکونو یو موټر د وسلهوالو له کمین سره مخ شو.
سرچینو نن چهارشنبه (د زمري ۱۵مه) افغانستان انټرنشل- پښتو ته ویلي، چې په دغه پېښه کې وژل شوي ټول کسان د اېف سي ځواکونه دي.
سرچینې وسلهوالو ته د اوښتې مرګ ژوبلې په اړه څه نه دي ویلي.
تر دې دمه د دغه برید مسوولیت چا نه دی منلی او رسمي سرچینو هم په دې اړه جزییات نه دي ورکړي.
دوو عراقي پانګوالو د طالبانو د اوبو او انرژۍ وزارت سرپرست ته د برېښنا د تولید لپاره یوه داسې نوې دستګاه معرفي کړه، چې په دې وروستیو کې د هغوی له لورې اختراع شوې او د برېښنا د تولید لپاره سرچینو ته اړتیا نه لري.
د دغو عراقیانو په وینا، دغه دستګاه د تېلو، ګاز، اوبو او نورو سرچینو له اړتیا پرته برېښنا تولیدوي او دوی غواړي، چې په افغانستان کې له دغې نوې دستګاه څخه په استفادې د انرژۍ پروژو په تولید کې پانګونې وکړي.
د دغه وزارت د خبرپاڼې له مخې، د اوبو او انرژۍ وزارت سرپرست په دې کتنه کې له دغه نوښت او په افغانستان کې د انرژۍ پراختیا لپاره د یادو عراقیانو د لېوالتیا هرکلی وکړ او ټینګار یې وکړ، چې دغه وزارت د دې پانګونې لپاره د همکارۍ او اړینو زمینو د برابرولو لپاره تیار دی.
د طالبانو د برېښنا شرکت اجراییه رييس تېره اوونۍ د خپلو یو کلنو لاسته راوړنو د تشرېح په پروګرام کې وویل، د افغانستان ۸۰ سلنه برېښنا د منځنۍ اسیا له هېوادونو او ایرانه راواردوي او اوسمهال د هېواد ۴۰ سلنه نفوس برېښنا ته لاسرسی لري، خو هغه هېوادوال چې برېښنا لري د برېښنا له دوامداره پرچاویو شکایت لري.
د خېبرپښتونخوا د حکومت تر مشرۍ لاندې، د کشمیر د استحصال پر ضد نن د پېښور په مرکزي سیمو کې یو ستر لاریون ترسره شو، چې پکې د بېلابېلو ټولنیزو، سیاسي او تعلیمي قشرونو ګڼ شمېر کسانو ګډون کړی و.
دا لاریون، چې د لومړي وزیر له کور څخه د والي تر دفتره پورې وغځېد، د خیبرپښتونخوا د والي فیصل کریم کنډي او د اطلاعاتو سلاکار محمد علي سیف په مشرۍ ترسره شو. د لاریون ګډونوالو "کشمیر به پاکستان شي" او "پاکستان زنده باد" شعارونه ورکول.
په دغه لاریون کې د حکومتي چارواکو ترڅنګ، د ښار د مختلفو برخو اوسېدونکو، د ښوونځيو او پوهنتونونو زدهکوونکو او د ولسوالیو استازو پراخ ګډون کړی و.
د خېبرپښتونخوا والي فیصل کریم کنډي په خپله وینا کې وویل: «نن یوازې پاکستان نه، بلکې د نړۍ په کچه له کشمیري ولس سره د یووالي غږ پورته کېږي.»
هغه د نړیوالو طاقتونو پر دوهمخې تګلارې نیوکه وکړه او وې ویل: "د نړۍ لوی قوتونه چې د اسراییل ملاتړ کوي، د کشمیر پر مظلومو خلکو بیا مطلق چوپ پاتې دي."
فیصل کنډي همداراز وویل چې پاکستان په سفارتي ډګر کې هند ګوښه کړی دی او دا هېواد باید له جنګي هڅو څخه ډډه وکړي.
هغه خبرداری ورکړ:"نړۍ دې موږ د جګړې پر لور نه هڅوي، ځکه موږ ته نه ښايي چې د خپلو کشمیري وروڼو له درده بېپروا پاتې شو."
د خېبرپښتونخوا د اطلاعاتو سلاکار محمد علي سیف په خپلو څرګندونو کې وویل چې هند غواړي کشمیر په زور لاندې کړي، خو د کشمیریانو مبارزه به ادامه ولري.
نوموړي زیاته کړه: «هند په یو اړخیز ډول غواړي کشمیر لاندې کړي، خو دا تحریک به د مودي د ناوړه ارمانونو قرباني نه شي.»
سیف زیاته کړه، چې مودي باید له صحنې لیرې شي، ځکه د ده موجودیت د ظلم استازیتوب کوي.
هغه دا هم وویل چې د ملګرو ملتونو په ګډون، نړیوالو ته دا خبره روښانه شوې چې د کشمیر قضیه بېعدالتی ده.
کشمیر یوه لانجمنه سیمه ده، چې له ۱۹۴۷م کال راهیسې د هند او پاکستان ترمنځ د شخړې مهمه موضوع پاتې شوې. له وېش وروسته، دواړو هېوادونو پر دغه سیمه دعوه وکړه، چې د درې جګړو سبب هم شوې ده. دا مهال کشمیر په دوو برخو وېشل شوی، یوه برخه یې د هند تر ولکې لاندې ده چې "جمو او کشمیر" بلل کېږي او بله برخه یې د پاکستان تر ادارې لاندې ده، چې پاکستاني چارواکي ورته "ازاد کشمیر" وایي.
د یوه سند له مخې چې افغانستان انټرنشنل ترلاسه کړی، د خېبر تېرا درې د اپريدي بر قمبرخېل قوم او تحریک طالبان پاکستان ترمنځ له څو ورځنیو خبرو وروسته، پرېکړه شوې چې ټيټيپي به نور د خېبر تیرا درې په اپریدي قوم استوګنیزو سیمو کې د پاکستاني پوځ پر وړاندې عملیات نه کوي.
د تحریک طالبان پاکستان د سولې له خبرو اترو وروسته یوه پرېکړه لیک خپور کړی دی.
د پرېکړهلیک په لومړۍ ماده کې راغلي، چې د تحریک طالبان پاکستان (ټيټيپي) وسلوال به د خېبر تېراه اړوند د اپریدو برقمبرخېل قوم په استوګنیزو سیمو کې پر پاکستاني پوځیانو برید یا عملیات نه کوي. خو که پاکستاني ځواکونه د ټيټيپي پر ضد عملیات پیل کړي، نو دوی به د خپل ځان د دفاع لپاره جګړه کوي.
په دویمه ماده کې راغلي، چې د ټيټيپي وسلوال به د تېرا برقمبرخېل له قوم څخه عشر نه اخلي او په درېیمه ماده کې راغلي چې د ټي ټي پي وسلوال به په قومي مسایلو کې مداخله نه کوي.
همداراز په څلورمه ماده کې راغلي چې د ټيټيپي وسلوال هېڅ حق نه لري څوک شکنجه کړي، خو د برقمبرخېل قوم به د هغو کسانو مخه ونیسي چې له پاکستاني پوځیانو سره په بېلابېلو برخو کې همکاري کوي.
د تړون په پنځمه ماده کې ویل شوي، په کومو وژنو کې چې د ټيټيپي غړي ښکېل وي، باید د یادې ډلې کمېسیون ته رسمي عریضه وسپارل شي.
دا لومړی ځل دی چې د خېبر په تېرا کې د اپریدي برقمبرخېل قوم او د ټي ټي پي ترمنځ د امن تړون ترسره کېږي.
د تحریک طالبان پاکستان او قومي مشرانو ترمنځ د یکشنبې په ورځ د خبرو اترو درېیم پړاو د خېبر پښتونخوا د باجوړ ولسوالۍ په لوی ماموند سیمه کې ترسره شوې دي.
په دغه ناسته کې دواړو غاړو روان کړکېچ ته د حل لارې موندلو په موخه په لنډمهاله اوربند هوکړه کړې.
د امریکا غږ (VOA) مشر مایکل ابرامووېټس له دې امله له خپلې دندې ګوښه کړل شو، چې په شمالي کارولینا کې یې کار کول و نه منل. ابرامووېټسپر په ښکته پوسټ کې د هغه ګومارل ناقانونه کار بللی دی.
د امریکا د نړۍوالو رسنیو ادارې (USAGM) د جمعې په ورځ د امریکا غږ مشر ته لیک استولی او ورته یې لیکلي، چې هغه به له اګست میاشتې وروسته له دندې ګوښه کړل شي.
ابرامووېټس وايي، د فډرالي قانون له مخې د امریکا غږ د مشر لرې کول د نړۍوالو خپرونو مشورتي بورډ تصویب ته اړتیا لري چې دا بورډ ولسمشر ټرمپ مخکې لا منحل کړی دی.
یوه فډرالي قاضي بیا دغه پرېکړه «حیرانوونکې» بللې او ویلي یې دي، چې «موږ په دې پرېکړه نه یو خبر.»
د پاکستان حکومت په راولپنډۍ کې د عمران خان لهخوا د نن ورځې لپاره د رابلل شویو لاریونونو له امله په دغه ښار کې په هر ډول اعتراضي غونډو او لاریونونو بندیز ولګاوه.
د راولپېنډۍ ځایي چارواکو ویلي، چې د اګست له ۴مې څخه تر ۱۰مې نېټې پورې غونډې، لاریونونه، وسله ګرځول، کرکه خپرول او پر موټر سایکلونو د دوو کسانو سپرېدل منع دي.
بل خوا د تحریک انصاف ګوند ویلي، چې دوی به کومه مرکزي غونډه نه جوړوي؛ بلکې د هېواد په بېلابېلو ښارونو کې به لاریونونه کوي.
عمران خان دغه احتجاجونه په زندان کې د خپل دویم کال پوره کېدو په مناسبت رابللي دي.